RUNGGU ADAT KARO, MBARU ENDA

BETLEHEM KETAREN - BERASTAGI, RALINGGUNGI.

Runggu (Seminar) Adat Karo lako pesada arih tokoh-tokoh adat kerna antusen lakon-lakon adat, mbaru-mbaru enda (17/1) ilakoken i Aula Halilintar 2 Jl. Jamin Ginting, Sumbul (Kabanjahe). Runggun e ibahan  Sanggar Seni Karo Persada (Kabanjahe) ras Kementerian Pendidikan dan Kebudayaan RI, iikuti seratusen protokol ras kalak si mediate adat bage pe kalak si nguda denga, termasuk 3 utusen idur Museum Pusaka Karo nari.

Robert Perangin-angin selaku moderator seminar e, menaken runggun alu ngataken maka pengelakon adat genduari enda, la terjeng pelain ibas teptep urung, teptep kecamaten, tapi banci pe pelain bas teptep kuta. Si enda jadi mungkin labo erkiteken perbedan-perbedan adat tapi terlebih-lebih erkiteken kurangna pengantusen makna filosofi si terbuni bas teptep tepap adat. “Maka runggun enda penting lako pesadaken arihta ras lako nambahi pemetehta kerna antusen-antusen lakon adat.”, nina Robert Perangin-angin.

Melem Ukur Ginting ras Robert Perangin-angin, S.Pd, M.Si. tupung  mabai runggun adat (17/1). Foto: Robert Billy Perangin-angin (fb).

“Pentingna runggun enda seakatan enggo metedeh kita kerina radu ras kundul lako ercakap, janah mulai aru pe ateta erkiteken adat Karo enggo mulai salih. Melala situhuna lakon adat Karo, tapi gelah erbuah runggunta enda, sekali enda sisiksiki kerna dua saja, eme adat perjabun ras adat kematen tah pe nurun. Arah kita sipulung enda enggo ersada arih, maka selaku praktisi ras pemerhati adat banci ka kita ras-ras pesikap si la tengteng i bas pendalanken sedekah enda, terlebih-lebih pendalanken adat si mekarus erkiteken ngikuti jaman, bage ninta, padahal si e enggo nadingken kiniulin-kiniulin adat.”, nina Malem Ukur Ginting menai cakapna selaku narasumber runggun e. Ginting mergana e, selaku narasumber ras selaku ketua Sanggar Seni Karo Persada ngaloken Anugerah Kebudayaan Tingkat Nasional tahun 2011 arah Wapres RI ras ngaloken PIN Emas Kebudayaan ras Piagam Penghargaan Pelestarian ras Pengembangan Budaya Warisan Bangsa selaku Pelestari ras Penyuluh Budaya Karo arah Menteri Kebudayaan ras parawisata RI tahun 2011.

Ibu Rini perwakilen Kementerian Pendidikan dan Kebudayaan RI, UPT NAD nari, alu ukur si  erburak ras tangkas keriahen ukur bas sinalsal ayona naksiken runggun enda. “Meriah ukur kami nehken penampat idur kementerian nari kempak acara enda ras ngarap pe kami gelah reh buena Sanggar-sanggar Seni si ergiah-giah ngepkep ras mpertahanken budaya lokal. Teptep paksa benen me Cakap suku-suku ras si enda pe perlu kal lit usaha mpertahankensa, ras kami asa ukur kami lit nggit nampatisa.”, nina menai runggun e.

Teptep tepap pengelakon adat isiksiki ibas runggun e, mulai kin kerna gelar “Maba Belo Selambar” tah kin “Ngembah Belo Selambar”; Uga ndahi Kalimbubu Singalo Ulu Emas ibas nehken persentabin, seh ku Acara Mukul tah pe igelari ka Persadan Tendi, ibas adat perjabun, bage pe uga Runggu Simate-mate seh ku Naruhken Bunga bas adat Nurun.

Pengetua-pengetua adat Karo ergia-giah ngikuti runggun (Foto: Robert Billy Perangin-angin (fb).

Ibas pemenan runggun tangkas teridah maka pengetua-pengetua adat si reh idur 17 kecamaten e, erlumba-lumba ngerana lako ngataken uga pendalinkenna i bas kutana, ras enterem ka si negasken maka uga pengelakon teptep terpuk kuta bagem itetapken, la perlu ipeseri ras terpuk-terpuk kuta-kuta si deban. Alu manjar-anjar-anjar narasumber ras moderator nehken cakapna, petangkasken kerna filosofi prosesi teptep lako adat, maka dungna melala pe idat sada perarihen bas runggun e.

“Melala kal gunana runggun enda, pas bagi si ikataken si ngeran ndai. Mawen-mawen pengelakon si pelain e jadi erkiteken langa siantusi uga erti si mbages bas adat e, ras ikut-ikuten ka kita mekarus erkiteken enggo ka kurang kita sisampat-sampaten ngelakoken adat bagi nini-ninita si arah lebe.  Ndube ngeripe nge nini-nininta  erbahan kerja adat. Bage gia alu tambah pemetehta bagenda, tentu banci ka siban si terulin pepagin”, nina Asli Purba, koordinator Seksi Keluarga Paroki St. Fransiskus Asisi Berastagi e tupung kami ras man dingen ndedah Mayan, Tari Lima Serangke ras Tembut-tembut Seberaya si jadi hiburen selingen bas Seminar  e.

Ibas perpudi runggun, ersada arih kerina pengetua-pengetua adat e mindo gelah minter min  ulih runggun e ibahan i bas sada kitap guna jadi gelemen i lapangen adat bage pe gelah minter ibentuk sada Lembaga Adat Karo lako ngepkep perdalinen adat. Robet Perangin-angin bage pe Malem Ukur Ginting selaku moderator ras narasumber runggun ermeriah ukur ngaloken sura-sura pengetua-pengetua adat e ras alu semangat ngataken maka asa ukur lit ras gegeh lit minter me ndalankenca. (BK)

SAI MARA KU RUMAH TENDI

FIRDAUS DEPARI.

Kentisik kita erpenuilih nangdangi kai si semal si nikataken nini ninita e me kap: Sai mara kurumah tendi, sai utang gancih ido, maka kerna kata teh kuan kuanen si enda enggo semal kal sibegiken. Kerna pedah tah kin kerna kata enda engo jadi dareh ras daging nangdangi kita ibas kita  ndalani kegeluhenta tep tep nu wari. Tapi turah bas ukurta sada penungkunen kai kin pengertin kata si enda maka sikap siakap megikensa  tapi turah kemalemen ate. Tapi la banci si lupaken kerna kata enda reh na ibas perukuren nini  nininta nai nari, maka turah kata si enda kubas geluhta. Sabap lit piga piga persadan kata, e me kap: Sai; Mara;  Kurumah; ras Tendi. Adi sitorosi ku pembelasen: Sai; Utang; Gancih; ras Ido.

Kata, “Sai” ngantusken maka enggo nangtang kerina kini latengkan, lanai lit si rongketna, ras enggo melikas, enggo  nangtang banga keleisa ras nipi gulut, enggo tangkas, adi si nen arah pembelasen, eme sai, ipesai enda nuduhken  sada kata lit si ngelanglangi ibas perturah sada sinuan-sinuanta ijuma. Enggo salang sai kerina perukuren sigulut ngataken lanai lit elem elem tah si sangkut sangkut ukur em ia antusenna .Sai enggo ngertiken ketenengen pusuh peraten ibas kita ndalani kegeluhenta teptep wari.

“Mara” adi siorati nini ninita si nuria ngatakensa , mara enda sada rupa si la sue ras perukuren manusia janah labo isuraken manusia kerehenna. Reh udan baho kutengah juma sangana page pas enggo megersing si enda pe banci i ertiken emkap mara nangdangi  kegeluhen. Reh penakit kelaisa tah tah kin penakit layalaya  si ndampar  sada kuta enda pe enggo ikataken mara. Reh ka pe nina si nuria adi udan la reh enggo lit buena sada bulan enda pe ikataken mara. Mbelin lau dingen ia engkernep ken sinuan sinuan page isabah enda pe ikatan kita enggo ikenai mara.

Tahkin kerina asuh asuhen manuk lanai lit tah mate kena bernung sada kuta enda pe ikataken nusur mara kutengah kuta. Lit kejadin udan meder  ras angin meter  janah sorana bagi bindawas ibas ciger wari  enda pe ikataken mara nangdangi kuta. Tah pe udan la erngadi ngadi ngelele ben wari labanci ndarat anak kuta erdahin ku juma nai enda enggo ikataken mara.mara si nuria ras mara si gundari seri nge pengertinna tapi uga kita ngantusi kai si terjadi kubas geluh ta la sentudu ras perukurenta enda sikataken mara teh lang enda penungkunen man banta. 

Nina ka si nuria nai adi lit kalak mate ibahan gendang penurun  i palu gendang seh ngayak mbal mbal tah pendawan  ngelele dung itanemken tah isuanken, kune reh udan  meder ras kaling sungsung angin si erputar ikelewet mbal mbal enda me ikataken nusur mara nangdangi jabu teh man kerina anak kuta. Adi nininta si nuria nipina pe irasiken maba keleisa teh maba mara kerna nipi enda. Jadi mara enda nina si nuria sada kejadin si ndampar ku tengah jabu ku tengah kuta  si la sentudu bagi niarapken jelma si enterem.

“Kurumah Tendi”, nina si dekah reh kemalemen ate, reh nini si ngkelengi kita, pulung kerina ulih latih irumah, pulung page ibas keben, merih manuk niasuh seh ia naper anakna seh dua puluh empat, ermurid babi si niasuh seh anakna sepuluh pitu, la lit perjengilen itengah jabu, anak nipupus pe ngajar bana ia kerina, anak si njabuken bana seh bagi nisurana. Adi nina si dekah adi kurumah kurung ula gasgasi e tandana enggo ikurung kerina tah pulung kerina  tendi irumah, lit lakon-lakon  adat ibas kuta la lit reh udan baho, janah sinuan-sinuan anak kuta pe erbuah meramis kerina, lit kerja kerja tah kin lakon adat anak kuta la lit abat tah kin ikataken  mara kerina erdalan alu salang sai. Seh kerina kade kade mulih ku  kutana enda nandaken enggo masu-masu nini-nininta si arah lebe. 

Nina si nuria, Sai mara kurumah tendi ibas iertiken kal  maka  perdalanen kegeluhen sekalak sekalak ibabo pertibi enda lalap ngarak ngarak ngarak pertendin  keluarga nta si nggo ngadap ku dibata si mada tinuang. Kerna “Sai mara kurumah tendi, sai utang  gancih ido”, ibas ngerana-ngerana kami ras piga piga urang tua, nina, kerna perkatan teh kerna pembelasen kata si ena ngatakensa maka lanai lit si man tangkelan  banci ia ngertiken kejuah-juahen tah pe maba kemalemen ate. Sabab, “kurumah tendi ertina, kempu”, bagenda: “sai nipi gulut maka lanai lit utang kempu, sai utang seri nge ras lanai lit si man tangkelen  kempu.”, nina urang tua e.

“Kata Mejuah-juah,  kempu,  la terpesirang ras kata sai mara ras sai utang. Kerna perukuren pe enggo salang sai ia kempu, la lit elem elem nagdangi ersembuyak, entabeh percakapen ras biak senina, ras kalimbubu pe la lit perjentiken, ras anak beru pe merandal dingen sikap nge perarihen. Lit lakon ibas kuta kerina anak kuta la lit sijungjangen nangdangi si erbahan kerja.”, nina ka urang tua temanku ngerana e.

“Sada nari kal, kempu situhuna kal ras sipeteguh perukurenta ban enggo reh Berita Simeriah enda kempu, kutengah tengahta”, nina neruskenca.

“Eah, bulang, sai utang sai mara kurumah tendi la kin e pe nggo seri ras kai si ikataken i gereja, nusur Kesah Sibadia, nibulang?”, ningku ka nungkun.

”Bagenda kempu, adi seri nindu seri nge sabap  kuidah gundari adi seh sura-sura tah ipajekken rumah sar-sarken lambe tenahken kalimbubu si majekken dalikan  pulung sangkep nggeluh, ibahan ka nge pertoton ope denga man. Dibata Sinjadiken langit ras doni ipuji ras isembah kami kam, ningen ka nge.”, nina nini bulang e erjabap.

“Eh sikap kang akap bandu  kata pemulka pertoton e nibulang?”, ningku ka.

“Kempu, enda me bukti maka Dibata e mehuli dingen merandal, banci kang la kurumah kurumah tendi, banci kang utang e la sai sai.”, nina erjabap.

“Uga ka kin e bulang? Tambah ka si man tangkelen pe bandu bulang?”, ningku mindo unputen penangkasen.

“Bas aku maba toto ah ndai kempu, enggo sai mara..seh sura-sura kalimbubunta. Tapi pusuh ku ngerana  lit denga utang si lenga sai utang adatna langa galari, janah la ipasu pasu, erjabu pe ia nangkih.”, nina.

“Eah, bulang kai kan nangkih janah utang kai ka kin  e bulang?”, ningku ka.

“Bagenda kempu langit enggo erkire-kire langa kurung kambingta. Gelah enggo sai, ketelun  si uri ka kerna penungkunenndu”, nina nutup cakap.

 (FD)

Museum Pusaka Karo reh termurmurna

KRISWANTO GINTING,

BERASTAGI

Ibas paksa-paksa si perpudi enda, reh teremna media reh ndahi lako muat berita kuMuseum Pusaka Karo,  si asa penginget kami, umpamana: majalah Tempo (English Version) Jakarta, Majalah Menjemaat Medan, Lovely Magazine Medan, Koran SIB SUMUT, Koran Metro Sinabung (Karo), Kover Magazine Medan, Metro Tv Jakarta, Net Tv Jakarta ras Daai TV Medan. Selain metedeh ia meteh kerna pusaka ras kebudayaan Karo, media-media e pe mesikel ka meteh uga kin tempas kalak si pepantek musem e, Pastor Leo Joosten Ginting bebere Sitepu e. Sada si njengangken niakap temue-temue e, uga sekalak malim apai ka sekalak si reh idur kuta si ndauh nari ncidahken kinigiah-giahen lako miara ras ngepkep budaya Karo, ija sekalak kalak Karo tulin jine kimaun la nuduhken kinimediaten si bage rupana.

Tuhu, Pastor Leo si  enggo jadi WNI ibas tahun 1994 mekatep kal nekanken perluna miara ras ngembangken kebudayan rikutken taneh si inganina, dingen jadi pendahin si mulia pe niakapna rikutken ras penuruhen Gereja. Gia bage ibas ndahikenca labo lalap erdalan alu melukah. Melala ambaten subuk ibas dampar ukur bage pe ibas dampar perbeliten. La erleja-leja ia ndarami benefactor (si rutang pusuh nampati) rikutken palas perukuren: “bas kita nari dingen guna kita”, subuk bas paksa erjuang bage pe bas paksa rulih, tentuna.

Pastor Leo Joosten Ginting paksaisungkuni Daai Tv Medan,ibas kerehenna si peduakaliken Museum Pusaka Karo.

Museum Pusaka Karo lit tentu labo terjeng ncidahken perkakas-perkakas si nuria, tapi tentuna pe rikutken ras usaha-usaha pepantek kininggiten kalak Karo guna engkelengi budaya ras lako ngantusi sejarahna.

Tim Majalah Menjemaat KAM sada tahun si lepas pe reh ernungnung kerna Museum Pusaka Karo. Foto: Kriswanto Ginting     

I lebe-lebe Bupati Karo, Pastor Leo si enggo lit dekahna enam belas ringan i Taneh Karo Simalem e, ngakui maka melala kiniulin-kiniergan (nilai-nilai) ibas budaya Karo dingen meganjang pe kemulianna dingen si e perlu kal i jaga ras igeluhken. Raduken si e, erbelas pe Ginting mergana e ngataken kata gelah min pemerintah la ngelupaken Museum Pusaka Karo ibas erbahan rancangen-rancangen pembangunen. “Litna museum enda tentu lit ka nge asamna guna mereken kiniulin ibas perkembangen perwisatan i Taneh Karo”, nina Pastor Leo, ndungi cakapna.

Bas pertengahan bulan Desember 2014 Museum Pusaka Karo pe idahi Bupati Karo Terkelin Berahmana sada rombongan. Berahmana mergana e reh ibas mbaru denga kal ia ilantik jadi Bupati Karo. Raduken ras kerehenna, reh ka pe enterem anak-anak sekolah subuk si sangana erlajar i tingkat SD bage pe tingkat SMP sederajat si lit i Berastagi. I lebe-lebe anak sekolah e iiyahken bupati pe anak sekolah e gelah erkeleng ate nangdangi budaya dingen la ngelupaken kerina kepentaren-kepentaren si nuria. Ibahan Pemkab Karo sada rancangaen bantun si banci erketerusen guna Museum Pusaka Karo. Si e tentu penting kal guna perkembangen museum si jadi ingan pengepkepen ras pemiaran kepentaren-kepentaren si nuria si erguna man paksa si pagin pe.      

Bupati Karo Terkelin Berahmana tupung reh ku Museum Pusaka Karo
 (Foto : Kriswanto Ginting)

Kenca ibuka ibas tahun 2013 temue-temue tetap reh ku museum enda subuk turis lokal bage pe turis internasional. Genduari enggo tercatat lit 8000 kali kunjungen ku Museum. Enda ncidahken kata maka kebudayaan Karo arah museum enda enggo reh termur-murna. 

Sada kiniulin si mbelin guna kinibayaken pelestarin budya Karo reh ka idur Wim ras Monic br Tarigan sada jabu, ija  Wim si erkebangsan Belanda ras kemberahenna beru Tarigan e nggit ngendesken kerina buni-bunina ibas rupa perhiasaan-perhiasaan Karo, perkakas-perkakas, perminaken, perkakas ku juma ras perkakas ertukang guna icidahken ras ijaga i Museum Pusaka Karo. Si enda tentu maba keriahen ukur mab banta kerina, bage pe keriahen ukur ibas pusuh kami si njayam Museum Pusaka Karo. (KG/BK)

NGAYAKI KINIBAYAKEN

Ibas sada sada kuta i taneh si meduru cibalna, litme sada jabu si kegeluhenna tuhu mehaga, kegeluhenna tuhu erkecukupen, adi secara ekonomi maka enggo me dat nomor ia ibas kutana. Keluarga enda kuh nge, lit bapa, nande ras pupusna lit 4 kalak. Anak-anakna kerina enggo me erjabu, dingen tading sada kuta ras ia. Jabu enda bage pe anak-anakna tuhu ermeriah ukur erkiteken kerina anak e enggo me ibahan bapana rumahna ternonggal sada gia la mejilesa, juma si man cametten pe lit aminna gia la mbelangsa.

Tande wari tande minggu, bulan, bage pe tahunna tambah tuana nande bage pe bapa enda. Maka banci ikataken enggo seh lansia, e maka kulana pe nggo kurang gegehna, kurangka rusur kesehatenna. Tapi uga ibahan lanai bo sersilahken kerna pinakit, adi ibas kegeluhen enda labo banci la sakit, adi nggeluh i babo pertibi enda, kin gia nguda denga bage pe enggo metua, bage pe nande ras bapa enda sakit-sakiten me. Ibas sada piga-piga tahun enda enggo me kurang rusur kesehaten nande itengah jabu, sakit me, banci ikataken pinakitna pe erbage-bage curakna. 

Kerina me anak-anak pernanden enda bage pe permainna empatna enggome latih iakapna rusur ngerawat nande enda, erkiteken sakit ka, malem ka, sakit ka, malem ka, sakit ka bage me gedang-gedang wari si inanami nande enda. Terlebih bapa enda enggo me cukup latih kal iakapna, enggo piga-piga hartana idayakenna man pertambar nande e, keri pe kerina labo dalih gelah malem kal pinakit temanku enda, bage me ate bapa enda. Tapi kai si jadi malahen enggo ka pe keri kerina, nande tengah jabu langa bo madan. Singkat cerita, nande enda drop kal seh struk total, lanai bo banci erkai pe, malahen muat nakanna pe lanai ia ngasup, ambah me latihna iakap anak permainna, suari bengi nande enda enggo man adep-adepen.

Tambah warina lalap nge reh urakna kesehaten nande enda, bage ka pe ambah minggu seh ku bulanna lalap nge reh urakna, kerina si ngiani pe enggo me si dalih-dalihen, erkiteken enggome putus asa ngadep-ngadepsa. Ibas sada wari, paksana nandangi ben lawes me nande enda ngadap man Dibata Simadakuasa, kerna si enda labo ise pe si ngasup ngelawan kematen, adi enggo mari nina Dibata maka arus nge berkat, sabap Ia kap simada kula ras kegeluhenta. Megogo dingen ceda kal ate keluarga enda ibas kelawesen nande enda. Ikuburken me nande bagi ugakin adat kalak Karo. Kenca enggo 4 bulan kelawesen nande e, maka lanai mediate anak-anak bage pe permainna man bapa enda, erkitekeken lanai bo akapna lit si man arapenken ibas bapa enda nari, lanai bo lit juma, bage pe erta si man tading-tadingen bapa enda, bage me perukuren anak-permainna.

Ibas sada paksa rukurme sisada bapa enda, uga nari nge kubahan segelah mediate min anak –permainku enda man bangku arih, nina bas pusuhna. Maka datna me sada cara, I buatna sada renceng miter ibabana ku tiga, jumpaina me tukang emas segelah isepuh emasken me renceng e. kenca enggo dung isepuh maka lanai bo ieteh maka e renceng, erkiteken enggome bali ras emas 24 karat. Ibabana mulih, seh i rumah ibalutina mejile.

Kenca si e, idilona me anakna sada persada ku rumahna, si pemena idilona anak ras permainna sintua, kenca reh anakna sintua irumana nungkun anakna e nina: “kai kin ndai atendu pa, maka idilondu aku ras permaindu ku rumah enda ?” Nina bapa enda njabasa: “bagenda anakku, kuturiken ateku man bandu ras permain, erkiteken lit kap mbarenda buni-buni kami ras nandendu ndube anakku, janah man bandu ngenca ateku kuturiken segelah enggo ietehndu pepagi, tah uga-uga kesahku e”. Maka nina anakna erjabap: ”kai kin e pa, kai pa” janah kurang ter akapna .

“Bagenda anakku seh nge pagi paksana ietehndu kai, ma idahndu nge rai permain ena kai si molah-olah idatas lemari ah, adi sitik kal banci nge ku cidahken man bandu ras permain ena.”, nina ka bapana. “Adi bage buat nindu tare bengkila ena bapa si anu” nina minter permainna e. (Jore ndai me sekali enda, melala denga kepe erta bengkila enda nina ibas pusuhna). Maka nina bapa enda “e… enta kubuat.” Mberat akap bapa enda muatsa janah icidahkenna, sitik ibukana balutna, minter teridah erndilap kal. “Enta pa, emas kap ena!”, nina anakna. “Aku saja munikensa nindu tare bengkila ena bapa si anu ” nina ka minter permainna nambahisa. Nina bapana njababsa: ”e.. langa bo banci anakku, sebap enda pagi kubereken man ise kena si nggit engkelengi aku asa ukur ras gegehna si lit, ku je nge pepagi kubereken. Kam lit kap 4 sembuyak anakku. E nam anakku, e maka gundari mulihlah kam dadaplah dahindu bagi semalna!!”

Mulih me anak ras permainna sintua e ku rumahna, dingenna cakap- cakap, “adi bage nina bengkila ah ndai bapa si anu, aneng-anenglah bengkila ah, segelah tading i rumahta sajalah bengkila, dingen kita naggung nakan ras belanjana”, nina ndeharana si mata duiten e.

Bapa enda, sekalak si pantas jelmana, pepagina idilona ka anak ras permainna si nomoe dua, dingen iturikenna bagi sini iturikenna man anakna sintua ndai. Pepagina ka man anakna si nomor telu, si perpudina man anakna singuda pe bali ka penurikenna.

Kenca si e maka enggome salih si jadi.  Kin adi gelgel la lit si rate keleng, genduari enggo erlumba nami-nami. Anak-anakna, permainna , bage pe kempu-kempuna enggo kerina erlumba ncidahken kiniulinna: lit simereken belanjana, lit si naruhken gulen, nakan, bengkauna, bage ka pe si nuci uis ras si debanna. Enggo me seh ulina perbahanen anak-anak, permain, ras kempu-kempuna, erkite-kiteken lit si man arapenken ku pudi wari. Menam-menam seri ras raja, penami-nami nandangi bapa enda ndai. Seh maka maun-maun lanai ietehna si man panganen, dingen riba-iba pe. Malem dingen meriah nge min ukur bapa enda, tapi megogo ka atena, erkiteken ietehna uga perukuren anak, permain ras kempu-kempuna kerina, harta kal ngenca kerina perayakendu kerina nina ibas pusuhna.

Tande tahunna bapa end ape sakit ka janah e ka me mabasa seh ku kematen. Kenca dung acara penguburen bapa e, maka kurang ter me iakapna kerina lako ngeteh kai kin isi buni-buni bapa e. Minter ibabana buni-buni bapana e ku tukang emas, kerina ia berkat ku je, segelah banci kari minter kita erbagi-bagi nina kerina, ope denga seh bas tukang emas. Seh ibas tukang emas minter italangina balutna. “Cuba sitik periksandu pa, tah piga kilo kin emas enda”, nina man tukang emas e. “Sabar kena ya.. enta ku cek lebe kadar emasna”, nina tukang emas e ngaloi. 

Kurang ter kal akapna kerina, erkiteken enggo me lit sura-surana sekalak-sekalak. Reh nina tukang emas e ngerana: ”situhuna lit ateku kuturiken man bandu kerina, ma labo kam kari sengget !”  Minter ka erjabap kalak e, nina: ”Lang” alu sora si megang. Maka nina tukang emas e: ”situhuna, enda renceng isepuh emas, jadi enda palsu.” “Palsuuuu….???” nina kerina alu megang, berjut kerina janah deba seh ndabuh pingsan pe anak, permen, kempu-kempu bapa enda ndai.

Turi-turin enda ituriken: Alm bulang Zainaal Ginting. S

Isuratken: Suhamdi Barus

PEPITULAYAUKEN

(FIRDAUS S. DEPARI)

Perlebe,  mari sigermeti kai kin ertina “tanda-tanda” rikutken pengidah kalak Barat. Nina Leslie White(William A Hariland 1988: 339) “Uga manusia menai kegeluhenna makeken tanda tanda si jadi  sada iketen tah rakuten, kiniraturen  nggeluh ibas sada persadan ibas kesemalen, e maka lit sada tanda man banta ibas kita nggeluh ngikuti kegeluhen.

Kegeluhen manusia  ibas pertibi enda, ibenai ibas manteki sada perjabun. Jenari sada pengarapen emkap lako ndatken tuah arah perjabun enari. Kerina lakon menai perjabun kalak Karo la banci pulah arah pasu-pasu kalimbubu tah ia icidahken ibas kerehenna tupung ngembah belo selambar bage pe seh ku lakon ndungi peradaten seh ngayak lakon ndemi isi jabu. Jenari asum ipelimiken Dibata anak ku tengah jabu seh nina si nuria lit lakon petigatigaken, lakon nggunting buk bage pe lakon pepitulayauken.

Pepitulayauken  eme sada bagin  uga kalak ngelakoken sada pendahin si mulia dengen mereken ketenengen ukur. Nai nai nari pe nininta enggo persadaken kula ras pertendin nangdangi doni tah pe pertibi enda. Lakon enda pe sada lakon si empat sendalanen pulung sangkep nggeluh: sukut, senina, kalimbubu ras anak beru. Kerna pangan ras inemen pe isikap ken guna lakon enda.

Torosen perdalinen lakon pepitulayauken enda kerina iatur anak beru. Anak si dilaki si nipelimiken  Dibata enda i embah mamina kulau iarakken kerina sangkep nggeluh. Adi anak si  dilaki si ipepitulayauken, ia iembah bibina. Iembah ia ku tapin tah pe ku tepi lau si maler iampu  mamina tah pe bibina, jenari iembus embut embuttakalna, empat kali, nina huup...huup...huup...huup. E maka isapuna takalnatelu kali, nina alu perbahanen si noria lit ubungen ras bilangen penjujungi beras piher. “Empat: selpat liah liah nangtang banga keleisa ras ukur gulut; Telu: talukenlah si ilat ras si jahat  alu perbahanen  si mehuli.!”

Banci saja anah napu takal beberena telu  kali, siertiken  emkap: Sipemena, lebe nari kupudi, tujunna gelah adi enggo mbelib pagi ia, erpenungkunenlah man senina. Sipeduaken  sapuna ka lebe nari kupudi, alu toto gelah mehamat ia pagi nagdangi kalimbubu. Si peteluken, sapuna takalna anak e lebe nari kupudi, anah erbelas, gelah metamilah ia pagi man anak beru adi enggo mbelin

  Nina si noria, maka  iampu me anak si kitik e alu tan sikawes,  jenari mami tah bibina muat batu itengah lau, jenari angkatna batu e janah erbelas: “piher batu enda nakku bebere mamina (nina mamina man bere-berena si dilaki) permen bibina (nina bibibna man permenna si diberu) piherren pertendindu ndalani kegeluhen ibabo pertibi enda”. Bagem nakku, gedang lau si maler gedangen pasu pasu Dibata ras pengarapen kami, ibas kam ndalani kegeluhen enda.  Kenca dung lakon petandaken anak kitik ku tapin enda ilakoken, e maka mulih kerina kurumah.

Pepitulayauken enda sada tanda si ipesusur nini-nininta lako nandaken uga anak sikitik pe enggo ipersadaken ras doni enda, ia ipersada  arah lau ras pasu pasu kalak si ihamati. Erkelangken “dibata” si niidah ipersadaken anak si kitik e ras lingkungen geluhna, lako buktiken kepeken kalak Karo ngergai doni enda.  Ipetandaken anak ku pertibi enda e me ingan si numpak-numpak biak senina bage pe ras piga piga gelar kalimbubu. Je nari iembus ka alu kesah, sapu perdempakenna bage pe kutakalna alu lau si maler.  Je nari enda nakku ku embah kam alu perembah si nibaba kami mami/bibinndu nakku, mejuah juah kam la ngidet-ngidet, lupa kam mbatuk ngayakken gedangndu, lupa kam sakit tarum ngayakken  belinndu nakku. Enteguh kal kam iembah kami rikut ras toto kami  man Dibata si njadiken kerina si nasa lit nakku.

Kerina lakon e ilakoken ibas lau s imaler  tah pe itengah lau si maler. Sada peradaten si mehuli kal amin gia lakon si bagenda rupa enggo lanai semal ilakoken tapi lakon si bagenda rupa pernah lit janah enggo pernah ilakoken kita kalak Karo. Pepitulayauken sada peradaten kalak Karo e me kap ipetandaken man pertibi enda alu itaruhken ku lau tah tapin lako ia enggo ersada ras pertibi gelah la dat ganggun bas perdalanenke geluhen. (adi i Jawa igelari tedak-setin si niertiken alu rasmi ras sah iturunken kutaneh alu tujun gelah anak si kitik jadi megegeh, sehat la kena kuasa si gelap si lit ibas doni enda. Adi kalak Bugis anak si mbaru tubuh itamaken ibabo piring si galang tah itamaken ibabo capah si galang. Seh wari si pepituken igeleh kambing  buena pitu ikur, ibas wari si pesiwahken  nandena ras anakna iperidi launa ibuat ibas piga piga mata lau tah sumbul lau si iteki lit kramatna ras piga-piga tanda-tanda kegeluhen si semal ipakeken. Adi kalak Minahasa tah kalak  Dayak –Ngaju lit perserina ras kalak  Karo anak si kitik pe itaruhken ku lau tah tapin kuta ipetandaken nangdangi pertibi tah doni enda.           

Sumbul:“Antropologi Budaya”, Depertemen Pendidikan dan Kebudayaan  Jakarta1980. Drs. S.A.Basuki Soekanto).

NGAMBUR-NGAMBURI LAU MECIHO

 FIRDAUS DEPARI

Kentisik kita erpenulih kempak kalak si erpemeteh tah pe si pande nurat emkap, J.J.Honigman ibas kitapna si ergelar The World of Man si itorosi Koentjaraningrat  alu ngataken lit telu rupa si teridah ibas kai sini lakoken manusia ibas ia ngikuti budaya tah peradaten kegeluhen.

Si pemena emkap uga manusia enda ngelitken tah njadiken rupa sini lit ibas perukuren manusia enda emkap, perukuren si mehuli, kerna kai kai si meherga, kerna adat nggeluh, uga arus, ras uga kin la arus ilakoken manusia si sentudu ras peradaten kegeluhen, si enda ia lit ibas perukuren manusia ia sipatna Abstrak tah kin la banci ijemak sabap turah arah ukur manusia nari.

Banci teridah ibas sada aturen kerna lakon perjabun ibas kalak Karo reh ibas ukur manusia nari. Kerna mereken kata pe labo isuratken man si erjabu ia ibelaskan alu babah reh ibas ukur ras pusuh manusia nari.

Si peduaken emkap kerina sini lakoken manusia tah perbahanen emkap ulih ibas budaya tah adat nggeluh manusia si teptep wari si enda banci teridah ibas rupa uga kita kalak Karo, kerna anak  si kitik ijampul bukna, tah kin mereken piso mersik man anak beru sini lakoken kalimbubu si kin ia ikataken Dibata si niidah. Perbahanen si enda ia sipatna Konkrit tah ia banci ijemak tah banci si nen alu mata nta.

Si peteluken emkap rupa benda tah barang-barang sini iban manusia arah ukur ras pemeteh banci ia erbahan rumah, erbahan sapo, erbahan redan lako nangkih batang pola,  jadi rupa si peteluken enda me  si teridah kal ibas ibas kegeluhen kita kalak Karo. Kerna si telu rupa enda banci sinen maka ibas geluh ta kalak Karo kerna kiniraturen nggeluh ibas lakon nehken kehamaten emkap, ngambur-ngamburi lau meciho. Jadi turah penungkunen man banta engkai maka lit tah turah bas ukur lakon sibage rupa. Lanai banci si buali enda enggo jadi dareh ras daging teh enggo terinternalisasi  ibas kegeluhenta.Turah arah ukur emaka ibahan peralaten na e maka lit ingan si man lakonenken. Lit lau, tapi lau meciho, iaturken kerna kuja kin lau enda. Kerna kata nangdangi lau ras tujun lau enda pe arus lit kata tah pedah ibas lakon ngamburi lau enda. Lau meciho enda pe arus nge mbabai cakap tah sura-sura, arah lau meciho enda iendesken pengarapen si enteguh tah sura sura kemalemen. Lau emkap, tanda kegeluhen, pemurihi, si nangtangi,  si mulahi, Meciho emkap ngertiken la lit rintepna tah la ia megembur, tangkas, la erbual, kemalemen ate, ketenengen, sora pusuh. Kuran tah mangkuk mbentar nina si nuria irumah nari enggo ikuhi alu bulung-bulung si melias gelar dingen rimo mukur pe enggo igelati guna i ambur-amburi i babo ingan keluarga nta si enggo mate tah ngadap ku Dibata si mada tinuang. Janah isuanken ka sangke sempilek deher ingan ras kaling juhang semal nina si nuria enda ilakoken kalimbubu ras anak beru. Emaka iburihi tan alu lau meciho.

Enda me si semal ban nini ninta adi ia ngelakoken lakon, ermeriah ukur, erceda ate, tah seh sura-sura, tah lakon si semal. Kerja Tahun  Nimpa Bunga Benih, lit lakon pesai pendawan, tah nai igelari pengadi-ngadin. E maka si jadi pengertin emkap uga lau meciho enda iambur-ambur  ije teridah tujun tah kin antusen lau enda iamburken. Lau si useken bas kuran tah ibas mangkuk mbentar  nari arus rikutken kata, sora pusuh si la pernah erbual mekatep  je teridah bilang-bilang ate nangdangi sienggo lawes leben ku taneh kemulihen mekatep rikut ras perngandungen tah sora tangis iluh si erdire-dire si ncidahken uga kin perbahanen si nggo mate tah keluarga ta si njumpai perpadanen na ras Dibata si mada tinuang sanga ia nggeluh denga idoni enda. Banci sinen piga-piga rupa ibas kalak Karo lakon ngambur ngamburi lau meciho. Lakon enda banci ilakoken alu piga-piga rupa, banci pulung kerina sangkep nggeluh, emaka lakon itorosi alu peradaten, Kalimbubu, Senina, Anak Beru. Adi terjeng jabu e iaturken banci jabu ngaturken lakon pengambur-ngamburi lau meciho.

Adi orang tua si dilaki ras si diberu  lanai lit tah enggo njumpai perpadanen ras si mada tinuang, lit sura-sura naruhken lau meciho janah pesai ingan orang tua. Lakon enda terjeng anak, ndehara, kempu si dilaki ras si diberu saja ku pendawan. Sinen sitik kerna kata lau meciho nangdangi keluarga si enggo ipendawan.

Anak: Enda Nande Bapa reh kami ras permen ndu ras kempu ndu ibas nangkih-nangkih matawari enda pesai ingan ndu enda naruhken isap ndu naruhken lau inemendu mumbang si nguda, o nande, o bapa sehat mejuah juah kami ras permen ndu e ras kempu ndue, uga ningku o nande bapa tangisku e pe enggo sitangis tangisen, bapa pedah ras ajar ndu e lalap kuinget metenget, megermet, mesimet, mediate, dingen erlagu langkah si mehuli anak kubas kegeluhen itengah jelma si enterem. Nakkuuu nindu nge o nandeee, aminna  la gia sempat tandai ndu permen ndu e, ras kempu ndu e alu pertendindu arak-arak ndu kami lalap. E maka kuamburi lau meciho bas ingan ndu e nande bapa, gedang lau si maler gedangen pengarak-ngarak ndu kami kerina o nande,  o bapa mejuah juah kami kerina. Meciho lau si amburken kami nande, bapa bagem cihona ukur kami nangdangi kam, tek kami kam pe meciho pertendin ndu ngarak- ngarak kami ndalani kegeluhen kami babo pertibi si tembe enda nandeee,,, bapa....aaa.

Ndehara: Enda kami reh mbaba lau si meciho ras anak ndu e ras kempu ndu o nande, o bapa. Bagem bapa, nande ibas kami reh ku ingan ndu enda morah ateku tedeh ateku ija gia mbarenda ibas kami ipersada Dibata ras anak ndu e o bapa ...o.nande, la kam pajek cinder petungko tungko ayo...tek aku kam lalap ngarak-ngarak kami seh ngayak gundari kami sehat mejuah-juah ras anak ndu e bage pe ras kempu-kempu ndu e nande bapa.. Ijenda kuamburi lau meciho ku ingan ndu e,,, sehat, seh sekolah kempu ndu e nande, bapa pertendin ndu lalap ngarak-ngarak kami.. mejuah juah...

Kempu-Kempu; Enda kami reh Bulang...  Ni Karo ku ingan ndu e.. sehat kami bulang, sehat kami karo seh sekolah kami sehat nande ras bapa gelah meriah akap kami lalap... kami  pe seh pagi sura kami bulang amburken kami lau meciho mejuah juah kami kerina bulang alu pertendindu arak-arak kami bulang...  nikaro.. menggo bulang, menggo karo..kurumah kami .

     Kesemalen tah pe igelari tradisi ibas cakap Latin (tradere) sini ertina (menyerahken) entah pesehken, tah iwarisken,  kerna si semal ilakoken nai nari seh ngayak gundari. Edward Shils ibas kitapna, tradition ngertiken palas tradisi tah kesemalen emkap iwarisken nai nai nari seh ngayak gundari. Ibas Encyclopede Britanica, tradisi emkap ingan pulungna kerina kesemalen, kiniteken, ras piga-piga lakon peradaten, si erbahan reh layasna, reh tunggungna peradaten kegeluhen ibas sada terpuk bangsa. C.A.van Peursen ngertiken, tradisi emekap sada kejadin pewarisen aturen-aturen nggeluh, peradaten, tahpe kerna erta-erta si mehuli guna anak-anakta tahpe nangdangi si nursurta. Ercurmin kita nangdangi lakon si semal ibas kita naruhken lau meciho nangdangi keluarga ta si enggo leben ngadap ku si mada tinuang perkakas lako nerusken tradisinta enda, min kita lalap nuanken si mehuli man anak anakta. Bahasa tah pe cakap kita kalak karo siterusken man anak-anak ta. Lakon ngambur-ngamburi lau meciho sada kesemalen si seh jilena ngayak gundari sentudu ras peradaten kegeluhen. Kai si ngena ate manusia ras sentudu ibas  jelma si enterem enggo mehuli dingen merandal iadep adepen Dibata.

Erpalas ken kekelengen ras kebenaren itengah jelma gelah peradaten kegeluhen nggeluh seh rasa lalap.(f.d)