NGAMBUR-NGAMBURI LAU MECIHO

 FIRDAUS DEPARI

Kentisik kita erpenulih kempak kalak si erpemeteh tah pe si pande nurat emkap, J.J.Honigman ibas kitapna si ergelar The World of Man si itorosi Koentjaraningrat  alu ngataken lit telu rupa si teridah ibas kai sini lakoken manusia ibas ia ngikuti budaya tah peradaten kegeluhen.

Si pemena emkap uga manusia enda ngelitken tah njadiken rupa sini lit ibas perukuren manusia enda emkap, perukuren si mehuli, kerna kai kai si meherga, kerna adat nggeluh, uga arus, ras uga kin la arus ilakoken manusia si sentudu ras peradaten kegeluhen, si enda ia lit ibas perukuren manusia ia sipatna Abstrak tah kin la banci ijemak sabap turah arah ukur manusia nari.

Banci teridah ibas sada aturen kerna lakon perjabun ibas kalak Karo reh ibas ukur manusia nari. Kerna mereken kata pe labo isuratken man si erjabu ia ibelaskan alu babah reh ibas ukur ras pusuh manusia nari.

Si peduaken emkap kerina sini lakoken manusia tah perbahanen emkap ulih ibas budaya tah adat nggeluh manusia si teptep wari si enda banci teridah ibas rupa uga kita kalak Karo, kerna anak  si kitik ijampul bukna, tah kin mereken piso mersik man anak beru sini lakoken kalimbubu si kin ia ikataken Dibata si niidah. Perbahanen si enda ia sipatna Konkrit tah ia banci ijemak tah banci si nen alu mata nta.

Si peteluken emkap rupa benda tah barang-barang sini iban manusia arah ukur ras pemeteh banci ia erbahan rumah, erbahan sapo, erbahan redan lako nangkih batang pola,  jadi rupa si peteluken enda me  si teridah kal ibas ibas kegeluhen kita kalak Karo. Kerna si telu rupa enda banci sinen maka ibas geluh ta kalak Karo kerna kiniraturen nggeluh ibas lakon nehken kehamaten emkap, ngambur-ngamburi lau meciho. Jadi turah penungkunen man banta engkai maka lit tah turah bas ukur lakon sibage rupa. Lanai banci si buali enda enggo jadi dareh ras daging teh enggo terinternalisasi  ibas kegeluhenta.Turah arah ukur emaka ibahan peralaten na e maka lit ingan si man lakonenken. Lit lau, tapi lau meciho, iaturken kerna kuja kin lau enda. Kerna kata nangdangi lau ras tujun lau enda pe arus lit kata tah pedah ibas lakon ngamburi lau enda. Lau meciho enda pe arus nge mbabai cakap tah sura-sura, arah lau meciho enda iendesken pengarapen si enteguh tah sura sura kemalemen. Lau emkap, tanda kegeluhen, pemurihi, si nangtangi,  si mulahi, Meciho emkap ngertiken la lit rintepna tah la ia megembur, tangkas, la erbual, kemalemen ate, ketenengen, sora pusuh. Kuran tah mangkuk mbentar nina si nuria irumah nari enggo ikuhi alu bulung-bulung si melias gelar dingen rimo mukur pe enggo igelati guna i ambur-amburi i babo ingan keluarga nta si enggo mate tah ngadap ku Dibata si mada tinuang. Janah isuanken ka sangke sempilek deher ingan ras kaling juhang semal nina si nuria enda ilakoken kalimbubu ras anak beru. Emaka iburihi tan alu lau meciho.

Enda me si semal ban nini ninta adi ia ngelakoken lakon, ermeriah ukur, erceda ate, tah seh sura-sura, tah lakon si semal. Kerja Tahun  Nimpa Bunga Benih, lit lakon pesai pendawan, tah nai igelari pengadi-ngadin. E maka si jadi pengertin emkap uga lau meciho enda iambur-ambur  ije teridah tujun tah kin antusen lau enda iamburken. Lau si useken bas kuran tah ibas mangkuk mbentar  nari arus rikutken kata, sora pusuh si la pernah erbual mekatep  je teridah bilang-bilang ate nangdangi sienggo lawes leben ku taneh kemulihen mekatep rikut ras perngandungen tah sora tangis iluh si erdire-dire si ncidahken uga kin perbahanen si nggo mate tah keluarga ta si njumpai perpadanen na ras Dibata si mada tinuang sanga ia nggeluh denga idoni enda. Banci sinen piga-piga rupa ibas kalak Karo lakon ngambur ngamburi lau meciho. Lakon enda banci ilakoken alu piga-piga rupa, banci pulung kerina sangkep nggeluh, emaka lakon itorosi alu peradaten, Kalimbubu, Senina, Anak Beru. Adi terjeng jabu e iaturken banci jabu ngaturken lakon pengambur-ngamburi lau meciho.

Adi orang tua si dilaki ras si diberu  lanai lit tah enggo njumpai perpadanen ras si mada tinuang, lit sura-sura naruhken lau meciho janah pesai ingan orang tua. Lakon enda terjeng anak, ndehara, kempu si dilaki ras si diberu saja ku pendawan. Sinen sitik kerna kata lau meciho nangdangi keluarga si enggo ipendawan.

Anak: Enda Nande Bapa reh kami ras permen ndu ras kempu ndu ibas nangkih-nangkih matawari enda pesai ingan ndu enda naruhken isap ndu naruhken lau inemendu mumbang si nguda, o nande, o bapa sehat mejuah juah kami ras permen ndu e ras kempu ndue, uga ningku o nande bapa tangisku e pe enggo sitangis tangisen, bapa pedah ras ajar ndu e lalap kuinget metenget, megermet, mesimet, mediate, dingen erlagu langkah si mehuli anak kubas kegeluhen itengah jelma si enterem. Nakkuuu nindu nge o nandeee, aminna  la gia sempat tandai ndu permen ndu e, ras kempu ndu e alu pertendindu arak-arak ndu kami lalap. E maka kuamburi lau meciho bas ingan ndu e nande bapa, gedang lau si maler gedangen pengarak-ngarak ndu kami kerina o nande,  o bapa mejuah juah kami kerina. Meciho lau si amburken kami nande, bapa bagem cihona ukur kami nangdangi kam, tek kami kam pe meciho pertendin ndu ngarak- ngarak kami ndalani kegeluhen kami babo pertibi si tembe enda nandeee,,, bapa....aaa.

Ndehara: Enda kami reh mbaba lau si meciho ras anak ndu e ras kempu ndu o nande, o bapa. Bagem bapa, nande ibas kami reh ku ingan ndu enda morah ateku tedeh ateku ija gia mbarenda ibas kami ipersada Dibata ras anak ndu e o bapa ...o.nande, la kam pajek cinder petungko tungko ayo...tek aku kam lalap ngarak-ngarak kami seh ngayak gundari kami sehat mejuah-juah ras anak ndu e bage pe ras kempu-kempu ndu e nande bapa.. Ijenda kuamburi lau meciho ku ingan ndu e,,, sehat, seh sekolah kempu ndu e nande, bapa pertendin ndu lalap ngarak-ngarak kami.. mejuah juah...

Kempu-Kempu; Enda kami reh Bulang...  Ni Karo ku ingan ndu e.. sehat kami bulang, sehat kami karo seh sekolah kami sehat nande ras bapa gelah meriah akap kami lalap... kami  pe seh pagi sura kami bulang amburken kami lau meciho mejuah juah kami kerina bulang alu pertendindu arak-arak kami bulang...  nikaro.. menggo bulang, menggo karo..kurumah kami .

     Kesemalen tah pe igelari tradisi ibas cakap Latin (tradere) sini ertina (menyerahken) entah pesehken, tah iwarisken,  kerna si semal ilakoken nai nari seh ngayak gundari. Edward Shils ibas kitapna, tradition ngertiken palas tradisi tah kesemalen emkap iwarisken nai nai nari seh ngayak gundari. Ibas Encyclopede Britanica, tradisi emkap ingan pulungna kerina kesemalen, kiniteken, ras piga-piga lakon peradaten, si erbahan reh layasna, reh tunggungna peradaten kegeluhen ibas sada terpuk bangsa. C.A.van Peursen ngertiken, tradisi emekap sada kejadin pewarisen aturen-aturen nggeluh, peradaten, tahpe kerna erta-erta si mehuli guna anak-anakta tahpe nangdangi si nursurta. Ercurmin kita nangdangi lakon si semal ibas kita naruhken lau meciho nangdangi keluarga ta si enggo leben ngadap ku si mada tinuang perkakas lako nerusken tradisinta enda, min kita lalap nuanken si mehuli man anak anakta. Bahasa tah pe cakap kita kalak karo siterusken man anak-anak ta. Lakon ngambur-ngamburi lau meciho sada kesemalen si seh jilena ngayak gundari sentudu ras peradaten kegeluhen. Kai si ngena ate manusia ras sentudu ibas  jelma si enterem enggo mehuli dingen merandal iadep adepen Dibata.

Erpalas ken kekelengen ras kebenaren itengah jelma gelah peradaten kegeluhen nggeluh seh rasa lalap.(f.d)

NDARAMI LIANG BUNI-BUNI PERPANDEN GERGA KARO

KRISWANTO GINTING,

BERASTAGI

Anem pe bas paksa si nuria kegeluhen kalak Karo tempa-tempa ndauh idur kehagan rikutken pengenehen si gundari, tapi kegeluhenna e jine nadingken kinata pengamaten si mbages ras meganjang kempak perpanden gerga. Si enda ngantusken maka Taneh Karo pe la ngadi-ngadi nubuhken pande ukir si ngendesken ulih pendahin ras penggermetenna kerna kegeluhen, sura-sura ras kiniteken manusia Karo guna kesusuren ras kesusurenna.

Gerga-gerga si sederhana semalna itujuken lako tulak bala, nahan tah pe pedauh si ngiani jabu idur sura-sura si jahat, tah pe jadi kite penambaren sekalak Guru Mbelin. Gerga-gerga si deban ibas rupa simbol tah pe tanda si metunggung ncidahken si terbuni kerna kiniteken, aturen nggeluh ras si debanna.

Gerga tah pe ukiren Karo semalna ibahan tah pe itempelken pandena bas erbage-bage bangunen Karo, umpamana: rumah adat, geriten, jambur, sapo page ras si debanna. Lit ka ibahan ibas erbage-bage perkakas jabu, bagi: gantang beru-beru, cimba lau, abal-abal, busan, petak, tagan, ukat, ras si deban. Erbage-bage gerga pe lit ka ibas  perhiasen, bagi: gelang, cincin, bura, piso, ras si debanna. Bage kape ibas uis adat Karo si igelari “sirat”, ibahan ka bagi ibas: Uis kapal, Uis Nipes, ras uis-uis si debanna.

Erbage-bage Gerga (Ukiren Karo)

Guna mulihi petangkasken ingetenta, lit pe erbage-bage gerga (ukiren Karo) e me kap:

1    1.Tupak Raja Silima-lima

          2. Tupak Salah Sipitu-pitu

3    3.Desa Siwaluh;

4    4. Bindu Matagah

5    5.Bindu Matoguh

6    6.Tapak Raja Sulaiman

7    7.Panai

8    8.Pantil Manggus

9    9.Indung-indung Simata

          10. Tulak Paku Petundal

          11. Kite-kite Perkis

         12. Tutup dadu/Cimba Lau

         13.  Cekili Kambing

         14. Ipen-ipen

         15.  Likisan Suki

         16. Pucuk Merbung

         17. Bunga Ncole

        18. Lipan Nangkih Tongkeh

        19. Keret-keret Ketadu

        20.  Pengeret-ret

        21. Taruk-taruk

        22.  Bendi-bendi (Pengalo-alo)

        23. Lukisan Tonggal

        24.  Litap-litap Lembu

        25. Pucuk Tenggiang

        26. Embun Sikawiten

        27.  Surat Buta

        28. Kidu-kidu

        29. Lukisan Pendamaiken

        30. Bulung Binara

        31. Tanduk Kerbo Payung

        32. Bunga Gundur

        33. Lukisan Umang

        34. Bunga Lawang

        35. Teger Tudung

        36.  Lukisen Para-para

        37.  Tulak Paku

        38. Lukisen Kurung Tendi

        39. Lukisen Tagan

        40. Osar-osar

Erbage-bage Gerga ibas Kayu tah Buluh: 1). Luskisen Suki-suki; (Foto: Kriswanto Gintings)  2). Lukisen Bulung Binara; 3). Desa Siwaluh; 4). Tumpak Salah Silima-lima; 5). Bindu Matagah; 6). & 7).  Bindu Matagah;  8). Panai;   9). Tupak Salah Sipitu-pitu; 10). Pantil Manggis; 11). Pengeret-ret;  12). Tapak Raja Sulaiman.

Banci ikataken maka malem dingen ermengkah ateta, erkiteken erbage-bage gerga e seh iak genduari banci denga sidatken subuk ibas kitap bage pe ibas inganna icibalken. Si enda la lepas idur ulih  pendahin-pendahin pande-pande gerga, umpamana bagi Adrianus Ganjangen Sitepu umat Katolik i Sukanalu Paroki SPM Kabanjahe nari. Selaku sekalak si mediate nangdangi penjayamen gerga Karo, ibanna  pe lukisen ras tulisen. Piga-piga kitapna si mungkin pe enggo pernah sioge ras si ipelajari kita, umpamana: “Ragam Hias (ornament Karo) Karo seri A ras “Mengenal Seni Kerajinan Tradisional Karo seri B. Genduari enda, Sitepu e tading i Medan ras ije me ia ngerancang Tas ras Baju Batik kreasi alu makeken erbage-bage ukiren hias Karo.

Tuhu, genduari tangkas pe maka suku-suku si deban, tambah-tambah kap kininggiten lako make ras ngkoleksi batik khas daerah. Alu manjar-anjar tapi ibas langkah si pasti, batik khas Karo si ersiratken sirat Karo mulai pe ncidahken bana. Pengkebet pande-pande gerga Karo rikutken ras kepentaren dingen tehnologi si genduari tergejap tuhu-tuhu nampati guna pendahin e banci erlayas dingen sikap idalanken. Alu bage, tuhu-tuhu iarapken gelah gerga-gerga Karo lanai terbuni idur kerincuhen erlajar kalak Karo terlebih guna man si medanak. Terlebih bulan pe maka bulan Oktober si lewat enggo itabalken jadi Bulan Batik Sedoni.Penentuan Wari Batik Nasional ibas tanggal  2 Oktober e erpalasken ketetapen UNESCO sada Badan PBB si ndahiken dahinna ibas bidang Pendidiken, Ilmu Pemeteh, ras Kebudayaan, si alu rasmi ngakui batik Indonesia jadi tading-tadingen budaya dunia. UNESCO jine pebengket batik ibas Daftar Representatif Budaya Tak benda Warisan Manusia. Pengakun PBB kerna batik e jadi pengakun si megegeh ibas lembaga internasional kempak budaya Indonesia.

Batik Karo, rancangen Pio Salvator Ginting. Foto: Pio Salvator Ginting.

La lupa pe maka Museum Pusaka Karo jine, ikut muat bagin ibas peluar gerga Karo idur liang percebuninna nari, lako miara ras njayamsa. Si enda idahiken gerlah kinibayaken kalak Karo e la bene subuk erkiteken terlupaken tah pe erkiteken iperajang kalak. Sada bagin pendahin si enggo ibahan museum Pusaka Karo e me alu erbahan gerga Karo keliling gedung Museum. Bage me pe, museum Pusaka Karo alu ermeriah ukur nehken penampat man teptep mahasiswa si reh erlajar tah pe niksiki budaya Karo si reh i belang-belang arag “Desa Siwaluh” nari.

Bagian interior bas Gedung Museum Pusaka Karo idemi alu erbage-bage Gerga Foto: Kriswanto Ginting/Museum Pusaka Karo.

Gerga ras ornamen Karo tuhu-tuhu metunggung isempabuken bas batik tah pe kreasi kai ras ija pa pe ras la metunggung ibuni-buniken idur kegeluhenta si teptep wari. Alu bage tangkas me man kalak si deban kerna ise ras uga kin kalak Karo e situhuna.

iyakk.. mbera-mera.. 

(KG)/iterjemahken Betlehem Ketaren.

KERJA TAHUN, KAI RAS UGA?

BELEHEM KETAREN, BERASTAGI

Kesemalen (adat) si nuria e me sada kinibayaken kegeluhenta. Kesemalen  e turah dingen nggeluh mehumur i kuta sue ras biak ingan bage pe biak jelma si nggeluhkensa. Lit kesemalen si nuria si masap erkiteken itadingken perkembangen jaman, tapi lit ka si tetap nggeluh, igeluhken manusia alu isueken ras endek kegeluhen.

 Kerja Tahun e me sada kesemalen si nuria ibas kalak Karo, si tetap ertahan nggeluh seh genduari, gia ibas pendalankenna maun enggo  lain ras si mula tangtangna.

           

Kai ras uga kin kerja tahun e ibas paksa si nuria?

Ibas paksa si nuria, ras banci ikataken seh asa genduari kegeluhen kalak Karo erpalasken pendahin nuan-nuan ku juma ras ku sabah. Janah terlebih-lebih page me sinuan-sinuan si pematang ibas paksa si nuria. E maka lit pe pertoton kalak Karo si semal denga sibegi, nina: mbuah page nisuan, merih manuk niasuh, sai mara, kurumah tendi. Ije tangkas teridah maka page igeluhken kalak si nuria jadi tanda kesangapen, ketuahen ras kemalemen ate. Page e me tanda kegeluhen, maka nai galang kitikna keben ingan page jadi sukaten kiniliten.

Rikutken ras kiniteken kalak Karo si nuria, kesangapen, ketuahen ras kemalemen ate (si man perayaken nggeluh kalak Karo) banci ialoken arah pemasu-masun si erkuasa raduken ras pengayun pertendin sangkep nggeluh kerina. Page si jadi tanda kegeluhen e itotoken janah ipepulung janah itenahken pe sangkep nggeluh gelah ras-ras man entabeh alu arapen, ngayu pe pertendinna kerina gelah mbuah page tahun enda. Kepulungen sangkep nggeluh e ibas tep-tep kuta, raduken ras keriahen si ilakoken singuda-nguda anak perana bage pe si medanak si igelari guro-guro aron si ilakoken tep-tep tahunna, e me kerja tahun.

Kerja tahun e, sue ras antusenna e, lit piga-piga erbage rikutken ras pendalanken ibas pelain-lain kuta bage pe urungna, bagenda:

           

1.        Merdang Merdem. Rikut ras gelarna, merdang e me kap dahin ibenaken alu ngerabi, nikapken ingan nuan, nemai ras nuan. Kerja tahun ngikutken paksa merdang idalanken i Tigabinanga ras sekelewetna bage pe Munte ras sekelewetna;

2.        Nimpa Bunga Benih (Ngambur-ngamburi). Kerja tahun ibahan tupung page paksa erlayuk (ersusun kulpah) tah pe tupung umur page kurang lebih dua bulan. Si e ialakoken i taneh Sepulu Dua Kuta bage pe i Simpang Empat ras sekelewetna;

3.        Mahpah. Kerja tahun ilakoken lako ngenanami buah page si nangdangi rani (mulai kenca megersing). Kerja tahun si rikutken mahpah ilakoken i Barusjahe, Tiga Panah ras sekelewetna;

4.        Ngerires. Kerja tahun ilakoken kenca dung peranin guna erkata bujur ibas ulih peranin e. Kerja tahun rikutken ngerires ilakoken i Batu Karang ras kuta-kuta i sekelewetna.

Adi nai, rikutken ras kiniteken si pemena, pertoton tah pe bilang-bilang kerja tahun itujuken terutama man si Beru Dayang. Beru Dayang (bandingken ras Dewi Sri i Jawa tah pe Dewi Maia i Junani) e me si mada kerina bertin (maharahim) janah si mere pasu-pasu guna kerina kinihumuren, subuk gelah taneh mehumur gelah mbuah page, bertin diberu “mehumur” gelah ertuah bayak bage pe bertin asuh-asuhen ras rubia-rubia ras binurung mehumur gelah merih kerinana.

“Biasana belo icibalken rikutken ras pengala erbilang: “Mbuah ko page tahun enda, mbuah ko page. Merih ko masuk niasuh, sai mara, ku rumah ko tendi” ku Deleng Sibuaten. Kenca bage, bagi sinikataken nande aron, merkat me aron ngambur-ngamburi pulungen bulung simalem-malem ras kersik, mulai i pusung juma jenari ku tep-tep suki juma”, nina S. Ketaren (Bp. Agen), sekalak tua-tua rikutken ras pengingetna uga lakon Ngambur-ngamburi ilakoken tupung kerja tahun i kuta Raya.

“Engkai maka ku Deleng Sibuaten?”, ningku nungkun. “Bage ka nina tua-tua, tentu bage ka iikutken. Banci jadi ije me niakap si Beru Dayang ringan tah pe maun ban gelar deleng e sentudu ras biak kehumuren. Ma kin arah sibuaten (perjabun) maka lit kinimerihen?”, nina Bp. Agen erjabap.

Bagi paksa-paksa kerja tahun si pelain-lain e, torosen ras perkakas perlengkapen si nibaba ku juma mungkin pelain-lain. Anem bage, torosen kerja tahun si kuhna si semal denga iinget asa genduari, e me kap:

-          Wari si pemena: Cikur-kur. E me wari persikapen merdang merdem alu ngkurkuri taneh lako ndarami kalimpenek, kidu, ridap tah pe kerina si biak pangan si nggeluh i taneh guna jadi adum nakan pangan pemenan kerja tahun;

-          Wari si peduaken: Cikurung. Nerusken kai si idalanken ibas wari si pemena, idarami me kurung i reba, i juma tah pe i sabah guna ijadiken adum nakan pangan ibas nerusken persikapen kerja tahun;

-          Wari si peteluken: durung. E me wari persikapen kerja tahun si peteluwariken, si ilakoken arah mburtas sabah tah pe ngkerahi lau anak guna muat nurung emas, sibakut, itik, kaperas, gayo tah pe belut lako jadi adum nakan pangan;

-          Wari si peempatken: Mantem. E me lakon nangdangi tampuk kerja tahun si idalanken alu motong lembu, kerbo, babi jadi pangan tupung mantem bage pe ibas mata kerja tahun;

-          Wari si pelimaken: Mata Kerja Tahun. E me wari si mbelin ngerayaken kerja tahun. Ibenaken alu naruhken pangan si enggo tasak tah pe page mbaru  ku rumah kalimbubu ras nimai kade-kade ras temue si reh ku kumah. Kerina rumah talang ras pantang itutup. Tep-tep rumah itingkah, peraturenna arus man. Gelah reh riahna kuta e, biasana ibahan pe gendang guro-guro aron i jambur, e me ingan singuda-nguda ras anak perana ncidahken dirina ras sura-surana arah ercakap-cakap sapih-sapih ia, landek ras impalna, bage pe arah pengarak-ngarak si medanak erlajar me ia kerina kerna kesemalen-kesemalen adat;

-          Wari si peenemken: Nimpa. Gia melala erbagena cimpa, cimpa kerja tahun biasana e me kap cimpa unung-unung  e me cimpa si iban ibas tepung pulut ras tepung beras biasa si risiken gula merah ras tualah ibaluti alu bulung singkut. Cimpa banci ipan sope man tah pe kenca man bage pe biasa ka jadi luah mulih kerja tahun. Enngo ndekah jadi ibas melala kuta, lakon nimpa ipersada ras lakon mata kerja tahun;

-          Wari si pepituken: Rebu. E me tutup kerja tahun. Tupung temue enggo mulih ku kutana sekalak-sekalak si tading i kuta si erkerja tahun la banci kujuma tah pe ku sabah.Tep-tep ibas jabu pulung me orangtua ras anak-anakna guna pekesahken bage pe lako pepanken ku ukur ras pusuh kerna kerina si enggo inanami ibas segedang-gedang wari perayan kerja tahun. Rebu ertina la banci singerana-ngerana janah mereken kesempaten man rubia-rubia ras kerina si nasa lit pesikap bana kerina (pediat alam mengharmoniskan dirinya)

Kerja Tahun si genduari

Gia enggo melala perubahen-perubahen, seh asa genduari kerja tahun tetap denga idalanken. Merari genduari kerja tahun ilakoken ibas dua wari: Motong ras Matana. Bage me gendang guro-guro aron semal denga ibahan sada berngi sada wari, mulai ibas berngi motong seh ku mata kerja tahun.

Gendang Guro-guro Aron Kerja Tahun Juhar 2014
(Foto Yos Laurensius Sembiring Meliala fb)

Adi semalna kerja tahun nai ibahan serentah ibas sada urung rah pe rarasen-rarasen kuta janah mata kerja tahun biasana rembang bas wari Cukera Dudu, genduari enda ibas bulan-bulan rikutken kesemalen siadi, wari-warina pelain tep-tep kuta sue ras perarihen ras perkolong-kolong tah pe kesadan arih ibas Karang Taruna ibas kuta.

I kuta-kuta si ndeher ku tiga, maun-maun lanai lit lakon motong bas wari mantem, tapi keperlun-keperlun itukur i tiga. Tep-tep rumah tetap  talang tupung mata kerja tahun, si mada jabu ertima temue, tapi jarang ertenah maka mungkin pe jadi nimai si la mungkin reh.

Lanai lit lakon ngambur-ngamburi tah pe lakon ngamati Beru Dayang sabap nina maka kita kerina enggo ragama. E maka kai antusen kin kerja tahun genduari enda? Sungkun cuba anak-anakta. Ula heran adi nina erjabap hiburen ras man gratis! Adi bage ikatakenna maka melala kepe enggo bene kai si meherga si ndube siajarken nini-nininta. Terlebih-lebih ibas kai ndai si ituriken idatas kerna antusen kerja tahun eme: ertoto, man ras-ras sangkep nggeluh bage pe keriahen si medanak ras singuda-nguda anak perana.

E maka seakatan erbahan gendang guro-guro aron, seh kal nge ulina adi kerja tahun iisi alu festifal budaya seumpama lomba tari Lima Serangke bagi si ilakoken bas tahun 2014 enda i kuta Sukadame, runggu pesikap kuta kemulihen rasken ras lakon-lakon agama seumpama missa ngataken bujur man Dibata ras lakon-lakon si mehuli si debanna.

(Isuratken alu bahan-bahan si ibuat arah erbage-bage sumbul).