AMAK DABUHEN

FIRDAUS DEPARI (SEBERAYA)

Kentisik ibas kita erpenulih nangdangi perjabun kalak Karo maka tangkas man banta kerna perjabun kalak Karo idemi alu sada iketen nangdangi piga piga  sinursur tah pe banci ikataken ia  iketen dareh.

Nina kalak si erpemeteh si kin ia ngangka kerna uga ubungen  manusia ras manusia si deban, umpamana A Van Gennep, sosiolog Prancis nina, perjabun kalak Karo erkebiaken ku dampar religius. Sue ras si ikutip Darwan Prinst SH, Perjabun si erkebiaken religius ertina emkap: perjabun la terjeng ngiket  si dua belah pihak tapi rikut ibas iketen tendi-tendi subuk si enggo mate tah igelari  tah kin ikataken nini nininta nai nari. 
Kai sini jadi tanda kerna pengertin religius tangkas teridah ibas kai kai si niibereken tah kin ia iluahken tah kin ia si ijileken ibas sada kerja tah kin, lakon perjabun. 

Ibenai ibas jaman siadi singuda-nguda banci irasiken nangdangi sekalak anak perana, bage pe sekalak anak perana irasiken ras sekalak singuda nguda, tah pe banci  ilakoken alu erpangir selamsam ibas persadan dua lau si maler, jenari ia ibere man manuk sangkepi. Seh ngayak ia enggo jumpa tuah dingen seh ngayak pepitu layauken je teridah lalap uga kita nghamati kai kai si niibahan nini nininta nai nari. 

Sitorosi ka kerna kai ertina relegius ndai emaka lit ijenda kami ercakap cakap ras urang tuanta ibas kedei kopi, Kedai Bale ikutanta Seberaya.
(Ralinggungi = Rgg; La Tersena Gelarna Karosekali = KS).

Rgg:”Ibas perjabun kalak Karo eekap kerna rudang tah igelari luah Amak Dabuhen, kai kin maksudna?” 

KS: “Iah mpal adi katakan kerna Amak Dabuhen, arus iperjelas ia maka ibas mata kerja enggo ijilekan kalimbubu, tapi bas kai si nikatakenndu ena dung kerja tah kin tupung mukul nakan sempukul, tah kin ikataken mecah mecah tinaruh, tah kin igela ri ka ia persadan pertendin maka, e maka itorosi ka ia berngi emkap man kerina sangkap nggeluh  man ka si erjabu dua na ia kundul ibas amak si iluahken kalimbubu, tah kin kalak enda ibas sada bilik.”

Rgg: “Kenca dung man i bilik lakon kai siterusna mpal? Kuja kalak enda?”

Mukul, idatas Amak Dabuhen (Foto: Darul Kamal Lingga Gayo)

KS: “Kerna penukunenndu ena, maka adi enggo elah man kalak enda itorosi anak beru pekepar. Sabap lit acara emkap nehken luah kalimbubu si ngalo bere-bere  emkap adi arah kita Urung Suka Piring enda,  adi Pitu mamana maka pitu ka mamina, pituna nehken Amak Dabuhen tah kin igelari Amak Peradaten mpal.  Gelah mejuah-juah kalak enda lalap. Ibas nehken amak peradaten  kundul sempa duana  si erjabu e maka itorosi mereken amak dabuhen tah amak cur tah amak peradadaten.”

Rgg: “Engkai maka amak ibereken mpal, amak ras bantal nge? Janah uga nge nina si ngalo bere bere nehken kata mpal?

KS: “Kerna kata teh belas belas kuan kuan kita Karo  kata emkap tambar,  kata e me kap pedah, kerna si ngalo bere bere nehken amak bantal, semal la lit mangmangna mpal. Banci ka nina si ngalo bere-bere man beberena si erbelas, banci mamina, banci ka mamana, alu nina: ”Enda baba kami amak inganndu tayang,  nakku, duana kam guna ngukuri perukuren si mehuli dingen inganndu tayang duana guna nayangken daging kulandu duana, lako ndalani kegeluhen enda nakkusehat mejuah juah kal kam duana ibas kam manteki perjabun ndu. 

Gedang lau si maler gedangen denga ate kami ibas kam manteki perjabunndu nakku, kai si nisurandu seh ibas lias ate Dibata si mada kuasa.  Ma enggo nakku...” Bage nina  si ngalo bere bere mpal.”

Rgg: “Jadi langa jelas bangku mpal,   kerna amak  bantal tah amak peradaten”

KS: “Eah...mpal, kam jukjuk kap igungndu maka kebacihen,  ngit ka kam nurat tah ngertiken peradaten mpal. Sue ras  si tersurat  majalah ndu ena. Nehken Kata Tuhu ,Alu Tengteng.

Rgg: “Saling jagar mpal langa kin ku antusi, impalku...”

                                   

KS: “Ertina  i je me ia dua rukur mpal, ibas amak e ia nehken sura kerina sangkep nggeluh  maka ije lit lalap pertalin dareh, sehat mejuah-juah nina si ngalo bere bere e me kap intina kal impal.”

Rgg: “Enggo mulai bagi lit sijelasna. Sitik mpal, kerna penjelasenndu kerna amak peradaten,  uga maka ikataken penungkunen  amak peradaten?”

KS: “Kuncina mpal, tah pengertinna amak peradaten, kai kata kalimbubu: “bagi timah sada penuangen kam duana; janah bagi gelang sada tariken kal kam duana, tuah radum ken sangap kam manteki perjabun si mbaru.” Ma enda belas belas si semal ibas kerja kita kalak Karo tah kin ia erdemu bayu, tah kin i petuturken tah kin ia muat beru si ngumban o impal ku...

Rgg: “Oo, adi bage ingan ndatken

tuah ndai pe  ras ingan nuang  pe enggo ipesikap kalimbubu emkap amak peradaten  bage ia mpal?”

KS:”Ula kel seh ku jena, mpal. Enda tandana gelah pasu pasu kalimbubu e tetap maler nangdangi anak beruna terus pe ku kempu kempuna.”

Rgg: “Tapi lit  ka kap isehken kalimbubu penukur sekin,  mpal.  Kai ubungenna ras amak peradaten enda ndai impal?”

KS: “Sada nge pengertinna, mpal,  ras amak ena ndai.  Saja sekin ras amak ma labo seri mpal?  Adi sekin gunana nektek kayu, adi lit kerja lako pegara api, amak ingan kundul tah tayang lako ngukuri kai  si perlu si man ukuren impal. Eah mpal,  langit pe  enggo erkire kire langa kurung kambingta, kerna kai ras uga kerna penukur sekin ndigan ndigan ka sirunggui ma bage mpal?”

Rgg: “Bujur kal impal kerna penuturindu”. (FD)

HOROSCOPE KARO

Bangsa-bangsa si mbelin seumpama bangsa Junani bage pe bangsa Cina lit Horoscope bas ia. Uga  “bangsa” Karo enda?

Ibas Mukul tah pe megati ka me ikataken Lakon Persadan Tendi, ije penganten ibere man dua-dua i babo Amak Dabuhen. Ije  inggermeti (ioge) perpan penganten lako ngenehen biak-biakna pekepar si bagi ngoge horoscope ras rikutken ulih pengogen e, ibere me telah-telah man bana gelah sempabu perjabunna, seh bagi siitotoken sangkep nggeluhna.

Jekmen Sinulingga, sekalak pengajar kerna budaya i USU, alu gayana si perkanam-kanam, pernah maba cakap kitik-kitik i Jambur Merga Silima (group fb) kerna si erbelas ia alu nina:

“Yak, katakenkah sangana kal mukul kita bagundari bas kamar dua-dua.  Enggo lit ije macam-macam cimpa, lau pola, manuk isangkep tare pinggan pasu. Nungkun erpenuruh me si biak nini ras bibi, nina: “pilihi anakku! Kai pe atendu tah buatndu labo dalih yah, buat!” 

“Yak apai gia kita enda, kadena nge lebe buatndu? Sabap lit ngenda kerina palasna ras kite-kitena termasuk antusenna. Benaken ...”

Maka lit si ersumekah maka ia leben milih “pahana”; lit ka si ngataken leben milih “tentenna”; bage pe “atena”; “takalna”; “kabengna”; ras lit ka si ngataken maka “tersitik-sitik ibuatna kerina”. Tuhu erkiteken lanai bo tangkas man si medanak  kerna antusen-antusen perbahanen si bage rupana, maka mesikel me kerina mbera minter erbelas ka si Karo Mergana e petangkaskensa.

“Tah lit gia akapndu  aku peguru-guruken, tuhu nge aku guru rikutken pengertin si genduari. Tesisku jine kerna “Edemubayu Batak Karo; Kajian Semiotika Sosial", ras kuakap lit nge dampar si mehuli kerna kepentaren nini-nininta kerna lakon mukul enda!”, nina ka Jekmen Sinulingga.

E maka itorosina me percaka-pen, alu nina:

1. Pahana. “Adi ipilihndu perlebe pahana, si e ngataken maka: (1) Kam jelmana si enteguh bas pendirin/prinsip; (2) Megegeh kal ncari; mejingkat/perfeksionis; (3) Kemberahenndu beluhkal ngoge-ngoge sura-surarandu, tehna paksa-paksa bas kam gia si kam nge  si latih s ikuskas ibas ncari; (4) Beluh kal ia nampilken bana bas kai pe gia  mesera man simbaken. Yak enda nina nini ndube, cuba pegejapkenndu. Hahahaha....”, nina Jekmen.

2. Tentenna. “Adi tentenna kin si perlebe ibuatndu, si ertina: (1) Pang kam ngalaken kai pe adi enggo akapndu bujur bas kam gia la payo/ la tengteng bas kalak; (2) Seri nge akapndu langkem ras tenggalak adi enggo kenca pas akapndu, (3) Gia bage kam melala kal rejekindu erbahan kalak mehangke kerina man bandu ; (4) Perbapan i tengah jabu pe beluhkan nami-nami kam gia ia buen sinik, nunut-nunut, beluh ngue-ngue gelah ula sempat gejek,  seh kari ngikut kang kam arah pudi rikut ras jungut-jungutndu; (5) Cukup melin cemberundu e maka kuja pe temanndu arus nge permisi  lebe man bandu, seh iajak nge rusur kuja-kuja gia la bagi ukurndu; (6) Bage gia keleng atendu ia e sehkal belinna erbahan ia mbiarkal man bandu, paskal bagi tenten manuk ngepkep krina anakna, keremken nge kerina, ula cuba lit si nggasgasi mis nge serpuhndu, hahahahahaha; padahal langa bo paskal itandaindu ise si reh e.”, nina ka pengajar budaya e. 3. Atena. “Ya, adi sipelebe ipilihndu ate manuk, e antusenna: (1) Pergeluhndu si entabeh perban ndiherkal rejekindu seh maka kam talu perban beluhkal perbulangen-ndu nami-nami kam; (2) Asal enggo bagi sura-surandu kai pe banci rempet iban janah lit bas kam e kap ia; (3) Sung keri meduddus pe kam ngit adi beluh kalak nami-nami kam ; (4) Pergantang telpus sung ngerana la erpepang sabap labo iukurkenna ise jelma sipulung ije. Kam mbiar ernen kalak jelma sipersinik-sinik. Bagendam nina nini si ndube kusungkuni.” nina ka nerusken cakapna.

4. Takalna: “Yak, adi siperlebe takalna ibuatndu, ertina: (1) Kam jelma ngasup rukur metahat. Sung enggo dekahen rukur, sabap cocok ras sikapen akapndu rusur kam, ipenggurui la gia bas tegunndu; (2) Rusur nge ipindo kalak pendapat man bandu janah sehkal akapndu riahna, gia latih kal akapndu rusur iban kalak rukur; (3) Lit ka nge sitik biak mekengndu des bagi kuling-kuling gia kena lau mis kange medate; (4) Pang arah lebe ngalaken kai pe gia rusur kang kam mela-mela bas ukurndu erbuni-buni; (5) Kelebihenndu, murahkal akapndu ngaturken kalak (medurma), janah kalak mis ka kin tek asal erbelas kam (provokatif); (6) Mbue kal rejekindu bas kalak nari rehna, (7) Banci ergaya bagelah..... uisndu pe mijile-jile, meherga, make-up labo pernah kam lupa, metunggung kal bagelah; (8) Ibas kam seh kal setiana maka perbuangendu labo kalak percemburu, (9) Gia kam agak perlente sabap ija pe lit temandu meriah (sibar teman saja); (10) Kam jelma si labo merhat i larang-larang (bebas terkendali) /perkanam-kanam. Enda nina ndube”. Nina Jekmen.

5. Tersitik-sitik. “Adi donggal-donggal sitik kin ibuatndu kerina si ntabeh aakapndu tupung kam mukul, e antusen biak sekerajangen geluhndu: (1) "Bias" cukup gia la mbue la ka kam kekurangen; (2) Kam pedas mombak ibas penami-nami teman geluhndu; (3) Gia lit rusur meser cakapndu tapi ukurndu labo bage, sabap kam labo kalak si megajang rukur tapi beluh erkata bujur; (4) Gia galang sitik perasanndu ras banci pe maun-maun melukahsa terpusuh ras pertewas endam erbahan sangkep nggeluh mbiarkal man bandu, mbiarkal kami kam sakit; (5) Gia la kam meter erdahin tapi labo ngadi-ngadi (nunut2 nina kin); (6) Labo kam pang nogan cakap temanndu gia la bagi ukurndu kal; (7) Bayak kal kam ibas erkade-kade sabap biakndu biak pertedeh.

Adi siori kerina bagi sikataken Jekmen Sinulingga e, tempa-tempa kerina biak si man e biak mehuli ras kesangapenna kerina si mulgap. E maka tentu lit kange sungkun-sungkun ibas pusuhta tah la kin lit biak si kurang tengtengna ibas si man i Lakon Mukul e?

“Kita kalak Karo, arus kap ati-ati mandangsa. La sembarangen kalak banci nehken kata. Ijeme tegun bibi nehkensa sabap adi bibina seri nge ras ia, maka la ia megelut. Si milih kabengna, umpamana,  adi sioposisiken sekali senina Ketaren Mergana, biasana: (1) Biakna ndauh perdalinna, ngikut2 pasar si nggedang ndarami beras segantang; (2) Tah rusur lawes ndoh-ndoh (erdua kudin labo mejile ras mehaga) ; bage me prediksi kalak Karo: tapi banci iban lanai lawes-lawes sabap iban dahinna si tetap si sue bagi ukurna seh maka tetap sada kudin tah pe sada rumah tanggana; isisi si deban. Ije me perluna telah-telah mama mamina ras si biak si ihamati ibas jabu e, nehken kata maka  adi enggo ikataken/isigetken man si erjabu maka ndauh pagi perdalanndu, ningen, bas pagin wari pe la ia sengget.

Tentu tulisen enda langa kuh sabap ituriken rikutken bagi litna si icakapken saja, mbera-mbera erguna man pandang-pandangen ras jadi asamta ndarami terbagesen gelah reh sertana. (BK).