AMAK DABUHEN

FIRDAUS DEPARI (SEBERAYA)

Kentisik ibas kita erpenulih nangdangi perjabun kalak Karo maka tangkas man banta kerna perjabun kalak Karo idemi alu sada iketen nangdangi piga piga  sinursur tah pe banci ikataken ia  iketen dareh.

Nina kalak si erpemeteh si kin ia ngangka kerna uga ubungen  manusia ras manusia si deban, umpamana A Van Gennep, sosiolog Prancis nina, perjabun kalak Karo erkebiaken ku dampar religius. Sue ras si ikutip Darwan Prinst SH, Perjabun si erkebiaken religius ertina emkap: perjabun la terjeng ngiket  si dua belah pihak tapi rikut ibas iketen tendi-tendi subuk si enggo mate tah igelari  tah kin ikataken nini nininta nai nari. 
Kai sini jadi tanda kerna pengertin religius tangkas teridah ibas kai kai si niibereken tah kin ia iluahken tah kin ia si ijileken ibas sada kerja tah kin, lakon perjabun. 

Ibenai ibas jaman siadi singuda-nguda banci irasiken nangdangi sekalak anak perana, bage pe sekalak anak perana irasiken ras sekalak singuda nguda, tah pe banci  ilakoken alu erpangir selamsam ibas persadan dua lau si maler, jenari ia ibere man manuk sangkepi. Seh ngayak ia enggo jumpa tuah dingen seh ngayak pepitu layauken je teridah lalap uga kita nghamati kai kai si niibahan nini nininta nai nari. 

Sitorosi ka kerna kai ertina relegius ndai emaka lit ijenda kami ercakap cakap ras urang tuanta ibas kedei kopi, Kedai Bale ikutanta Seberaya.
(Ralinggungi = Rgg; La Tersena Gelarna Karosekali = KS).

Rgg:”Ibas perjabun kalak Karo eekap kerna rudang tah igelari luah Amak Dabuhen, kai kin maksudna?” 

KS: “Iah mpal adi katakan kerna Amak Dabuhen, arus iperjelas ia maka ibas mata kerja enggo ijilekan kalimbubu, tapi bas kai si nikatakenndu ena dung kerja tah kin tupung mukul nakan sempukul, tah kin ikataken mecah mecah tinaruh, tah kin igela ri ka ia persadan pertendin maka, e maka itorosi ka ia berngi emkap man kerina sangkap nggeluh  man ka si erjabu dua na ia kundul ibas amak si iluahken kalimbubu, tah kin kalak enda ibas sada bilik.”

Rgg: “Kenca dung man i bilik lakon kai siterusna mpal? Kuja kalak enda?”

Mukul, idatas Amak Dabuhen (Foto: Darul Kamal Lingga Gayo)

KS: “Kerna penukunenndu ena, maka adi enggo elah man kalak enda itorosi anak beru pekepar. Sabap lit acara emkap nehken luah kalimbubu si ngalo bere-bere  emkap adi arah kita Urung Suka Piring enda,  adi Pitu mamana maka pitu ka mamina, pituna nehken Amak Dabuhen tah kin igelari Amak Peradaten mpal.  Gelah mejuah-juah kalak enda lalap. Ibas nehken amak peradaten  kundul sempa duana  si erjabu e maka itorosi mereken amak dabuhen tah amak cur tah amak peradadaten.”

Rgg: “Engkai maka amak ibereken mpal, amak ras bantal nge? Janah uga nge nina si ngalo bere bere nehken kata mpal?

KS: “Kerna kata teh belas belas kuan kuan kita Karo  kata emkap tambar,  kata e me kap pedah, kerna si ngalo bere bere nehken amak bantal, semal la lit mangmangna mpal. Banci ka nina si ngalo bere-bere man beberena si erbelas, banci mamina, banci ka mamana, alu nina: ”Enda baba kami amak inganndu tayang,  nakku, duana kam guna ngukuri perukuren si mehuli dingen inganndu tayang duana guna nayangken daging kulandu duana, lako ndalani kegeluhen enda nakkusehat mejuah juah kal kam duana ibas kam manteki perjabun ndu. 

Gedang lau si maler gedangen denga ate kami ibas kam manteki perjabunndu nakku, kai si nisurandu seh ibas lias ate Dibata si mada kuasa.  Ma enggo nakku...” Bage nina  si ngalo bere bere mpal.”

Rgg: “Jadi langa jelas bangku mpal,   kerna amak  bantal tah amak peradaten”

KS: “Eah...mpal, kam jukjuk kap igungndu maka kebacihen,  ngit ka kam nurat tah ngertiken peradaten mpal. Sue ras  si tersurat  majalah ndu ena. Nehken Kata Tuhu ,Alu Tengteng.

Rgg: “Saling jagar mpal langa kin ku antusi, impalku...”

                                   

KS: “Ertina  i je me ia dua rukur mpal, ibas amak e ia nehken sura kerina sangkep nggeluh  maka ije lit lalap pertalin dareh, sehat mejuah-juah nina si ngalo bere bere e me kap intina kal impal.”

Rgg: “Enggo mulai bagi lit sijelasna. Sitik mpal, kerna penjelasenndu kerna amak peradaten,  uga maka ikataken penungkunen  amak peradaten?”

KS: “Kuncina mpal, tah pengertinna amak peradaten, kai kata kalimbubu: “bagi timah sada penuangen kam duana; janah bagi gelang sada tariken kal kam duana, tuah radum ken sangap kam manteki perjabun si mbaru.” Ma enda belas belas si semal ibas kerja kita kalak Karo tah kin ia erdemu bayu, tah kin i petuturken tah kin ia muat beru si ngumban o impal ku...

Rgg: “Oo, adi bage ingan ndatken

tuah ndai pe  ras ingan nuang  pe enggo ipesikap kalimbubu emkap amak peradaten  bage ia mpal?”

KS:”Ula kel seh ku jena, mpal. Enda tandana gelah pasu pasu kalimbubu e tetap maler nangdangi anak beruna terus pe ku kempu kempuna.”

Rgg: “Tapi lit  ka kap isehken kalimbubu penukur sekin,  mpal.  Kai ubungenna ras amak peradaten enda ndai impal?”

KS: “Sada nge pengertinna, mpal,  ras amak ena ndai.  Saja sekin ras amak ma labo seri mpal?  Adi sekin gunana nektek kayu, adi lit kerja lako pegara api, amak ingan kundul tah tayang lako ngukuri kai  si perlu si man ukuren impal. Eah mpal,  langit pe  enggo erkire kire langa kurung kambingta, kerna kai ras uga kerna penukur sekin ndigan ndigan ka sirunggui ma bage mpal?”

Rgg: “Bujur kal impal kerna penuturindu”. (FD)