ALU KEREHENTA KU MUSEUM PUSAKA KARO, TANGKAS MAKA JADI ATETA BUDAYANTA

KRISWANTO GINTING, BERASTAGI

Museum Pusaka Karo enggo lit i tengah-tengah kalak  Karo, ras ringan i kota Berastagi. Gia enggo lebih setahun museum e lit, tapi enterem dengan kepe kalak Karo, si langa meteh kerna kiniliten “Gudang Sejarah ras Budaya” e.  Lokasi Museum e ringan i gedung si ndube ije Gereja Katolik Berastagi, samping Pajak Buah, ibas ingan si strategis sabap pas i tengah-tengah keteremen kota wisata Berastagi.

Kenca ibuka ibas tanggal 9 Februari 2013, ras ibas perdalinen geluhna mentasi sada tahun lebih e,  enggo seh 5499 kalak temue si reh kuje. Banci ikataken maka situhuna enggom enterem kal si reh e, ras adi situlihken suratna kepeken erbage-bage pe asalna si reh e, enretem i luar kota, i Indonesia nari, ras enterem ka pe si reh i luar negeri nari. Janah adi i siksiki terdauhen, maka teremen me si enggo reh e si sangana erlajar ras si atena ncidahken keleng atena nangdangi budaya Karo.

Ibas tahun enda, tuhu-tuhu ermengkah ateta sabap Uskup Emeritus, Mgr. Pius Datubara ras rombongan pe isempatkenna ka reh, tepatna  i pertengahan Agustus ras Uskup Agung Medan, Mgr. Anecitus Sinaga i bas pemenan September. Kerehen dua uskup e ialo-alo tim Museum Pusaka Karo ras P. Leo Joosten Ginting selaku pinpinen Lembaga Museum Pusaka Karo alu dem keriahen ukur. Sope nadingken museum, isehken uskup si dua pe tenahna, si isina gelah min si medanak tetap erkeleng ate nangdangi budaya ras alu erbage-bage cara min ncidahken kininggiten lako erperbahanen njaga ras ngembangken kebudayan si nggeluh denga. Terlebih-lebih uskup Emeritus, si sempat iserengken kami, tangkas kal maka siang ras ersinalsal kal ayona, niar-niar ras mereksa barang-barang museum, nandaken maka erburak ukurna lako njemba-njemba kita kerina gelah erkeleng ate nangdangi budayanta, bagi si ipiara i museum e.

La terlupaken pe, kerna ibas piga-piga bulan si lewat Atiqah Hasiholan singgah ku Museum Pusaka Karo. Gia tujunna si pematang reh ku Berastagi emkap lako erbahan film, tapi i tengah-tengah kesibukenna diberu meparas dingen merupa dingen si ikagumi enterem jelma e, nempatken bana reh ku Museum Pusaka Karo guna nandai ras meteh uga kin situhuna kalak Karo e. Alu bage ,banci pe alu sikap ia erlako jabat selaku “Ny. Likas Djamin Ginting’s br Tarigan” ibas FIlm “3 Nafas Likas” bagi si niaturken sutradara Rako Prijanto.

Film si ia jadi bintangna raduken ras aktor Vino G. Bastian si erlaku jabat jadi “Djamin Ginting’s” muat latar sosial-budaya Karo alu setting Tanah Karo ibas era 1930-en seh ku tahun 2000-en.

Ibas kerehenna e, tuhu la sempat kami gedang ercakap-cakap ras kemberahen Rio Dewanto enda, tapi teridah nge ia ergiah-giah ngenehen koleksi pusaka Karo janah pe nuratken piga-piga perkatan kerna penggejapen ras tenahna ibas kitap temue si lit i museum e. Si enda tentu jadi sada keriahen si la terturiken si reh idur sekalak artis si erbakat ras terkenal pentar i negerinta enda.

Ibas paksa genduari enda, i Museum Pusaka Karo enggo lit kurang lebih 300 barang pusaka subuk ibas terpuk barang pusaka pertanian, perhiasen, pertukangen, gana-gana (patung-patung). Pisau-pisau, erbage-bage uis ras si debanna.

Anem pe enggo jadi sada bagin si ikut ngerupai curak Berastagi ras ikut pe perimken gelar Taneh Karo, tapi seh asa genduari dukungen ibas pemerentah nari tergejap sukar idatken. Si enda ikataken sabap rikutken maka ibas benanana nari pe museum enda ipepantek, si natang layar-layar ras si erjabaten teridah jarang denga kal multak tah gia kentisik singgah, si erbanca kita si tersungkun banta: tah kin langa kin seh man bana berita kerna ijenda lit  erta-erta si meherga kerna kinihagan ras ketunggungen sejarah Taneh Karo.

Pernah ikataken Jhon F. Kennedy, nina “Adikin ergiah ukur pande miara ras ngasuhi urat budayanta, pelepaslah ia ngodak ngikutken erkata gendang pusuhna, si mabaisa kuja gia atena membas-embas”
Rikutken si e, maka tangkas me jadi ateta, pediatlah kami “pande” ngodakken nahe, pusuh raduken pendahin kami, miara ras njayam sejarah budaya Karo. 

(KG, Iterjemahken ku Cakap Karo: Betlehem Ketaren)