KERJA TAHUN, KAI RAS UGA?

BELEHEM KETAREN, BERASTAGI

Kesemalen (adat) si nuria e me sada kinibayaken kegeluhenta. Kesemalen  e turah dingen nggeluh mehumur i kuta sue ras biak ingan bage pe biak jelma si nggeluhkensa. Lit kesemalen si nuria si masap erkiteken itadingken perkembangen jaman, tapi lit ka si tetap nggeluh, igeluhken manusia alu isueken ras endek kegeluhen.

 Kerja Tahun e me sada kesemalen si nuria ibas kalak Karo, si tetap ertahan nggeluh seh genduari, gia ibas pendalankenna maun enggo  lain ras si mula tangtangna.

           

Kai ras uga kin kerja tahun e ibas paksa si nuria?

Ibas paksa si nuria, ras banci ikataken seh asa genduari kegeluhen kalak Karo erpalasken pendahin nuan-nuan ku juma ras ku sabah. Janah terlebih-lebih page me sinuan-sinuan si pematang ibas paksa si nuria. E maka lit pe pertoton kalak Karo si semal denga sibegi, nina: mbuah page nisuan, merih manuk niasuh, sai mara, kurumah tendi. Ije tangkas teridah maka page igeluhken kalak si nuria jadi tanda kesangapen, ketuahen ras kemalemen ate. Page e me tanda kegeluhen, maka nai galang kitikna keben ingan page jadi sukaten kiniliten.

Rikutken ras kiniteken kalak Karo si nuria, kesangapen, ketuahen ras kemalemen ate (si man perayaken nggeluh kalak Karo) banci ialoken arah pemasu-masun si erkuasa raduken ras pengayun pertendin sangkep nggeluh kerina. Page si jadi tanda kegeluhen e itotoken janah ipepulung janah itenahken pe sangkep nggeluh gelah ras-ras man entabeh alu arapen, ngayu pe pertendinna kerina gelah mbuah page tahun enda. Kepulungen sangkep nggeluh e ibas tep-tep kuta, raduken ras keriahen si ilakoken singuda-nguda anak perana bage pe si medanak si igelari guro-guro aron si ilakoken tep-tep tahunna, e me kerja tahun.

Kerja tahun e, sue ras antusenna e, lit piga-piga erbage rikutken ras pendalanken ibas pelain-lain kuta bage pe urungna, bagenda:

           

1.        Merdang Merdem. Rikut ras gelarna, merdang e me kap dahin ibenaken alu ngerabi, nikapken ingan nuan, nemai ras nuan. Kerja tahun ngikutken paksa merdang idalanken i Tigabinanga ras sekelewetna bage pe Munte ras sekelewetna;

2.        Nimpa Bunga Benih (Ngambur-ngamburi). Kerja tahun ibahan tupung page paksa erlayuk (ersusun kulpah) tah pe tupung umur page kurang lebih dua bulan. Si e ialakoken i taneh Sepulu Dua Kuta bage pe i Simpang Empat ras sekelewetna;

3.        Mahpah. Kerja tahun ilakoken lako ngenanami buah page si nangdangi rani (mulai kenca megersing). Kerja tahun si rikutken mahpah ilakoken i Barusjahe, Tiga Panah ras sekelewetna;

4.        Ngerires. Kerja tahun ilakoken kenca dung peranin guna erkata bujur ibas ulih peranin e. Kerja tahun rikutken ngerires ilakoken i Batu Karang ras kuta-kuta i sekelewetna.

Adi nai, rikutken ras kiniteken si pemena, pertoton tah pe bilang-bilang kerja tahun itujuken terutama man si Beru Dayang. Beru Dayang (bandingken ras Dewi Sri i Jawa tah pe Dewi Maia i Junani) e me si mada kerina bertin (maharahim) janah si mere pasu-pasu guna kerina kinihumuren, subuk gelah taneh mehumur gelah mbuah page, bertin diberu “mehumur” gelah ertuah bayak bage pe bertin asuh-asuhen ras rubia-rubia ras binurung mehumur gelah merih kerinana.

“Biasana belo icibalken rikutken ras pengala erbilang: “Mbuah ko page tahun enda, mbuah ko page. Merih ko masuk niasuh, sai mara, ku rumah ko tendi” ku Deleng Sibuaten. Kenca bage, bagi sinikataken nande aron, merkat me aron ngambur-ngamburi pulungen bulung simalem-malem ras kersik, mulai i pusung juma jenari ku tep-tep suki juma”, nina S. Ketaren (Bp. Agen), sekalak tua-tua rikutken ras pengingetna uga lakon Ngambur-ngamburi ilakoken tupung kerja tahun i kuta Raya.

“Engkai maka ku Deleng Sibuaten?”, ningku nungkun. “Bage ka nina tua-tua, tentu bage ka iikutken. Banci jadi ije me niakap si Beru Dayang ringan tah pe maun ban gelar deleng e sentudu ras biak kehumuren. Ma kin arah sibuaten (perjabun) maka lit kinimerihen?”, nina Bp. Agen erjabap.

Bagi paksa-paksa kerja tahun si pelain-lain e, torosen ras perkakas perlengkapen si nibaba ku juma mungkin pelain-lain. Anem bage, torosen kerja tahun si kuhna si semal denga iinget asa genduari, e me kap:

-          Wari si pemena: Cikur-kur. E me wari persikapen merdang merdem alu ngkurkuri taneh lako ndarami kalimpenek, kidu, ridap tah pe kerina si biak pangan si nggeluh i taneh guna jadi adum nakan pangan pemenan kerja tahun;

-          Wari si peduaken: Cikurung. Nerusken kai si idalanken ibas wari si pemena, idarami me kurung i reba, i juma tah pe i sabah guna ijadiken adum nakan pangan ibas nerusken persikapen kerja tahun;

-          Wari si peteluken: durung. E me wari persikapen kerja tahun si peteluwariken, si ilakoken arah mburtas sabah tah pe ngkerahi lau anak guna muat nurung emas, sibakut, itik, kaperas, gayo tah pe belut lako jadi adum nakan pangan;

-          Wari si peempatken: Mantem. E me lakon nangdangi tampuk kerja tahun si idalanken alu motong lembu, kerbo, babi jadi pangan tupung mantem bage pe ibas mata kerja tahun;

-          Wari si pelimaken: Mata Kerja Tahun. E me wari si mbelin ngerayaken kerja tahun. Ibenaken alu naruhken pangan si enggo tasak tah pe page mbaru  ku rumah kalimbubu ras nimai kade-kade ras temue si reh ku kumah. Kerina rumah talang ras pantang itutup. Tep-tep rumah itingkah, peraturenna arus man. Gelah reh riahna kuta e, biasana ibahan pe gendang guro-guro aron i jambur, e me ingan singuda-nguda ras anak perana ncidahken dirina ras sura-surana arah ercakap-cakap sapih-sapih ia, landek ras impalna, bage pe arah pengarak-ngarak si medanak erlajar me ia kerina kerna kesemalen-kesemalen adat;

-          Wari si peenemken: Nimpa. Gia melala erbagena cimpa, cimpa kerja tahun biasana e me kap cimpa unung-unung  e me cimpa si iban ibas tepung pulut ras tepung beras biasa si risiken gula merah ras tualah ibaluti alu bulung singkut. Cimpa banci ipan sope man tah pe kenca man bage pe biasa ka jadi luah mulih kerja tahun. Enngo ndekah jadi ibas melala kuta, lakon nimpa ipersada ras lakon mata kerja tahun;

-          Wari si pepituken: Rebu. E me tutup kerja tahun. Tupung temue enggo mulih ku kutana sekalak-sekalak si tading i kuta si erkerja tahun la banci kujuma tah pe ku sabah.Tep-tep ibas jabu pulung me orangtua ras anak-anakna guna pekesahken bage pe lako pepanken ku ukur ras pusuh kerna kerina si enggo inanami ibas segedang-gedang wari perayan kerja tahun. Rebu ertina la banci singerana-ngerana janah mereken kesempaten man rubia-rubia ras kerina si nasa lit pesikap bana kerina (pediat alam mengharmoniskan dirinya)

Kerja Tahun si genduari

Gia enggo melala perubahen-perubahen, seh asa genduari kerja tahun tetap denga idalanken. Merari genduari kerja tahun ilakoken ibas dua wari: Motong ras Matana. Bage me gendang guro-guro aron semal denga ibahan sada berngi sada wari, mulai ibas berngi motong seh ku mata kerja tahun.

Gendang Guro-guro Aron Kerja Tahun Juhar 2014
(Foto Yos Laurensius Sembiring Meliala fb)

Adi semalna kerja tahun nai ibahan serentah ibas sada urung rah pe rarasen-rarasen kuta janah mata kerja tahun biasana rembang bas wari Cukera Dudu, genduari enda ibas bulan-bulan rikutken kesemalen siadi, wari-warina pelain tep-tep kuta sue ras perarihen ras perkolong-kolong tah pe kesadan arih ibas Karang Taruna ibas kuta.

I kuta-kuta si ndeher ku tiga, maun-maun lanai lit lakon motong bas wari mantem, tapi keperlun-keperlun itukur i tiga. Tep-tep rumah tetap  talang tupung mata kerja tahun, si mada jabu ertima temue, tapi jarang ertenah maka mungkin pe jadi nimai si la mungkin reh.

Lanai lit lakon ngambur-ngamburi tah pe lakon ngamati Beru Dayang sabap nina maka kita kerina enggo ragama. E maka kai antusen kin kerja tahun genduari enda? Sungkun cuba anak-anakta. Ula heran adi nina erjabap hiburen ras man gratis! Adi bage ikatakenna maka melala kepe enggo bene kai si meherga si ndube siajarken nini-nininta. Terlebih-lebih ibas kai ndai si ituriken idatas kerna antusen kerja tahun eme: ertoto, man ras-ras sangkep nggeluh bage pe keriahen si medanak ras singuda-nguda anak perana.

E maka seakatan erbahan gendang guro-guro aron, seh kal nge ulina adi kerja tahun iisi alu festifal budaya seumpama lomba tari Lima Serangke bagi si ilakoken bas tahun 2014 enda i kuta Sukadame, runggu pesikap kuta kemulihen rasken ras lakon-lakon agama seumpama missa ngataken bujur man Dibata ras lakon-lakon si mehuli si debanna.

(Isuratken alu bahan-bahan si ibuat arah erbage-bage sumbul).

PURPUR SAGE

FIRDAUS DEPARI, SEBERAYA

Purpur sage turah perban lit perjentiken i tengah-itengah jelma tah pe manusia si ringan ibas sada kuta, sada kesain, sada pendahin tah kin ia  kin sibalengen juma, dingen banci ras manusia si debanen. Janah banci jadi ibas sada jabu si kin ia ersenina tah kin ia si sada  tuka nina si nuria. Nina  kalak si erpemeteh tah kin igelari Sosiolog, JamesW.Vander  Zanden, perjentiken tah pe perubaten emkap sada persoalen  kerna nilai tah pe si lit ergana nangdangi  hak ibas kinibayaken, tah pe erta kegeluhen, kinikuasaan, kiniliten, tah ingan tading si kin tujunna guna peseri, si ngerugiken tah kin atena meneken imbang imbangna. Persoalen tah  perjentiken turah  na ibas ukur manusia nari cara rukur manusia si erbahansa maka manusia menukah kal erbahan perbahanen si la sentudu ras manusia sideban.

Perjentiken tah persoalen kerna baleng juma jine, si idah lit jelma seh ngayak nangdangi si takilen, kerna taneh si Adam tah pe tading tadingen ngayak seh perpadanenna njumpai Dibata la ia sitabehen ras seninana si sada tuka, banci jadi persoalen si kitik kal bas adat banci jadi galang, kerna tukur tah ulu emas  la seh bana. banci jadi kite-kite ku persoalen si la erkedungen. Perubaten banci terjeng cakap  saja ngenca, tapi perubaten cakap banci nurahken perbahanen alu makeken  ring-ring dagingta end,a tah si tinjun ia  perban miser baleng jumanta, aguina batang sangke sempilek, tsh tabahna batang kalingjuhang si kin  jadi baleng jumanta ras jumana, maka kerna si enda lit ibas kita kalak Karo si igelari: Purpur Sage.

Purpur Sage, Lakon pedameken mulihi.

(Foto: Karo Siadi Blogspt.com)

Purpur Sage e me kap sada lakon si lit ibas kita kalak Karo, si la banci pulah ibas rakut si telu enda, enggo dahin anak beru pekepar gelah kalimbubuna pekepar si enggo rubati seh ku si la mehuli emkap si tinjun, si maun erkiteken si e engo mbar beritana ku sebelang kuta tah kimaun erjengil kerna baleng juma, si seh ku cuping anak beru pekepar. E maka, arih me anak beru pekepar, ncakapken ndigan warina ndahi kalimbubuna e erbahan lakon perdamen. Ibas sue arih maka  kalimbubu  irunggui, gelah kalak enda sada jabu, ras jabu si sada nari  ipersada me duana.

Nina si nuria, jabu si rubati ibahan cibalna siala-alan,  sada  ngala ku matawari pultak, sada nari ngala ku matawari ben. E maka anak beru pekepar pe siala alan, sada terpuk ngala ku kenjulu, sada terpuk nari ngala ku kenjahe. Rikutken biak senina singaloi cakap anak beru e pe,  sempa ras seninana bage pe biak senina  si sada nari sempa ka ia ras biak seninana, rikut bage pe piga-piga   kalimbubu  pekepar kundul arah kemuhen anak beruna. Ras ikut pe pengulu kuta lako si jadi saksi ibas lakon perdamen enda.

Nai sope lit jambur, nina si nuria, anak beru pekepar pesikap lape-lape emkap bulung pola, guna lape lape ibas lakon ngerunggui kalimbubuna. Kerna perpan pe enggo ipesikap anak beru pekepar rikut anak beru menteri pekepar  ras anak beru singukuri pe, ikut pesikap kerina lakon tah acaa perdamein enda.

E maka adi enggo pulung kerina sangkep nggeluh, anak beru pekepar  menaken percakapen. Nina me anak beru si kenjahe:

“Eah senina,  uga kin akap ndu kerna perjumpanta, ma enggo banci sibenai perarihenta e genduari?

Erjabap ka me anak beru si kenjulu, alu nina:

“Ue.., uga kin senina kerna perbekalenta kerina, enggo me sikap ibas kita? Pepurpurken janah Nge Sageiken kerina si la sentudu ibas kegeluhenta, janah si la mehuli sue ras peradatenta,  terlebih lebih nangdangi jabu kalimbubunta ras puang kalimbubunta, bage pe puang nu puangta.”

Nina ka anak beru si kenjahe erbelas, nina:

“Ue..kerina si e enggo sikap senina, terlebih lebih kerna perarihenta kerna dalinta pulung enda, ma enggo sipesikap rikutken pengulu kutata.  Kerna kinibayaken kalimbubunta pe enggo sipepinter, janah enggo erpengue pe kalimbubunta pekepar. E maka kai nari kin akapndu si man cakapenta genduari, senina?”

E maka nina ka anak beru si kenjahe, erjabap:

“eah.., bagenda senina, idahdu bas nangkih nangkih matawari enda, sidungi sitik nari kal kerna sura suranta, guna narsarken rimah-rimah, gelah kerina tendi-tendi si enggo  leben ngadap man Dibata Simada Tinuang, natap itaneh kemulihen nar,i banci mereken ketenengen janah masu-masu, gelah kita mejuah-juah  kerina. Enda erbicara-bicara kami senina, siaturken lebe kalimbubunta pekepar gelah  situnggah-tunggahen lau meciho tah lau pancur si erpagi-pagi lampas, si nibuat kita sope tekuak manuk peduakaliken, jenari sibere man ka kalimbubunta i bas sada pinggan perpanganen, si nigelari manuk teratur,  uga akap ndu? Ban arihndu ras temanndu sendalanen?”

Nina ka  Anak beru si kenjulu, erjabap:

“Ue, enggo merandal senina. E kingia ma je ndai, puang kalimbubunta?  Cuba orati tah kin lit sura-surana nabei anak beruna, emkap kalimbubunta. Kam si ngoratisa tah kin aku senina?”

Nina ka anak beru si kenjahe:

“Seri kap kita jine senina. Kam saja!”

E maka erbelas anak beru si kenjulu alu sora si tangkas terang, nina:

“Sentabi dingen mehamat man bandu kerina si tergelar puang kalimbubu ras puang nu puang kami. Ibas lakon kita purpur sage enda, nina kami anak beru menterindu, uga kin kerna sura surandu reh nina anak berundu, cuba orati kalimbubu kami emkap puangndu, kai nari kin akap ndu si kurang, sope anak berundu duana situnggah-tunggahen lau meciho, ras jenari kari iumputi alu man ibas sada pinggan perpanganen. Cuba ban arihndu kam puang kami ras temandu sendalanen.”

Erjabap puang kalimbubu, alu nina:

“Ertima kam kentisik.” E maka putarna pengalana kempak sembuyakna, janah erbelas: “Eah nake, enda reh sungkun sungkun anak beruntanta erkelang-kelangken anak beru menterinta.  Kai sura-surandu nina, ibas kita pepurpur sageiken enda?” “Bagenda nindu tare anak beru menterinta, sope  anak beru kami man janah minem, ibereken kami tah isehken kami luah kami kain panjang, janah ijujungi kami beras piher anak beru kami, uga akap ndu?”

Ialoi anak beru si kenjulu me ranan puang kalimbubuna e, alu nina:

“Ue... enggo merandal, lang pe pasu-pasu kalimbubu e, merhat kap kita ngalokenca. Bujur puang kami, katandu e me ipeseh kami man kalimbubu kami...”

Perdamen me kite ku kesangapen, ketuahen ras kemalemen. (Foto: Karo Siadi Blogspot. com)

Nina anak beru si kenjulu ka nerusken cakap e, bagenda:

“Eah senina, enggo kuorati puang kalimbubu pekepar, maka reh nina, ijujungina me atena beras piher jenari, jenari kari maka itunggahina lau meciho. E maka sibere man pe kalimbubunta, bage me nina puang. E maka cuba orati kalimbubunta senina!”

Erjabap me anak beru si kenjahe, alu nina:

“Ertima kam kentisik.” Jenari isambungna cakap e ku kalimbubuna, alu nina: “Bagenda mpal... enggo orati kami puang kalimbubu kalimbundu, nina ibas lakon enda,si pemena kari ijujungi beras piher kam kalimbubu kami pe kepar, e maka situnggah-tunggahen lau meciho, jenari man kita. Uga akapndu impal? Ban arihndu ras temanndu sendalanen,

Erjabap kalimbubu e, alu nina:

“Ertima kam kentisik mpal.” Jenari isambumbungna cakap e man temanna, alu nina: “Eah nake, enda kap nina kalimbubunta erkelangkelangken anak berunta. Enggo sikap siakap?

Jenari ipesehna arihna ras temanna e mulihken, alu nina:

“Enggo merandal impal.”

Iterusken anak beru si kenjahe cakap, alu nina:

“E gia, ma enggo oratindu turangku ah kerina, ula kari pasangkenndu saja kerina?

ErjabapkKalimbubu e, alu nina:

“Sada arih kami kerina kalimbubundu!”

Nina ka anak beru si kenjahe:

“Eah senina, enggo ku nungnungngi kalimbubunta pekepar, idahndu wari pe nangdangi  ciger  me enda. Matawari enggo pas ibabo takalta.  Maka sibenai acaranta.”  Jenari nina ka: “Man bandu kalimbubu kami, putar pengalandu ku matawari ben, man bandu puang nu puang ersikap kam gelah isehkenndu sura  surandu nangdangi kalimbubu kami.”

Nina uang kalimbubu:

“Cabini kami kam alu kain pajang, gedang lau si maler gedangen denga keleng atekami man bandu. Jujungi kami kam beras piher piher. Piher pe batu i lau anakku, piheren pertendinndu lako ndalani kegeluhen enda, iteruh lias ras perkuah ate Dibata.”

Iterusken kalimbubu si kenjahe lakon e, alu nina:

“Kutunggahi kam alu lau meciho senina, gelah meciho perukurenta duana jenda nari  seh rasa lalap, la melus bulung bulung ikerangen senina, mejuah juah kita kerina!”

Nina ka kalimbubu si kenjulu:

“Kutunggahi pe kam alu lau meciho senina, gelah meciho perukurenta duana jenda nari  seh rasa lalap. La megembur lau sumbul senina si inem kita duana senina, gelah kita tetap dat kejuah-juahen, sue ras si nisaksiken kerina biak seninanta, kalimbubunta, puang kalimbubunta, janah anak berunta pe enggo latih lako jadi benang penjarumi ku tengah tengah jabunta, si kin lalap nuppak-numpak kita dingen la erlatih latih guna ngerunggui kita!”

E maka nina biak  senina:

“Bagem senina, iarapken kami kerina teman seninandu, maka jenda nari kupudi sada arihta kerina erbena ibas wari enda dingen seh pe ku wari-wari si rehna. E maka  isageiken kerina  gelah kita mejuah juah!”

Iterusken anak beru i kenjulu ka lakon e, alu nina:

“Ibas dungna kam nehken kata ras pasu-pasu man kalimbubu kami, emkap anak berundu ,e maka man bandu puang kalimbubu  pekepar  rikut puang nu puang,seh paksa kam nehken pangan si tergelar manuk teratur. Man bandu kalimbubu kami duana sempa dage kam!”

Puang kalimbubu sempa ka duana nehken pangan man anak beruna, alu erbelas ia, nina:

“Enda anakku kam duana,  bereken kami panganndu si nitergelar manuk teratur, gelah janda nari ku pudi teratur kerina kerna perdalanen kegeluhendu, sada perpanganen kam duana anakku, pankendu gelah nurahken gegeh si mbaru guna sikeleng-kelengen  iteruh lias perkuah ate Dibata si njadiken kerina si nasa lit. Bagem nakku man kam kerina!:

Nina anak beru menteri, reh erbelas:

“Uga kin silih, ma enggo banci kita man kerina?  Adi  puang kalimbubu kami pe pas sangana  man. Enggo sikap ibahan kami anak beru menteri ras anak beru si ngukurindu kerina kerna perbekalenta.”

Erjabap anak beru si kenjahe bage pe anak beru si kenjulu, nina:

“E, ggo silih aturken kerna perpanta kerina!”

E maka nina anak beru singukuri:

“Gia ndai langa ibenai ibas toto, labo dalih e maka ija seh perpanganen kulebe lebenta  siban kari  pertoton...” (Ras seterusna man me ia kerina alu dem keriahen ukur).

Enda  me sitik kerna uga perdalinen purpur sage, si kin cakap Karona, reh ibas kata “Purpur”: ibersihken, ipedarat, isapui; ras Sageiken: iderakken, ipebelang, ierapken. (Kalak ngangin page tare sumpit tama kutakal ndilo angin alu, nina: “Pur...pur..pur...”,tan si kawes njemak sumpit tan si kemuhen  nageiken page alu nggerekken jari-jari tan si lima  gelah sirang page ras lapungn iembus angin) Sabap la pung emkap si la mehuli  tadingme  ijuma , page  si mburnis  baba kurumah tamaken ku keben. (FD)