“BAGI PERBUNGA NDAPDAP”

Kentisik  kita erpenuilih nangdangi sada ende enden ibas kegeluhen jaman si noria sibaba ku jaman si gundari. Kegeluhen manusia banci iandingken kubas uga kerna sada ende enden siendeken manusia ibas ia ndalani kegeluhenna segedang gedanga wari, kerna ende enden banci saja ia nuriken kerna ceda ate kerna ukur meriah kerna turi turin atengena tah kin ende enden e mbaba sada ajar tah kin ia sada rupa pedah sini arus inget manusia bas geluhna gedang gedang nuari.si urri kerna perkataan  bagi perbunga sauh,tah bagi per bunga ndap dap, bagi pertiga tiga tiga manuk Dokan,kata enda iandingken man sekalak manusia gelah banci nggeluh mehuli rikutken adat kegeluhen bas doni. Sioge kentisik kerna ende enden perbunga ndap ndap..nina bagenda.

"Lit kuidah jelma turang bagi perbunga ndapdap

Mejile tuhu rupana payo nge terjeng nitatap

Tapi perukurenna paskal bagi Kapkap

Adi la muji ken bana sitik pe la akapna terakap."

Suai ras lagu sienda enggo pasti siakap lagu enda ia kata la tengteng engkai maka bage perbahan kata tah isi lagu enda la tengteng alu ukur manusia sabab labo lit manusia rukur bagi kap kap. Kata tah isi lagu enda tah ende enden enda situhuna kal nuruh tah ngajuk manusia gelah ula rukur man dirina saja.Tuhu kata enda tapi la tengteng ikataken man manusia amin na gia teh lit perbahanen tah pendalan ken kegeluhen sue ras lagu enda tah maun maun la niarap

Kerna  kata tuhu ras kata tengteng kerna sada ayat ende enden enda, mabai kita ku perdalanen kegeluhen si sentudu ras jelma si enterem kerna lit pedah tah ajar tua tua si noria nina: "Ula belasken kata la tuhu, tapi turikenlah kata tengteng." E maka sinenka kerna ende enden emkap nina. Tah kin kata enda kata tuhu teh kata tengteng nina,

"Adi rubat kita ras turang,em tandana pemeteh kurang

Adi rubat kita ras teman senina,em tandana la meteh ngena

Adi rubat kita ras teman meriah ,rahasia murah teridah

Adi rubat kita ras anak kuta,em tandana kita metuda"

Adi rubat ras nande bapa,kebilangen kita man Dibata.emaka erlajar ka kita nangdangi perkatan tah ende enden si lit tersena enda kerna sienda mulihi ka kita isungkun? Kata tuhu tah kata tengteng? ngataken kata tuhu banci mberat siakap ngatakenca  dingen kata tengteng pe latih ka nge siakap mbelaskenca engkai maka bage?

Banci lit kejadin lit perubaten ibas sada kuta banci la  tengteng sikataken ia kin si metuda maka terjadi sada perubaten. Tapi ibabo sienda maka selaku kalak si nggeluh ibas peradaten kerna ende enden enda sada pengajuk teh kata persuruhen man manusia gelah ula lit perubaten tengteng kal kerna perkatan lagu tah kin ende enden enda jadi inget inget tenta si nggeluh bas peradaten ibabo pertibi enda. Maka arus sipatriken bas pusuh ta kerna lagu enda ia sada hukum kegeluhen banci tuhu ras banci tengteng sini ilakokeken bas kegeluhenta. Erteman senina maka arus meteh ngena, selaku anak kuta arus kita la banci metuda terlebih lebih uga kita selaku  manusia singgeluh ernande bapa arus mehamat, nghamati, ngergaken dingen la kita rubat ras nande bapanta si pe belin belin kita  gelah kita la kebilangen man Dibata.

Sue ras tahun liturgi kita arus nggit naksiken kerna kata tengteng ras naksiken kata tuhu erpalasken kata Dibata uga kita erturang, uga kita ersenina, uga kita ras teman meriah tah teman sada kuta, dingen uga kita er nande ras erbapa. E maka selaku kita kalak katolik ras kita nggeluhken kegeluhenta arus sentudu ras kai sini ajarken Tuhan ta Yesus Kristus ija ia nggit peteruk bana guna jelma si enterem ia nggit nehken kata tuhu ras tengteng manjelma si enterem. Melala ende enden mereken pengajaren si mehuli man banta perban  ia isuratken emaka i endeken ngatakenca.lanai bo langlang latih na nehken kata tuhu amin gia kari ia tengteng man kegeluhen manusia. Neh ken kata tuhu banci turah perjengilen man manusia si deban  sebap tuhu tapi la teng teng man temanta manusia. Aminna gia ia ende enden banci la sikap akak kalak ngendekenca perban tuhuna kai isi si kataken ende enden e. Tapi selaku kalak Katolik Karo kita nggit nehken kata  tuhu alu tengteng erpalasken kata Dibata lako pebelangken kinirajaan Dibata ibabo doni enda tah kin maun maun ibas perdalanen kegeluhen kita la ngelawan pusuhta sebap sepatutna kita ngataken kata tuhu tapi mbiar kita ceda maka kita mbelasken kata tengteng. Tapi situhuna kal kata tuhu e rehna ibas Dibata nari e maka kata tengteng e lit ibas manusia. E maka kai nina pedah nini nininta sinuria, madin kita nggeluh  bagi surat ukat rendi enta, belinen kal untungna siapul apulen asangken si juru jurun amin na bage gia kerna tempas ras lagu langkah manusia gelah ula rubati e maka kataken kata tuhu alu melasken kata tengteng. Mekatep kal manusia pe ianding ken ku rubia rubia e lit ia ibas ende enden tah andinging andingen tapi la banci ikataken kempak sekalak manusia. 

Sekali nari ula kita bagi perbunga ndapdap. Ipujiken maka siakap sikap tapi kai nina kuan kuan siadi, ula kita pejenggi jenggiken kalaklah min mujikenca gelah kata tuhu e banci si aloken bas pusuh ta dingen kata tengteng e banci sidalanken sue ras peradaten kegeluhen kita selaku kalak Katolik Karo si erkiniteken kempak Dibata sineppa kerina si nasa lit bas pertibi tembe lako ndatken kemalemen ate si reh na ibas Dibata ..ralinggungi@y bpfilobarnes.co

TURANG, RUDANG TENGAH JABU

Dokumentasi Peresmin Museum Pusaka Karo/Amry SP

 (Isuratken DINAMIS BANGUN)

Adi rubat ras teman meriah, rahasia murah terindah, rubat ras nande bapa kebilangen man Dibata. Rubat ras erturang eme, tanda pemeteh kurang. 

Kai sebab maka rubat Erturang ? Enda melala sebab-sebabna, umpamana:

1.    Pembagian warisen ibas orang tua erkiteken la dianggap sepadan;

2.    Erkiteken, kerina barang/warisan ikuasai anak dilaki;

3.    La siangkan ibas pusuh;

4.    Erkiteken tadingen orang tua keri erkiteken sakit. Tinadingen pe enggo keri idayaken, talu erdadu ku perjudin;

5.    La lit Harta/Sen man gelemen enggalari utang penurun orang tua;

E maka Dilaki ras Diberu (Erturang) lanai siangkan. Ibas jabu (suku) Karo la lit “TURANG” cengkal ras niakap lit si kurang ras la kuh. Maka ibas suku Karo bas lakon perjabun, subuk Kalimbubu; Senina/Sukut bage pe Anak Beru, nehken telah-telah man penganten, nina: "Sangap kam enjabuken bana, jumpa matawari, jumpa bulan kam."

Antusen jumpa matawari, gelah pengantin mupus anak dilaki, gelah lit si nangkih mayang. Jumpa bulan antusena gelah pengantin mupus anak diberu, gelah lit si nutu cimpa. Jadi Rudang i tengan Jabu, erkiteken lit turang Singuda-nguda iempoi Anak Perana, si biak impalna tah pe la lit alangenna empo.  Si sereh umpamana Beru perangin-angin Bangun si empo merga Ginting arah turangna. Erkiteken perjabunna e reh me "Silih" erkiteken diri (Perangin Bangun) iempoi merga Ginting. Enggo lit ka  “Kela” bas orang tua si sereh. 

“Erturangku” jadi erkiteken: contohna aku merga Perangin-angin Bangun ku empoi Br sinulingga jadi ndeharaku. Ndehara lit turangna dilaki, enggo ka erjabu emaka ndehara silih, rebu. Erturangku: ibas kalak Karo lit sumbangan si 9 (siwah) :

1.    Sumbang ngerana erturangku

2.   Sumbang pengenin:jumpa idalin ras turangku, labo derek pengenin jurgak, tungkuk, mehamat, memahat penatap;

      3. Sumbang perkundul, labo derek kundul deher turangku aminna gia i bas kerja-kerja.

      4.  Sumbang perdalin, labo derek siaran-aranken erdalan ras turangkunta.

     5.  Sumbang peridin, enda biasanya terjadi ibas kuta-kuta, ridi kutapin adi kalimbubu, i kamar mandi denga harus timai seh ia enggo dung ridi.

6.   Sumbang perjabun, labo derek kalak erdemu seri merga si empo ras merga orang tua (bapa) si sereh jadi beru man si sereh kecuali si enggo iaturken ibas adat Karo la sumbang erdemu.

 7. Sumbang pergeluh, antusenna ranan meganjang kai pe tempa la kurang tapi kai-kai keperluanta man bana labo     lit   kai pe, tulpak tendel nge lalap, adi kita gerah.

8.    Sumbang/pertingkah, entah jumpa dalin kita, kutampin ridi enggo, siidah rebunta ilau, muatna mulih jumpa dalin sitik pela, kita nilah, gelah deges turangku ah kari, lah gia terakapnge ateta, enda enggo ikataken sumbang pertingkah.

9.    Sumbang pemake. Sumbang Pemake pakenta mejile, kuja pa pe adi lit kerja-kerja erdasi, double dress, sepatu erkilat tapi sekali reh temue erberngi janah man medem i rumah, enggo ndarami beras, singkihen ras selimut. Cabin man tamu e, ndarami pinjamen selimut ku tetangga, man cabin tamu e.

     

     Sada bagin palas jabu palasna e me   erturang, turang jadi rudang i tengah jabu. Ibas turangta nari reh me  Anak Beru (silih) erkiteken rudang jabu e (turang) sereh man kalak, (merga si deban). 

    Guna Anak Beru ibas lakon kalak Karo subuk kerja nereh empo mengket rumah, acara nurun-nurun ntah pendungi adat ibas kalak metua  perlu kal.

Adi la lit anak beru, kerja e pasti serbut labo erdalan mehuli. Sabap labo lit kalak ngelai ibas man ciger bage pe si erdakan nakan man pengukati.

Anak dilaki ibas keluarga igelari si nangkih mayang. Si nangkih mayang lit impalna si dengkeh ibas lagu, turang besan. Ise kin turang besan e? Engkai ikataken turang besan?. Jaman nuria kalak Karo lebih cenderungin gami, erjabu ras impal entah pe ikataken Beru Puhun. “E maka ibas undangen si kiremken ku kade-kade/keluarga si ndauh si ndiher itulis “Kerja Erdemu Bayu” turang besan seri nge ikataken impal.

Erjabu ras impal em sura-sura orang tua (nande-bapa) ras kalimbubu.  Si nipupus turang nande ikataken permen nande. Adi permen enggo iempoi anak (pupusna) salih gelar jadi “Permain” permain nina bengkila, (ajinta ku) nina permain man adi lit kalak nungkun, erkiteken la itandai kalak ise si mupus perbulangenna.

Anak Beru.

     Anak beru banci i bagi, e me kap :

1.    Anak Beru Angkip.

Anak beru angkip / ampu, e me kap ikataken kela, e me kap perbulangen ibas anak diberu si ipupusna si mbaru denga/pemena erjabu.

2.    Anak Beru Cekuh  Baka.

Anak Beru Cekuh Baka, si enggo erjabu ras keluarga tertentu dua kali terus menerus contohna:  Anak Beru Dareh ipupus ngempoi impal, emaka ia jadi Anak Beru Cekuh Baka. Tugas Anak Beru Cekuh Baka ngelai surat undangen man kalimbubu, si mada ose. Adi kalimbubu si mada ose enggo reh mbaba ose, enca si man osen la reh, Anak Beru Cekuh baka e kena sanksi, ikataken nabei, disamping si e tugas Anak Beru Cekuh Baka nikapken nakan Baluten. Nakan khusus sukut, Anak Beru, Kalimbubu Singalo Bere-Bere, Puang Kalimbubu Singalo Perkempun, Singalo Perbibin, Sipemeren, Siparibanen.

3.    Anak Beru Cekuh Baka Tutup.

Anak Beru Cekuh Baka Tutup, e me kap kalak ntah sada merga tertentu si enggo telu kali erturut-turut ngempoi diberu (beru) ibas keluarga ntah merga tertentu, Anak Beru Cekuh Baka ngempoi impalna, emaka enggo ikataken jadi Anak Beru Cekuh Baka Tutup. Anak beru enda ngeteh kinibayaken kalimbubuna berhak ia ngeteh kerina erta tinadingen kalimbubu e.

4.    Anak Beru Tua Jabu.

Anak Beru Tua Jabu, e me kap keluarga tertentu enggo empat kali erturut-turut ngempoi diberu (beru) ibas keluarga tertentu.

5.    Anak Beru Tua Kesain.

Anak Beru Kesain, e me kap Anak Beru ikut mantek kesain tertentu.

6.    Anak Beru Tua Kuta.

Anak Beru Kuta, e me kap anak beru ikut manteki kuta.

7.    Anak Beru Erkelang /erperan-tara. Anak Beru Erkelang la langsung ngerana (berhubungen) ku sukut.

8.    Anak Beru Sepemeren.

Anak Beru Sepemeren e me kap Anak beru ibas senina sepemerenta.

9.    Anak Beru Menteri.

Anak Beru Menteri e me kap anak beru ibas anak beru.  Adi ibas lakon nereh empo ia ngalo utang adat, si majek lape-lape adi upacara kematen. Ia ngalo maneh-maneh/morah-morah/sapu iluh e me kap piso/rawit entah pe pungga adi si metua/mate, e diberu ia ngaloken tok-tok, penutuk belo.

10. Anak Beru Ngikuri.

Anak Beru Ngikuri, e me kap Anak Beru ibas Anak Beru Menteri.

11. Anak Beru Singikut.

Anak Beru Sinigkut, e me kap Anak Beru ibas Anak Beru Ngikuri.

Anak Beru Pengapit Anak Beru Pengapit e me kap Anak beru ibasi (dari) Anak Beru Ngikuti.

LAKON MENGKET RUMAH

ENGHAMATI KALIMBUBU SI MAJEK DALIKAN

Isuratken: Bp. Filo Barnes Depari

Sinen arah kitab tah pe buku kalak, sierpemeteh kerna kebudayaan tah peradaten nggeluh nina, Leslie White(William A Hariland 1988:339): “uga maka jelma  tah  manusia  menai  kegeluhenna makeken  tanda tanda sijadi sada iketen tah rakuten, kiniraturen nggeluh ibas sada persadan ibas peradaten, e maka lit sada tanda man banta ibas kita ngeluh ngikuti  peradaten kegeluhen.”

Nina Stanley Salthe, “bahasa, tah pe cakap, ranan, pertuturen, enda enggo  jadi sada palas tah pe dasar uga manusia enda  ngelakoken peradaten ibas kegeluhen.” Arah uga jelma tah manusia makeken percakapen, orat tutur maka alu bage peradaten e banci iterus ken man anak anak ta bas kegeluhen gelah lit lalap kiniraturen nggeluh.

       Mengket rumah, enda sada kata tah pe lambang ibas kita kalak Karo, enda sada kerja simeriah ukur ibas peradaten kita  si nggeluh erpalasken peradaten. Mengket rumah nina si nuria sada tanda enggo seh toto ras pasu pasu piga piga dalanen ibas gelar kalimbubu, sembuyak seh ku biak senina bage pe anak beru.

        Tapi ibas kita kalak Karo, sekali ngenca lakon mengket rumah, ilakoken,  amin bage gia rose lengkap kita banci dua kali: sekali bas manteki perjabun si mbaru sekali nari mengketi rumah ni mbaru. Mengket rumah semal kal i pekimbang lambe je pe enggo teridah sada lambang man kita kalak Karo.

       Bas lakon mengket rumah si mbaru banci je ilakokeken piga piga dahin banci mereken kehamaten tah pe nehken Ulu Emas ras nggalari  Utang Bere Bere tah kin ia mereken Besi Mersik.

       Adi nina si nuria, sada minggu sope denga ibengketi rumah si mbaru, kalimbubu si majek dalikan enggo ersikap kulau ndarami dalikan lako itampeken tah ipepajek bas mata kerja. Sabap enggo reh anak beru ku jabu kalimbubu ngataken wari kerja dingen ngembah manuk mbur man pangan kalimbubu tah pe maba pangan tasak. Bage pe enggo idaramina ka kudin si metunggung ras manuk megersing guna lakon e.

       Seh mata kerja semal ipaluken gendang, ialo alo piga piga dalanen ibas gelar kalimbubu, ngalo ngalo sukut si mengket rumah i deher pintun iher erdalan i amburi beras piher, e maka seh ilebe lebe pintun banci langsung italangi kalimbubu si majek dalikan perban ibas pultakna matawari (jam enem) acara mbuka kunci i babai bapa pastor, e maka kalimbubu si majek dalikan, kalimbubu si erkimbang ngarakken si mengket rumah ku rumah terus ku dapur.

       Nina anak beru: “e kam puang kami, kalimbubu enggo banci itorosindu.” Erbelas kalimbubu si majek dalikan, bagenda:

Sipemena, nina kalimbubu si majek dalikan: “O Dibata si njadiken kerina si nasa lit enda ipajekken kami dalikan anak beru kami. Enda enggo ipepajek kami dalikan ndu kempu  nini bulangna, bere-bere mamana janah ipegara kami api jenari ampeken kami kudin perdakennenndu. Enggo tama kami lau meciho gelah meciho perukurenndu ras kempu kami e kerina ibas mengketi kurumah si mbaru enda.”

Sipeduaken: Erbelas kalimbubu si majekdalikan, nina: “Enda baba kami beras piher, beras pulung-pulungen, piher pertendindu sada jabu ngiani rumah enda. Dingen pulung kerina ulih latih janah banci rumah enda jadi ingan pulung kami kerina kalimbubu ndu, emaka lalit akap kami salahna,  jujungi kami kam alu beras piher. Piher pe batu i lau piheren pertendinndu ngiani rumah si mbare enda. Rikut ras tinaruh manuk raja mulia, gelah termulia  kam ngiani ruman si mbaru dingen terpuji gelar Dibata ibas rumah enda nari.”

Sipeteluken: Erbelas kalimbubu si majek dalikan, nina: “Enda baba kami manuk  megersing ipankenndu sada jabu, gelah dat gegeh si mbaru lako ngelakoken lakon tah dahin dahin guna isi jabundu bage pe erlagu mehuli man teman sekelewat geluh ndu terlebih lebih ndahiken dahin si ngena ate Dibata.”

Kenca dung dahin kalimbubu si majek dalikan e maka kalimbubu si erkimbang ngkimbangi amak, e maka ngukati erpagi-pagi ije. Ipedarat me cimpa ras galuh  sini sikap ken anak beru.

Enggo dung ngukati seh ku acara ngerana sukut, kalimbubu si majek dalikan, ras puang si majek dalikan, emaka itorosi ku kalimbubu  si erkimbang, kalimbubu si mupus tah si ngosei, seri ras kalimbubu si ngalo ulu emas bas meriah ukur, si mada dareh ibas erceda ate, terus anak beru piga piga dalinen terus ku teman meriah.

Emaka seh man ciger, lit ka dahin kalimbubu si majek dalikan, e me  mereken pangan manuk sangkepi  nangdangi   si mengket  ku rumah mbaru. Ia ipekundul ibas amak mbentar semal enda ilakoken bas sada ruang tah kamar. Nina kalimbubu si majek dalikan erbelas, bagenda: “Enda bereken kami panganndu  si tergelar manuk  teratur  gelah jenda nari  teratur  kerina dahin dahin bage pe persekolahen kempu kami kerina gelah  toto ras pasu pasu  kami kalimbubundu iayuken Dibata, sehat mejuah juah kam kerina seisi jabundu gelah gelar dibata lalap terpuji.

Kenca elah man ciger matawari pe lawes ku sundutna.

Maka kalimbubu  si majek dalikan pe enggo banci  mulih kukutana tah pe kurumahna. Sope denga lawes kalimbubu si majek dalikan  maka anak beru, nehken kehamaten mereken sumpit peradaten  tanda kehamaten man kalimbubu. Isi sumpit emkap: beras, gula, sira, cimpa, galuh si emas, rikut batu  si malem. Kerna isi sumpit batu si malem enda itaka anak beru kalimbubu si erkimbang, biak senina, puang kalimbubu, anak beru ras anak beru menteri erkiteken kalimbubu si majek dalikan.

            Bagem ka lebe kerna kalimbubu si majek dalikan isuratken kami, mbera-mbera erguna man banta kerina.