ANTUSEN LANDEK LIMA SERANGKE

(Isuratken: Firdaus Sembiring Depari)

Adi sinen alu pengertin kegeluhen landek ibas peradaten kita kalak Karo ia enggo itentuken ras kai sini terjadi maka ibas nuju ku kiniraturen  perdalanen perlandek. Lit ia landek ibas  peradaten  bagi landek  Ngalo-ngalo Kalimbubu, lit ka ia landek ibas acara relegi bagi landek Erpangir Kulau ,landek Nampeken Jinujung. Lit ia landek Guro-guro Aron ras landek Perkolong-kolong, emkap gendang meriah, bagi landek Lima Serangake  tah ia landek erpasangen lima  singuda nguda ras lima ka ia sidilaki. Ibas landek enda ia  la banci seri merga ras beru pasangen tah taman na landek  ras gendang seperanggunen ras penggual lima sendalanen.emaka si urri kerna landek lima serangkai. 

Sipemana Landek Morah-morah ibas ngelandekken Morah -morah enda,  je me Anak perana ras Singuda-nguda erlajar  makeken uis peradaten, nandaken kalak enda enggo ersikap  guna banci nggeluh ken kegeluhen guna ngikuti peradaten gelah banci nggeluh mandiri  dingen ertanggungjabap, kerna geraken tan ras awak bage pe nahe nuduhken sada gelar emkap Pertuturen.

Sipeduaken Landek Perakut

Ibas ngelandekken  gendang perakut, je Singuda-nguda ras Anak Perana enggo ertutur  uga kalak Karo seh  ku penggelari kerna orat tutur gelah Singuda-nguda erlajar ertutur gelah meteh adat segedang geluhna sabap ibas kita kalak Karo arus meteh adat, sabap teman landak  labanci la arus dingen elajar  landek, sebab bas kalak Karo pantang adi jumpa sumbang. Gelah kai enggo sini rakut ise pe lanai banci ngosarisa ban enggo irakut alau adat. 

Sipeteluken Landek Patam Patam 

Megati ibas  gendang patam patam enda  kalak enda enggo sitandan maka anak perana banci jumpa atena ngena  kenca natap dingen nering nering pemetik perlandek, maka nangdangi kalak Karo kai kai pe arus nge ipertimbangken lebe gelah banci ertanggung jabab ibas kai kai saja sinilakoken ibas kegeluhen selaku kalak Karo. Iperdiateken tah pe banci inen alu pusuh peraten kai kai saja sini lakokekenna.

 Sipempatken Landek Sipajok 

Ibas gendang enda Singuda-nguda ras Anak Perana ncidahken uga kin sekalak Singuda-nguda tah Anak Perana enggo singenan dingen metunggung ngidah perlandekna alu   tanna si lempir,   kerna batang daginga pe metunggung ras mata pe la meliar kal pengenehenna, bage pe endek sikap ras banci ngikuti buku gendang. Kerna Sipajok enda ncidahken  sada endek ku persadan  si nuriken ukur tah kin ikataken nggoda, maka ipas Sipajok enda kin itorosi ku perjabun. 

Sipelimaken landek Kabang Kiung 

 Ibas gendang guna ngendekken  je iertiken kerna Singuda-nguda ras Anak Perana ersada arih  lako nerusken ku perjabun, seh ngayak sekalak si diberu ras sekalak si dilaki ersura sura guna manteki perjabun si mbaru. Je pe ertina tan, awak ras nahe nuduhken uga sekalak si dilaki reh ku jabu si diberu bage pe si diberu reh kujabu si dilaki, nuduhken sada erti kegeluhen arus sihamat-hamaten, teridah ka pe ije ibas endek si dilaki ras si diberu ersada duana dingen suksuk duana, ertina mindo pasu pasu man Kalimbubu gelah banci manteki perjabun. Desken kabang kiung, Singuda-nguda banci ibas sada kuta  tah Anak Perana mejingkat dingen erburak ukurna kujuma, erbahan aron ncariken duit  man penukur uis na lako ngalo-ngalo kerja, lit pe si idah erti kegeluhen  arus kita latih guna ncariken keperlin kegeluhen segedang-gedang wari. Ertina landek si pelimaken enda nambahi pengertin kegeluhen man banta sapih-sapih manusia kita arus sihamat-hamaten ras si keleng-kelengen. Ulih percakapen ras piga piga orang tua nina:

"Landek Lima Serangke emkap palas perlandek kalak Karo kerina endek gendang Karo enggo ipetangkas ibas si lima enda", nina man penulis. Nina ka: "Morah Morah enda gendang kinihamaten  banci ia jadi palas ibas erlajar. landek Simalungen Rayat, tah landek Nehken Uis Peradaten man Kalimbubu, bage ka pe kerna Ermayan tah Ndikkar tari bintangna lit ibas landek Morah-morah. Kerna landek la arus tah sumbang".

Nungkun penulis,: "Nai engkai Merga Sembiring  ras Beru Sembiring  banci landek bas guro guro aron?"

Nina ngaloi penungkunen penulis, bagenda: "Labo bagena pengelebuh, ...genduari Ttgun aron Sembiring Depari arah matawari pultak kam  ras aron Br Karo Sekali arah matawari ben kam. Adi la bias tambahi alu aron Br Pandia!", bage nge ia kerna perlandek nai i kutata enda nakku. 

Janah bageka nge ia sebalikna e maka lit ban ia aturenna gelah lit adatna maka ibahan landekna Perakut, e maka seh kal perluna man anak si nguda gundari gelah banci min ia nggit erlajar kerna landek lima serangke enda ,tah kin i sekolah tah i Gereja banci min isuanken man anak anak ta tah kempunta, gelah arah dalan si enda peradatenta lalap ia banci  sijaga la ia talu iserang peradaten si la sentudu ras adat bas kegeluhenta bage pe bas kinitekenta, sabab kai si sentudu bas kegeluhen manusia, mehuli ilebe lebe Dibata.

  (Bp. Filo Barnes Depari)