MUKUL, LAKON PERSADAN TENDI

Isuratken: Dinamis Bangun SH

     Mukul, e me kap lakon adat Karo ibas ngesahken perjabun si mbaru si ilakon i rumah enggo ilaksanaken lakon peradaten i jambur.

Adi perjabun ilakoken i Jambur alu ijalapi  pengulu, enggo neken biak senina si empo ras si sereh, ikut pe iksiken anak beru tua, anak beru cekuh baka pekepar,  itambah anak beru menteri arah si empo, la kin lah pengesahen alu mukul enda biakna ngelengkapi saja? Penungkunen enda tentu semal sibegi i tengah tengan jelma si enterem.

Situhuna, pengesahen si ilakoken pengulu e me kap pengesahen formalitas si tuhu perlu jadi momo man kade-kade bage pe jelma si enterem. Tapi arah mukul, perjabun e isahken secara pentendin, gelah ersada pertendian si erjabu e di dua jadi sada!

Erkiteken pengesahen formal e sendalanen nge ras pengesahen pertendin ibas mukul, maka tulisen enda isuratken kami alu ngangkatsa duana.

Pedalan utang adat

     Ibenaken alu nggalari utang adat, anak beru si empo nikapken pinggan ilanami salu uis arinteneng. Pinggan telu kali pedalin, pendalinen pemena e me guna Unjuken.

Sen Unjuken itama babo pinggan iendesken pengulu ku sukut si enggo sue ras bilangen ulih  runggun, umpamana si erdalan si idah kami alu mata kami , i Jambur Sibayak Medan tgl 15-02-2014.

     Si empo, Edi Sama Pandia, i kuta Payung – Kecamatan Payung nari ras si sereh e me  Claudia Br Purba, i Rumah Kabanjahe nari.

Perdalinen utang adat sanga si e, e me: Unjuken Rp. 996.000 (Ipedalin        Rp. 986.000); Singalo Bere-bere Rp 656.000; Singalo perninin    Rp. 336.000; Singalo perbibin Rp. 176.000; Sirembah ku la      Rp. 116.000; Anak beru Rp. 136.000; Perseninan Rp. 56.000; alu cataten Luah kalimbubu Amak kapal enggo ipesikap.

     Ibas sijalapen e, pengulu enggo ngesahken perjabu e, enca igalari utang adat kepala desa pe enggo ndungi surata dat perjabun e.

Mukul

     Mukul ibahan berngi biasana i rumah orang tua si empo. Mukul enda salah sada peradaten. Pagi-pagi seh  ben wari enggo ilaksanaken pesta peradaten. Masu-masu, mereken toto arah sukut si empo, senina, kalimbubu, anak beru. Teman meriah, teman sada perpulungen jabu-jabu si empo ras si nereh, Mukul biasana  ibahan jam 20.00 WIB (jam 8 berngi)

Perdalanen Lakon Mukul

Isikapken man si erjabu, e me kap amak dabuhen (amak timbahen mbentar). Kalimbubu, nanggerken bengkau, nakan panganen si erjabu  rikut gulen cipera, Manuk Sangkepi (arus manuk megersing rupana ras beruna). Manuk e igeleh, enca igeleh, ibelgang salu lau las, ibutbuti me mbuluna la lit tading, e ma ka manuk e itutung.            Itutung pe labo meseng, pas-pas saja, gelah jukut manuk enggo pesing ras keri kerina mbuluna si melumat. Igule salu kuh dagingna rikut bagian dalam (ate, bilalang, tuka, ibersihken, igule ras  dagingna  ipotong lurus/pinter. E maka bas bengkau e  itambahi bumbu as perluna, emkap: cina, kuning gersing, alia, lasuna, daun salam, pere, tomat, sere ras tama sirana, kuahna lau santan. Enca daging manuk e enggo tasak, iangkat  janah itama  tare pinggan, (kuh dagingna lalit tading)

     E maka enca pulung sangkep nggeluh  ipekundul si mbaru erjabu e i datas amak mbentar si enggo ikimbangken. Pesikap pinggan pasu, uis ari teneng (lanam pinggan pasu e), belo cawer itama iteruh pinggan.

     Peralaten sini perluken, e me kap: Ingan nakan; Cangkir/gelas; Ingan gulen; Peburihen; Ingan lau inemen/cerek ras Lau pola (Nira). 

E maka penganten e isuruh man alu temani bibina (pernanden) si meteh gerek-gereken. Rikut ka pe tinaruh manuk ikataken tinaruh manuk mbentar si enggo belgang. Kulit tinaroh manuk e ikupas janah ibelah dua. Ikataken: Sada jadi dua, dua jadi sada, maka si mbaru erjabu man ibas sada pinggan.

     Enca pengantin dung man asa besurna e maka sangkep geluh si pulung pe danci man si enggo ipesikap anak beru. Enca kerina si pulung enggo dung man (penganten sukut/si empo, sukut si nereh, senina, kalibubu, ras puang kalimbubu, rikut pe anak beru pekepar), e maka kalimbubu ngorati kerna perpan si mukul e: uga akapna ibas perpanna  ndai, tah kurang santuk sira cinana, tah kurang melamna ibelasken kempak anak beruna. Maka ijabab simukul e: ”Labo kai pe kurang bengkila entabeh, gulen, nakan ndai sikap nge  pertasakna, kami pe man asa besurna”. E maka ipeseh anak beru kempak kalimbubu ngataken kerna perpan si mukul la lit sikurangna. E maka  enca e, tinaruh manuk si e nggo ibelah ndube igereki.

     Nina  pernanden (bibina) tinaruh manuk pe mejile pergersingna. E maka isuruh ipan pengantin e, (si mukul) maka sangap erjabu. Tanda tinaruh manuk si megersing, gelah perjabunna  e derek jadi bage manuk si indung, ingan cilenggem kempak orang tua pekepar,  bage pe kalimbubu, puang kalimbubu, sembuyak, senina, anak beru, rikut pe teman meriah.

Rebu

     Enca dung acara perpan manuk sangkepi, iterusken me petandaken apai si biak rebu. Rebu ertina la derek ngerana langsung, arus ngerana erkelang-kelang (perantara).

Tentuna (Bibi/bengkila) arah si empo negu  permenna (si sereh e) kujabu si empo. Reh nina anak beru/bibina e ituduhi: “Ia enda Bengkilandu (Ajinta, bapa perbulangenna), salami, sendah nari ngenca derek erkuan, pagi lanai derek adi lit atendu man pesehen kata ban kelangna-kelang nerusken katandu”. 

“Enda bibindu/si metuandu (Nande perbulangena) kam  labo rebu.  Enda turangkundu, rebu kam erkiteken perbulangen si sereh, e ersilih  erkiteken turang perbulangenndu enggo sereh: jadi rebu kam kempak dilakina e, permen bibina”, nina bibi erbelasken kata.

     Bage ka pe arah si empo, si nuduhi rebuna e me kap anak beru si sereh.

       “Enda mamandu mehamat kam, adi jumpa kena itapin timai lebe ia dung ridi maka derek kam kutapin. “Enda mamindu”. Kerina senina mamina e tuduhina, kerina kalak enda rebu kam. “Enda turangkundu, salami gelah enggo tandaindu, pagi lanai derek kam erkuan langsung. Enda silihndu maksudna turang si sereh, laderek jagar-jagar ras silih”. Bagem terus ipetandaken sada persada si pulung ibas acara “Mukul “tah pe ikataken “Mecah tinaruh” tah pe “Petutur Rebu-rebu”

     Enca dung e, iban me toto pendungi, gelah enggo mulih ku rumahna sekalak-sekalak. Tapi piga-piga kalak terlebih orang tua pengantin si diberu, labo minter derek mulih, paling lang tah telu berngi i rumah orang tua si empo e.

Gelah enggo derek arih-arih muat si mehuli gelah anak sini kelengi, si mbaru erjabu e sukses, malem atena, erkemalangen man Dibata, mehamat erkalimbubu, ersukuten ersenina, metami ku anak beru.

Mulai paksa si e, e maka si mbaru erjabu,  enggo lit tanggung jawapna mberat-mberat menahang ibas peradaten Suku Karo. Ibas Suku Karo kenca enggo erdemu, adi lit  lakon adat enggo arus dat kata tenah, surat undangan subuk nereh empo, surat tenah erceda-ate, undangen mengket/sumalin jabu ras si debanna.

E maka arah perjabun e enggo  me jelas dat hubungen perkaden-kaden ibas kalak karo, tutur sini palasna arah merga ras bebere.

E maka datme lengkaren tutur bagenda me ia: Erbapa; Ernande; Erbengkila; Erbibi; ;Erturang; Ersenina; Ermami; Ermama; Erimpal; Ersilih; Erbere-bere; Eranak; Erkempu; Erente; Erentah; Erturangku; Eragi; Erkela; Erpermen; Ernini; Erbulang; Erninitudung; Erempung ras Erberu.