DOAH DIDONG

Betlehem Ketaren (Berastagi)

Doah didong é me perbahanen sekalak si roah tah pé ngembah danak-danak ras gelah si nioah ula ngandung. Ngadi dengé-dengéna janah tunduh ibas gurung si rembah. Iperdiatéken pé danak-danak é salu setengah rendé setengah erbelas nina si rembah. ”Oah.. oah … ooo… ooo … ué … ué… oah… oah,” nina janah nepuki kundul-kundul danak-danak é.
Bas lakon tumbuk erjabu, tupung tegun Anak Beru Sinereh ngerana, isehkenna me kekelengenna nangdangi perménna alu telah-telah. Kata ajar dingen toto gelah tutus até si erjabu njabuken bana dingen mejuah-juah, sangap encari ras cawir metua orangtua si pejabuken anak. Kenca dung Anak Beru Tua erbelas iumputi Anak Beru Cekuh Baka bagepe Anak Beru Sepemeren. Sope seh ku Anak Beru Menteri ras ku Anak Beru Singukuri, isehken me ku teran Sirembah Kulau e (turang bapa si sereh) lako erbelas nehken katana.
Teran Sirembah Kulau, bagi gelarna, ia me si ndubé mbaba si sereh e ku lau, si petandakensa danak-danak é ku sekelawet arah lau dingen peridisa, nemburisa rikut nggulasahisa gelah ula bergehen. Labo terjeng wari tupung lakon é saja. Sope tubuh pé danak-danak é, bibi-bibina terarap-arap gelah si tubuh anak diberu. Kenca tubuh nina maka anak diberu é sekerajangenna. Ia si nehken gelar guna danak-danak é, ras nehken tanggungjabapna ibas segedang-gedang paksa. Ia si arus ertanggungjabap lako ngepkepsa, jadi perménna inganna ergani-gani dingen pegedang-gedang pemeteh dingen kepentarenna gelah metunggung pepagin lako muat bagin ibas ia sada tegun dingen sada rasasen si  sué ras kesemalen nggeluh lako ras-ras ngamati Kalimbubu dingen ras-ras ka dat kekelengen ibas Kalimbubu nari.
Tambah-tambah pé tupung reh belinna batang daging permenna, tambah-tambah ka  jadi até bibina sabap perménna é me si ngumban dirina, dingen nangdangi perménna é niarapknna masin katana. Lako me pagin anakna erdemu ras Kalimbubu ibas pemanteken jabu si mbaru. Émaka, Doah Didong si isehken Sirembah Kulau é bagi gelarna Doah Didong banci setengah rendé setengah erbelas ras banci pé setengah ngandung erkitéken aru dingen morah aténa lakon tumbuk erjabu é. Perménna berkat lawes ku jabu nu kalak. La niarapna iluhna  mambur erdiré-diré mbaba kata telah si nisehken. Lit pé Doah Didong si megati denga si begi tep-tep kerja tumbuk erjabu bagenda:
Kudoahdidongken ka me kam sendah permén bibina. Doah… doah… didong … permén bibina. Énda enggo talu kepé kam sendah, bibi, kutadingken me kam ras impalku Karo mergana lako erjabu ras impalku Ginting mergana énda, nindu bangku, teman bibina … ia… ah… sedakna é ari… Doah… doah… erpengué kal ndubé ranandu nangdangi impalndu Karo mergana parang anak sintua é, ari… megedang kal akap kami ras bengkilandu. Émaka uga ngé ningku pagi erkata kempak impalndu Karo mergana si paksana erlajang bana é, anakku … ia… ah… Émaka bagém permén bibina, temanku metua la surung! La gia padanndu erdemu ras impalndu Karo mergana, ari… Kudoahdidongken ka me kam sendah duana ras impalndu si anak kami me akap kami.
Manjar-anjar reh me duana si erjabu ku lebé-lebé si erdoah janahna ncekuh kampilna tahpé koncangna lako nalamken ulihna latih man bibina é:
Émaka bagém beru Tarigan, teman bibina. Tutuslah aténdu erjabu ras Ginting mergana. Kelengi pagi jabundu, kelenglah aténdu perbulangenndu terlebih-lebih pé bibi bengkilandu bagi keleng até kami man bandu. Doah… didong atéku keleng atéku jadi. Kam pé anakku, Ginting mergana, sehat-sehatlah kam duana, jumpa matawari ras bulan kam. Sangap encari ras ertuah bayak kam, seh bagi si nisura-surakenndu …. Iyah, enggo mé, yah… Bagé pé kam kerina turang, éda kami si bapa dingen nandé kami kin niakap kami, doah didong, turang parang anak sintua, bagepé kam turang anak sintengah kerina ras kam turang kami parang anak si nguda ras kerina nande kemberahen. Turang, kam pé mejuah-juah kam pejabuken permén kami, sehat-sehatlah kerina dingen cawir kam metua jadi penggurun dingen si ngkelengi kami. Ertoto ka lah kam kerina turang, éda…
Manjar-anjar  turang ras éda si erdidong ndeheri ia dingen nalamisa dingen nehken kai si enggo icekuhna ibas gajut-gajuna nari:
Gelah kami pé Anak Berundu tetap megegeh ndalanken dahin kami ibas kerina penuruhenndu. Sehat-sehat dingen mejuah-juah kami kerina Anak Berundu. Bujur ras mejuah-juah kita kerina.
Nina tua-tua sidekah, kata me tabas, bulung-bulung si jadi tambar, jadi ningen jadi, mbera Dibata Simasu-masu. Kai-kai gia, kitik pé adi erpalasken kekelengen mbaba kiniulin. Perlu ipetunggung dingen ipepantek guna maba kejuah-juahen, tapi peratén Dibata pé si meganjangna dingen erpalasken katana maka persadan metunggung.
Toto ras pengatanken bujur kalak si rulih tuhu-tuhu metunggung, tapi erpalasken kiniteken maka Dibata Siperkuah dingen Siperkeleng, sora nderkuh pusuh kalak si la metunggung ras si lit ibas kiniseran la pernah mulih alu ngambé-ngambé. Bujur.

Sorasirulo.com

LAPE-LAPE TENDI

PASTI PATRISIUS SITEPU

Mbue suku bangsa si lit i doni enda, dingen tep-tep suku lit nge adat ras budayana, janah e me si nuduhken maka ia jadi sada suku bangsa. Adat ras budaya e tentu pelain-lain sada ras si debanna, si e jadi tanda kebayaken si banci ngatur ras ngiket tak-tak pergeluh tep-tep suku.

          

Ibas kiniteken pe, rikutken ras kiniteken si adi labo banci seri sada ras si debanna, tapi mbue nge curak ras tempasna. Sekali enda ate kami kita erpenulih ku pudi kentisik kerna kiniteken nini-nininta nai, e me kerna kematen ras kegeluhen kenca kematen.

Gelah enda jadi banding-bandingen ras kiniteken si genduari enda, ras alu si e banci pe reh erpengantusina kita nangdangi kiniteken bage pe budayanta.

Lit piga-piga perkatan si nipake nini-nininta guna petangkasken kerna taktak manusia kenca kematen, e me kap:

1.    Doni kelengasen

Adi lit kalak mate maka semal ikataken, maka ia lawes ku doni

kelengasen. Tangkas dingen banci siantusi maka e ertina si mate e kula

ras tendina enggo melengas ras lesap, lanai lit kai pe tinadingna. Iteki

maka kenca manusia mate lanai lit umputenna, sibar e saja me lanai lit

kegeluhen si deban. Nggo dung.

2.    Doni Kesalihen

Ibas si enda, lit kiniteken maka kalak si enggo mate labo melengas tapi

salih me kegeluhenna. Kulana tuhu melengas, tapi tendina tetap nggeluh

ibas tempas si deban, lanai seri ras sangana ia nggeluh denga. Doni

kesalihen lit dua tempasna, e me kap: si pemena, ia salih jadi begu

(labo setan) e maka lit perkatan begu jabu. Begu jabu enda tetap tading

ibas jabu sima-simana, janah jadi singkawal jabu e. Ia arus ihamati si

enggeluh denga alu ipajuh. Adi lang maka mawen-mawen begu jabu merawa,

seh maka banci reh pinakit tah pe perbeben nggeluh bage pe mara sideban

kempak jabu e.Sipeduaken, enda mungkin pengaruh agama Hindu, maka si

mate banci salih ku bas erbage-bage tempas. Si e itentuken uga

penggkebetna paksa ia engguh denga. Ibas cakap   si gundari ikataken

inkarnasi. Adi ia kalak mbisa tupung nggeluh ia banci salih jadi arimo,

tapi kalak curlis ibas geluhna salih me jadi nipe. Kalak si lat-lat

salih jadi babi janah kalak si bujur ras si melias salih jadi nderapati

ras sidebanna.

3.    Doni Kesunduten Taneh Ersuki

Doni Kesunduten e me sada ingan sue ras kiniteken si nuria, ija kal si

mate lawes erdalin ku ingan-ingan matawari sundut. Ije lit taneh si

ersuki, i je me ingan si rasa lalap. Ingan e ingan si dem alu  

kesenangen, iteruh batang kayu jabi-jabi ras salabulan ingan tendi

jemolah jemole. Mbergeh la mbergehsa, mokup la mokupsa, malem-malem me

nanamna.

Perdalinen ku je labo mesunah, tapi itentuken kerna taktak cabal ras

pengkebet kegeluhen si nitadingkenna. Ibas perdalinenna ku doni

kesunduten, adi ibegina ia tetap itangisi si nitadingkenna, maka

mulihken ia ku rumahna ndube, lako ngapuli si ermorah-morah man bana

dingen nangisi ia, aminna pe tentu labo lit si megisa. Entah pe adi

ibegina anak-anak si nitadingkenna rubat kerna erta-erta si

nitadingkenna, e pe ngelonglangi perdalanenna janah mulihken ia ku rumah

lako nehken peah-pedahna.

Arah kiniteken si bagenda me bena-benana lit lakon perumah begu, e me

lako ndilo tendi si mate erkelangken guru sibaso, gelah erkelangken guru

e ngerana me si enggo mate e lako nehken pedah-pedah man kerina anak

anakna, dingen adi ibegiken ras idalanken pedah-pedahna maka pinter me

dalanna nuju ku taneh kesunduten.

4.    Lape-lape Tendi.

E me sada ingan man kalak si mate si la banci bengket ku doni

kelengasen, doni kesalihen tah pe doni kesunduten. Erkiteken ia mate la

bagi arusna, labo erkiteken enggo metua tah pe erkiteken sakit, tapi

erkiteken ibunuh tah pe erkiteken munuh bana. Lit ka si ngatakennsa ikut

pe erkiteken mate lako mupus ras si debanna.

Perban la lit inganna, maka tendina kalak si enggo mate keliper kujah

kuje. Dahinna nuhsahi kalak alu erbage-bage perbahanen gelah ia

iperdiateken. Gelah ula ia nuhsahi maka tinadingenna erbahan sada ingan

man bana, banci i juma, i reba tah pe i duru kesain rumah. Ije pe isuan

galuh sitabar ras bulung-bulung si melias gelar  si jadi ingan tendina

ngadi-ngadi gelah bagi ibas taneh kesunduten banci jemolah jemole tendi

e, ngisah la ngisahsa dingen mbergeh la mbergehsa malem min atena.

Kita kalak Kristen patut kal ngataken bujur man Dibata, erkiteken  tendinta tek kita lawes labo ku ingan si tersena idatas.

E me taneh kelengasen, taneh kesalihen tah pe ku doni kesunduten. Tapi erkiteken lias ate Dibata iberena anakNa si tonggal lako nebusi kita arah ia enggo mate, keke ras nangkih ku surga jadi dalin man banta guna bengket ku bas kegeluhen si la erkeri-kerin, e me ingan si dem alu kesenanagen.

Jadi arus me maka Paska Kristus si jadi Paskanta e sirayaken alu meriah sabap Kristus enggo keke guna kita, Aleluya. Ia me lape-lape tendinta.

ERGAN KEDEP ASANGKEN BERAS?

BP. FILO BARNES DEPARI 

Kegeluhen kalak Karo la terlepas ibas tanda-tanda tah lambang-lambang tah kin penggelaren si lit i tengah-tengah peradaten Merga Silima ras Beru Silima. E me kap ibas perdalanen Tutur Siwaluh itengah jelma si enterem, uga perputaren janah uga ia ilakokeken tah uga ia ibaba dingen ndalan ken gelar si ni ibaba ibas tengah peradatenta selaku kalak Karo.

    

Sitorosi kerna percakapenta kerna sini anding ken e me kap kerna ergan kedep asangken beras.

“Secara sosial ia ibedaken fakta ras realitas; adi si ori terbagesen maka fakta : emkap bebere sada rupa penanda status si erguna ras  ertanggung jabap selaku anak beru” si ngerentes dalin, kuda dalin, sinungkat-nungkat, si meteh pate geluh kalimbubu. Realitasna: erjabu bebere la ia jumpa impal (muat si ngumban); mulgap istilah tah penggelaren “kela”. Antara bebere ras kela (anak beru) multak  power (kuasa/kekuasaan/menguasai) seh teridah sungsang petembal ibas implementasi tah pengantusen ras perbahanen; endam resiko tah pe akibat la mbuat beru si ngumban tah kin ia bapa; nande tah pe nini: istilah sapaan tah pe pengelebuh (panggilan/sebutan) nangdangi dilaki anak, tah pe bulangen anak; tapi secara fungsional enggo ia si leben/tah kin iperlebe, ikedepanken seh tergejap man si bebere anak beru bas sada jabu; kela la lit ubungen dareh; oposisi binner ras bebere (dareh); secara litotes/ironi rusur kal  ibelasken  alu idiom ”ergan kedep asang ken beras” antusenna lebih berfungsi anak kalak (kela) asangken beberenta ibas sada lakon/dahin kai-kai saja pe. I bas paksa sakit, kiniperlun sikitik enggo leben seh ku kela tapi la seh ku bebere endam ulih la muat beru puhun tah beru singumban. Terbagesen  Bebere = (1) Lit hubungen dareh, (2) la lit kesirangen  ras kela banci  saja sebalikna  endam sebagai fakta mendasar, realitasna secara peran sosial ras fungsional lebih ndeher ubungen kela ibas  perkadekaden (Teori Kepentingen).

Gambar: Karo Siadi Blogspot

    

Ulih ercakap cakap ras sekalak Dosen Fakultas Sastra USU si gundari muat gelar Doktor Sastra i Universitas Udayana Bali, Jekmen Sinulingga erkelangken “angin si rembus” i bulan  Mei tahun 2014 paksana i tengah berngi si ngongo ija terbegi sora pio-pio.

(RL = Ralinggungi, JS = Jekmen Sinulingga)

RL:  O katua ngerana ateku kita kentisik.

JS:  Kerna kai kin e impal.

RL:  Ercakap cakap ateku kita kentisik.

JS:  Kai siman cakapenken impal.

RL:  Lit kap ia  andingken kalak Kerna ergan kedep asangken beras,ergan  kela asangken bebere, nina anding andingen ah impal uga kin e latih ka kuakap ngukurisa amin gia la man tangkelen , ma bage kap ndu impal

JS:  Eah mpal kerna penungkunen ndu ena,Pas kal kuakap bagi si ngerudangken bunga palas,mberat mberat menahang ,pas ningen la tengteng la pas ningen lit ka pertuhuna, egia  ma la rutang kita adi kuturiken kerna pengakapku impal??

RL: Lang impal enda dah ndu majalah  gereja,neh ken kata tuhu alu tengteng,dahinna mpal,

JS: Kerna andingen kedap ras beras impal la banci isalih ken ku manusia tah jelma kai maka bage sabab kerna andingen ena erbahan sada perjentiken kubas perkadekaden  bas peradaten.Inget impal penggelaren  kela sada gelar sini ibaba sekalak manusia si mperdemui sekalak diberu nangdangi kalimbubuna tah ja nari gia asalna.Tapi lit ia kela la ia arah dareh janah lit ka ia kela janah ia ka kin bebere. Perbahan ia muat impal tah igelari muat beru singumban nande.

RL; terjeng je enggo jelas impal , sila keri ku ukuri impal ergan kedep asang beras ergan kela asang bebere, lit kak je perubaten me impal ??

JS: Manusia biak rukur impal kalak singataken ia kedep sini irtiken eme bebere ndai, janah beras ndai emkap kela , maka bebere ndai enggo perlu ialeng tendina impal ku.

Sabab la inget na dareh si malir ibas daging ras kulana emkap dareh kalimbubuna si kin ia igelari singalu ulu emas tah kin sini gelari simada dareh.

RL: jadi engkai mpal ergan kedep ??

JS: eah impal ku si merandal tah kam kin singatakensa ergan kedap asang ken beras e??

RL: Lahang impal,sini kumaksut impal kerna kela ras bebere enda uga kin ia ibas peradaten silit itengah kuta ta enda impal?

JS: Bebere emkap ia me sini ertanggung jabab bas kegeluhen kalimbubu na,ia me sini igelari si cekuh baka,si ndungi dahin kalimbubuna ibas paksa susah tah ibas paksa ermeriah ukur, sijadi perjentiken maun maun impal kerna tading tadingen taneh; Nininta si Adam Ras siHawa  impal maka ise pepagi ngataken ,o nake ergan kela asang bebere  nina babah na si berteng maka ia banci sikataken sekalak manusia si nggeluh  la ngikuti peradaten sabab sicekuh baka e tetap beberenta anak sini ipupus turangta sisada tuka tah kin sisada nini bulang.

RL: Teh ndu ka kap kerna turi turin si Adam ras si Hawa e me impal ???

JS; Kerna si ena terlebih kita enggo ku berita simeriah lani kita perlu berita si melungen impal.

ERBAGE-BAGE UIS KARO

BETLEHEM KETAREN, BERASTAGI

Nai ope denga Obos bengket ku Taneh Kato Simalem enda, erbage-bage uis si lit, subuk si iipake guna ose si teptep wari bagepe guna ose-ose ibas lakon peradaten, iban kalak Karo jine arah bahan-bahan sini lit ras isuan i taneh Karo enda. Uis iban ibas kembayat (kapuk) nari, siutur jadi benang ras irupai salu abu dapur, kapur belo, kuning gersing ras telep si ipelabuhken ras itama ku lau nakan, isuri, ijemur, isawen janah itenun.

         

Erbage-bage uis Karo sue ras curak ras gunana, e me kap: Uis Julu, Uis Teba, Uis Batu Jala, Uis Arinteneng, Uis Kelam-kelam, Uis Pementing, Uis Gobar Dibata, Uis Beka Buluh, Uis Gara-gara,  Uis Perembah, Uis Jujung-jujungen ras erbage-bage curak Uis Nipes.  Uga kin rupa, curak ras kai kin gunana erbage-bage uis Karo enda?

 1. Uis Julu. Uis Julu rupana mbiring ras ergaris-garis mbentar, ketang-ketangna megara ras mbiring e maka ikataken ketang-ketang bujur ras lit siratna.  Uis Julu e mekapal ras pake ambu-ambu.  Gunana, jadi gonje dilaki, jadi maneh-maneh, nambari ose orangtua si dilaki ras jadi cabin (lembut).

2. Uis Teba. Uis Teba rupana narus bali ras Uis Julu: mbiring janah ergaris-garis mbentar, tapi garis-garisna e jarangen asa garis-garis Uis Julu.  Ketang-ketangna megara jine rupana ras lit ka siratna.  Uis Teba pe mekapal ras pake ambu-ambu.  Gunana jadi maneh-maneh, jadi tudung nini, guna nambari tudung orangtua si diberu si cawir metua ras jadi lapik pinggan pasu ibas nggalari utang adat (pedalin tukur).

3. Uis Arinteneng. Uis Arinteneng mbiring rupana, i kawes ras kemuhenna lit ketang-ketang si isirat, arah datas ras teruhna lit les mbentar tah pe belau.  Uis enda mekapal.  Gunana e me jadi lapik pinggan pasu tupung pedalin tukur, bage pe tupung pinggan pasu ipake jadi ingan man paksa Mukul.  Uis Arinteneng pe ipake guna Ngiap Tendi, jadi Upah Tendi, jadi lanam njujung ranting

tupung Sumalin Jabu, jadi perembah anak dilaki adi ”termama-mama tendina” ras jadi perembah anak si diberu tupung ”terbibi-bibi tendina”, jadi lapik benih page tupung ibaba ku juma tupung merdang ras jadi isi lemari gelah tenang ukur simada jabu.  Uis Arinteneng iiket padang nteguh jadi toto gelah nteguh tetap tendi ringan irumah.

4. Uis Batu Jala. Uis Batu Jala, mbiring rupana janah iduru arah kawes ras kemuhenna lit mbentar ije sirat Cekili Kambing.  Uis enda menipes ras la pake ambu-ambu.  Uis Batu Jala igunaken jadi tudung singuda-nguda tupung Gendang Guro-guro Aron ras jadi selempang si ipake Anak Perana ertemanken Uis Rambu-rambu ras Uis Kelam-kelam.

5. Uis Kelam-kelam. Uis Kelam-kelam mbiring rupana, la ercurak-curak ras la lit ambu-ambuna.  Gunana e me kap jadi tudung orangtua, jadi morah-morah ras jadi selempang ertemanken Uis Batu Jala ras Uis Rambu-rambu.

6. Uis Beka Buluh. Uis Beka Buluh igelari pe Bulang-bulang, rupana megara, megersing ras  fiolet, erbenang-benang emas ras ergaris-garis pinter.  Gunana jadi Bulang-bulang ibas lakon adat ras jadi maneh-maneh.

7. Uis Gobar Dibata. Uis Gobar Dibata rupana belau, mbiring, megara ras mbentar.  Gunana lako uis jijujung, ilandek-landekken tupung erpangir kulau tah pe tupung ngelandekken galuh.

8. Uis Pementing.Uis Pementing rupana mbiring, ercurak mbentar ras lit gatip-gatipna.  Uis enda kitiken asa uis si deban.  Gunana jadi benting dilaki, mbentingi uis (gonje) Uis Julu.

9. Uis Gatip Jongkit. Uis Gatip Jongkit megara rupana, erbenang emas, nbentar ras megara.  Uis enda mekapal ras pake ambu-ambu.  Gunana jadi gonje tupung rose ibas lakon adat ras jadi leimbut man kalimbubu.

10. Uis Gatip Cukcak. Uis enda rupana mbiring ras curakna mbentar ergaris peltep-peltep.  Gatip Cukcak mekapal ras pake ambu-ambu.  Gunana jadi ndawa diberu ras jadi abit dilaki.

11. Uis Gara-gara. Rupana megara janah ergaris-garis mbentar.  Mekapal bali ras Uis Julu janah pake ambu-ambu.  Gunana jadi tudung ibas Sumalin Jabu bage pe kerja Erdemu Bayu.  Igunaken pe jadi ndawa anak-anak janah jadi lembut anak-anak e.

12. Uis Perembah. Uis Perembah rupana megara, ercurak mbentar ras megersing, mekapal ras pake ambu-ambu.  Gunana jadi perembah, sini ibere kalimbubu ibas lakon adat erpalasken totona gelah bere-berena e sehat-sehat, lampas mbelin, kune sirang lau ras beras maka sirang ernande-erbapa.

13. Uis Jujung-jujungen. Uis jujung-jujungen rupana narus-narus megersing, pake benang emas, mekapal ras ambu-ambuna pe eremas-emas,  Gunana lako jadi jujung-jujungen si itama ibabo tudung.  Semalna ipake Kemberahen Aron ibas Guro-guro Aron.

14. Uis Nipes Ragi Mbacang. Rupana megara ras lit garis-garis mbentar, menipes ras lalit ambu-ambuna.  Gunana jadi lange-langge si ipake tupung lit lako-lakon adat  ibas paksa keriahen.

15. Uis Nipes Padang Rusak. Uis enda rupana megara janah melala ornamen-ornamenna si mejile.  Gunana jadi langge-langge ras jadi selempang man si diberu.

16. Uis Nipes Mangiring. Uis Nipes enda rupana megara ras ergaris-garis mbentar, menipes janah lalit ambu-ambuna.  Bali ras uis Nipes Padang Rusak gunana e me kap jadi langge-langge ras jadi selempang diberu.

17. Uis Nipes Benang Iring. Rupana megara ergaris-garis mbentar itambah benang-benang emas.  Uis enda pe menipes ras la erambu-ambu.  Gunana pe jadi langge-langge ras jadi selempang diberu.

Enda me erbage-bage uis kalak Karo.  Ija nge ndia banci siidah Kalak Karo eruisken uis si bagenda rupana? Mungkin arus si-google gambar-gambar siadi, banci denga siidah piga-piga. Genduari enggo buen ipake uis Karo enda ertemanken uis Obos e me: (baju, saluar ras pe jas) tambah kampuh man si dilaki tah pe uis Jawa (kebaya) ras kelengkapenna si deban. Uis Karo genduari enda ipake tupung lit lako-lakon adat tah adi lit perayan-perayan.

Genduari enda teridah maka i Gereja-gereja lit kesedaren makeken uis Karo tupung lit perayan-perayan Gereja subuk ia ibas Perayan Natal, Perayan Paska bage pe bas perlumban-perlumban pemeriahen pesta. Si enda tentu sada kinata si mehuli sabap alu bage tetap denga isuanken man kalak si nguda denga ate keleng ras ate ngena nangdangi uis Karo selaku tading-tadingen nini-nininta si jadi tanda bage pe toto selaku kalak Karo.

Isuratken mulihi, ersumbul arah A.G. Sitepu, Mengenal Seni Kerajinan Tradisional Karo, seri B, Toko Barus, 1980.)