ERBAGE-BAGE UIS KARO

BETLEHEM KETAREN, BERASTAGI

Nai ope denga Obos bengket ku Taneh Kato Simalem enda, erbage-bage uis si lit, subuk si iipake guna ose si teptep wari bagepe guna ose-ose ibas lakon peradaten, iban kalak Karo jine arah bahan-bahan sini lit ras isuan i taneh Karo enda. Uis iban ibas kembayat (kapuk) nari, siutur jadi benang ras irupai salu abu dapur, kapur belo, kuning gersing ras telep si ipelabuhken ras itama ku lau nakan, isuri, ijemur, isawen janah itenun.

         

Erbage-bage uis Karo sue ras curak ras gunana, e me kap: Uis Julu, Uis Teba, Uis Batu Jala, Uis Arinteneng, Uis Kelam-kelam, Uis Pementing, Uis Gobar Dibata, Uis Beka Buluh, Uis Gara-gara,  Uis Perembah, Uis Jujung-jujungen ras erbage-bage curak Uis Nipes.  Uga kin rupa, curak ras kai kin gunana erbage-bage uis Karo enda?

 1. Uis Julu. Uis Julu rupana mbiring ras ergaris-garis mbentar, ketang-ketangna megara ras mbiring e maka ikataken ketang-ketang bujur ras lit siratna.  Uis Julu e mekapal ras pake ambu-ambu.  Gunana, jadi gonje dilaki, jadi maneh-maneh, nambari ose orangtua si dilaki ras jadi cabin (lembut).

2. Uis Teba. Uis Teba rupana narus bali ras Uis Julu: mbiring janah ergaris-garis mbentar, tapi garis-garisna e jarangen asa garis-garis Uis Julu.  Ketang-ketangna megara jine rupana ras lit ka siratna.  Uis Teba pe mekapal ras pake ambu-ambu.  Gunana jadi maneh-maneh, jadi tudung nini, guna nambari tudung orangtua si diberu si cawir metua ras jadi lapik pinggan pasu ibas nggalari utang adat (pedalin tukur).

3. Uis Arinteneng. Uis Arinteneng mbiring rupana, i kawes ras kemuhenna lit ketang-ketang si isirat, arah datas ras teruhna lit les mbentar tah pe belau.  Uis enda mekapal.  Gunana e me jadi lapik pinggan pasu tupung pedalin tukur, bage pe tupung pinggan pasu ipake jadi ingan man paksa Mukul.  Uis Arinteneng pe ipake guna Ngiap Tendi, jadi Upah Tendi, jadi lanam njujung ranting

tupung Sumalin Jabu, jadi perembah anak dilaki adi ”termama-mama tendina” ras jadi perembah anak si diberu tupung ”terbibi-bibi tendina”, jadi lapik benih page tupung ibaba ku juma tupung merdang ras jadi isi lemari gelah tenang ukur simada jabu.  Uis Arinteneng iiket padang nteguh jadi toto gelah nteguh tetap tendi ringan irumah.

4. Uis Batu Jala. Uis Batu Jala, mbiring rupana janah iduru arah kawes ras kemuhenna lit mbentar ije sirat Cekili Kambing.  Uis enda menipes ras la pake ambu-ambu.  Uis Batu Jala igunaken jadi tudung singuda-nguda tupung Gendang Guro-guro Aron ras jadi selempang si ipake Anak Perana ertemanken Uis Rambu-rambu ras Uis Kelam-kelam.

5. Uis Kelam-kelam. Uis Kelam-kelam mbiring rupana, la ercurak-curak ras la lit ambu-ambuna.  Gunana e me kap jadi tudung orangtua, jadi morah-morah ras jadi selempang ertemanken Uis Batu Jala ras Uis Rambu-rambu.

6. Uis Beka Buluh. Uis Beka Buluh igelari pe Bulang-bulang, rupana megara, megersing ras  fiolet, erbenang-benang emas ras ergaris-garis pinter.  Gunana jadi Bulang-bulang ibas lakon adat ras jadi maneh-maneh.

7. Uis Gobar Dibata. Uis Gobar Dibata rupana belau, mbiring, megara ras mbentar.  Gunana lako uis jijujung, ilandek-landekken tupung erpangir kulau tah pe tupung ngelandekken galuh.

8. Uis Pementing.Uis Pementing rupana mbiring, ercurak mbentar ras lit gatip-gatipna.  Uis enda kitiken asa uis si deban.  Gunana jadi benting dilaki, mbentingi uis (gonje) Uis Julu.

9. Uis Gatip Jongkit. Uis Gatip Jongkit megara rupana, erbenang emas, nbentar ras megara.  Uis enda mekapal ras pake ambu-ambu.  Gunana jadi gonje tupung rose ibas lakon adat ras jadi leimbut man kalimbubu.

10. Uis Gatip Cukcak. Uis enda rupana mbiring ras curakna mbentar ergaris peltep-peltep.  Gatip Cukcak mekapal ras pake ambu-ambu.  Gunana jadi ndawa diberu ras jadi abit dilaki.

11. Uis Gara-gara. Rupana megara janah ergaris-garis mbentar.  Mekapal bali ras Uis Julu janah pake ambu-ambu.  Gunana jadi tudung ibas Sumalin Jabu bage pe kerja Erdemu Bayu.  Igunaken pe jadi ndawa anak-anak janah jadi lembut anak-anak e.

12. Uis Perembah. Uis Perembah rupana megara, ercurak mbentar ras megersing, mekapal ras pake ambu-ambu.  Gunana jadi perembah, sini ibere kalimbubu ibas lakon adat erpalasken totona gelah bere-berena e sehat-sehat, lampas mbelin, kune sirang lau ras beras maka sirang ernande-erbapa.

13. Uis Jujung-jujungen. Uis jujung-jujungen rupana narus-narus megersing, pake benang emas, mekapal ras ambu-ambuna pe eremas-emas,  Gunana lako jadi jujung-jujungen si itama ibabo tudung.  Semalna ipake Kemberahen Aron ibas Guro-guro Aron.

14. Uis Nipes Ragi Mbacang. Rupana megara ras lit garis-garis mbentar, menipes ras lalit ambu-ambuna.  Gunana jadi lange-langge si ipake tupung lit lako-lakon adat  ibas paksa keriahen.

15. Uis Nipes Padang Rusak. Uis enda rupana megara janah melala ornamen-ornamenna si mejile.  Gunana jadi langge-langge ras jadi selempang man si diberu.

16. Uis Nipes Mangiring. Uis Nipes enda rupana megara ras ergaris-garis mbentar, menipes janah lalit ambu-ambuna.  Bali ras uis Nipes Padang Rusak gunana e me kap jadi langge-langge ras jadi selempang diberu.

17. Uis Nipes Benang Iring. Rupana megara ergaris-garis mbentar itambah benang-benang emas.  Uis enda pe menipes ras la erambu-ambu.  Gunana pe jadi langge-langge ras jadi selempang diberu.

Enda me erbage-bage uis kalak Karo.  Ija nge ndia banci siidah Kalak Karo eruisken uis si bagenda rupana? Mungkin arus si-google gambar-gambar siadi, banci denga siidah piga-piga. Genduari enggo buen ipake uis Karo enda ertemanken uis Obos e me: (baju, saluar ras pe jas) tambah kampuh man si dilaki tah pe uis Jawa (kebaya) ras kelengkapenna si deban. Uis Karo genduari enda ipake tupung lit lako-lakon adat tah adi lit perayan-perayan.

Genduari enda teridah maka i Gereja-gereja lit kesedaren makeken uis Karo tupung lit perayan-perayan Gereja subuk ia ibas Perayan Natal, Perayan Paska bage pe bas perlumban-perlumban pemeriahen pesta. Si enda tentu sada kinata si mehuli sabap alu bage tetap denga isuanken man kalak si nguda denga ate keleng ras ate ngena nangdangi uis Karo selaku tading-tadingen nini-nininta si jadi tanda bage pe toto selaku kalak Karo.

Isuratken mulihi, ersumbul arah A.G. Sitepu, Mengenal Seni Kerajinan Tradisional Karo, seri B, Toko Barus, 1980.)