DOAH DIDONG

Betlehem Ketaren (Berastagi)

Doah didong é me perbahanen sekalak si roah tah pé ngembah danak-danak ras gelah si nioah ula ngandung. Ngadi dengé-dengéna janah tunduh ibas gurung si rembah. Iperdiatéken pé danak-danak é salu setengah rendé setengah erbelas nina si rembah. ”Oah.. oah … ooo… ooo … ué … ué… oah… oah,” nina janah nepuki kundul-kundul danak-danak é.
Bas lakon tumbuk erjabu, tupung tegun Anak Beru Sinereh ngerana, isehkenna me kekelengenna nangdangi perménna alu telah-telah. Kata ajar dingen toto gelah tutus até si erjabu njabuken bana dingen mejuah-juah, sangap encari ras cawir metua orangtua si pejabuken anak. Kenca dung Anak Beru Tua erbelas iumputi Anak Beru Cekuh Baka bagepe Anak Beru Sepemeren. Sope seh ku Anak Beru Menteri ras ku Anak Beru Singukuri, isehken me ku teran Sirembah Kulau e (turang bapa si sereh) lako erbelas nehken katana.
Teran Sirembah Kulau, bagi gelarna, ia me si ndubé mbaba si sereh e ku lau, si petandakensa danak-danak é ku sekelawet arah lau dingen peridisa, nemburisa rikut nggulasahisa gelah ula bergehen. Labo terjeng wari tupung lakon é saja. Sope tubuh pé danak-danak é, bibi-bibina terarap-arap gelah si tubuh anak diberu. Kenca tubuh nina maka anak diberu é sekerajangenna. Ia si nehken gelar guna danak-danak é, ras nehken tanggungjabapna ibas segedang-gedang paksa. Ia si arus ertanggungjabap lako ngepkepsa, jadi perménna inganna ergani-gani dingen pegedang-gedang pemeteh dingen kepentarenna gelah metunggung pepagin lako muat bagin ibas ia sada tegun dingen sada rasasen si  sué ras kesemalen nggeluh lako ras-ras ngamati Kalimbubu dingen ras-ras ka dat kekelengen ibas Kalimbubu nari.
Tambah-tambah pé tupung reh belinna batang daging permenna, tambah-tambah ka  jadi até bibina sabap perménna é me si ngumban dirina, dingen nangdangi perménna é niarapknna masin katana. Lako me pagin anakna erdemu ras Kalimbubu ibas pemanteken jabu si mbaru. Émaka, Doah Didong si isehken Sirembah Kulau é bagi gelarna Doah Didong banci setengah rendé setengah erbelas ras banci pé setengah ngandung erkitéken aru dingen morah aténa lakon tumbuk erjabu é. Perménna berkat lawes ku jabu nu kalak. La niarapna iluhna  mambur erdiré-diré mbaba kata telah si nisehken. Lit pé Doah Didong si megati denga si begi tep-tep kerja tumbuk erjabu bagenda:
Kudoahdidongken ka me kam sendah permén bibina. Doah… doah… didong … permén bibina. Énda enggo talu kepé kam sendah, bibi, kutadingken me kam ras impalku Karo mergana lako erjabu ras impalku Ginting mergana énda, nindu bangku, teman bibina … ia… ah… sedakna é ari… Doah… doah… erpengué kal ndubé ranandu nangdangi impalndu Karo mergana parang anak sintua é, ari… megedang kal akap kami ras bengkilandu. Émaka uga ngé ningku pagi erkata kempak impalndu Karo mergana si paksana erlajang bana é, anakku … ia… ah… Émaka bagém permén bibina, temanku metua la surung! La gia padanndu erdemu ras impalndu Karo mergana, ari… Kudoahdidongken ka me kam sendah duana ras impalndu si anak kami me akap kami.
Manjar-anjar reh me duana si erjabu ku lebé-lebé si erdoah janahna ncekuh kampilna tahpé koncangna lako nalamken ulihna latih man bibina é:
Émaka bagém beru Tarigan, teman bibina. Tutuslah aténdu erjabu ras Ginting mergana. Kelengi pagi jabundu, kelenglah aténdu perbulangenndu terlebih-lebih pé bibi bengkilandu bagi keleng até kami man bandu. Doah… didong atéku keleng atéku jadi. Kam pé anakku, Ginting mergana, sehat-sehatlah kam duana, jumpa matawari ras bulan kam. Sangap encari ras ertuah bayak kam, seh bagi si nisura-surakenndu …. Iyah, enggo mé, yah… Bagé pé kam kerina turang, éda kami si bapa dingen nandé kami kin niakap kami, doah didong, turang parang anak sintua, bagepé kam turang anak sintengah kerina ras kam turang kami parang anak si nguda ras kerina nande kemberahen. Turang, kam pé mejuah-juah kam pejabuken permén kami, sehat-sehatlah kerina dingen cawir kam metua jadi penggurun dingen si ngkelengi kami. Ertoto ka lah kam kerina turang, éda…
Manjar-anjar  turang ras éda si erdidong ndeheri ia dingen nalamisa dingen nehken kai si enggo icekuhna ibas gajut-gajuna nari:
Gelah kami pé Anak Berundu tetap megegeh ndalanken dahin kami ibas kerina penuruhenndu. Sehat-sehat dingen mejuah-juah kami kerina Anak Berundu. Bujur ras mejuah-juah kita kerina.
Nina tua-tua sidekah, kata me tabas, bulung-bulung si jadi tambar, jadi ningen jadi, mbera Dibata Simasu-masu. Kai-kai gia, kitik pé adi erpalasken kekelengen mbaba kiniulin. Perlu ipetunggung dingen ipepantek guna maba kejuah-juahen, tapi peratén Dibata pé si meganjangna dingen erpalasken katana maka persadan metunggung.
Toto ras pengatanken bujur kalak si rulih tuhu-tuhu metunggung, tapi erpalasken kiniteken maka Dibata Siperkuah dingen Siperkeleng, sora nderkuh pusuh kalak si la metunggung ras si lit ibas kiniseran la pernah mulih alu ngambé-ngambé. Bujur.

Sorasirulo.com