ANAK BERU SI NGIKURI TAH SI NGUKURI?

FIRDAUS DEPARI

Merga si lima Tutur Siwaluh Rakut Sitelu, Perkadekaden Sisepuludua Tambah Sada, e me kap palas kegeluhen kalak Karo.

“O...nini bulang  banci kang kita  ngerana kentisik?Ercakap cakap ateku kita?”

 “Kerna kai  kin sungkun sungkun ndu kempu nini bulangna?”

“Bagenda bulang, dahndu kalak Karo enda nggeluh erpalasken peradaten,  kai kin antusenna, Anak Beru e nini bulang?”

“Bagenda kempu, kerna kata ndu e na  tah kin kerna penungkunendu kempu, Anak Beru ibahan gelarna guna, ndungi, ngaturken, nikapken, ngerancang, alu ertanggungjabap ibas sada lakon tah kerja si kitik, kerja sintengah, kerja  sintua, tah kin erceda ate bage pe ermeriah ukur!”

“Eah nibulang si ituriken ndu ena enggo semal kubegiken, lakin Anak Beru e seri ras anak si diberu si ndungi dahin bulang?”

     

 “Ibas dahin seri anak si diberu ras si dilaki lako ndahi ken dingen pesikap dingen petunggungken kerja kalimbubu.”

“Bagenda ka nini bulang, kerna pembagin tah kin pembagin Anak Beru, lit ia Anak Beru Cekuh Baka, lit ka ia Anak Beru Menteri, pas nge bulang?”

“Kerna pas,  enggo ngena pas tapi lit si kurang kempu nini bulangna...”

“E gia uga kin kerna  Anak Beru Cekuh Baka e, ni bulang, kai kai saja kin sini Cekuhna tah kin cekuh cekuh kin dahin na bas kerja kalimbubuna?”

      

“Andiko kempu nini bulangna, kam enggo lalar kap ukurndu e.., Anak Beru Cekuh Baka, ia me si  tergelar si ngaturken kerna  perbeliten ibas lakon tah ia ermeriah ukur tah erceda ate, dingen ia me igelari  Anak Beru Dareh, si iertiken Cekuh Baka,  ia me si banci seh ku keben  tah kin ku lemari guna cigargar adi iperluken Kalimbubuna, ras enggo kin ipadanken maka  dareh si lit ibas daging kulana seri ras dareh Kalimbubuna, tah kin turang arah nandena dingen Kalimbubuna e ka pepagin jadi Kalimbubu Simada dareh ibas lakon si debanen ras Kalimbubuna e kam pepagin si jadi si ngalo Ulu Emas ibas lakon si deban, lalap ia sendalanen kempu nini bulangna.”

“Cekuh  Baka ningen e kai bulang?”

      

“Bagenda kempu, Baka ningen e, e me  sada ingan  tah kin banci ertiken ingan duit, beras, emas, tah kin ia pirak, banci ka ia ingan pangan tah kin ia bagi sada rupa, ertina ia me si erhak lako nalangi tah kin ia banci  ndayaken ku tiga lako ndayaken pirak kutiga guna ngalari perutangen kerja tah kin guna pemenan kerja.”

“Engkai maka ikataken  Cekuh  nibulang, uga maka la Sinalangi Baka?”

“Oh kempu, ena enggo sada penungkunen uga ningku  ya, si tuhuna kal kempu cekuh sini ertiken emkap kerna duit ia kempu, tunggungen ia mbelaskenca bage.  Lit cakap runggu kempu nina, bagenda. Anak Beru kami... cuba cekuh gajutndu leve, pagi nangkih nangkih  matawari e, je pepagi sidungi taktak perduitenta. “Enggo dung ban kami anak berundu, kalimbubu kami... kerna isi gajutndu pe kalimbubu enggo ieteh kami sope  pe icekuhndu, sabap  si lit ibas gajut kami e pe reh na ibas kam nari kalimbubu kami.”, nina Anak Beru kempak Kalimbubuna. Bage ia  kempu, labo ikataken talangi gelah enggo ertindu!”

“Ue bulang, gelah aku ngerti nge ateku lang mabanci  nge kam la ku orati? Siterusken ka nini bulang...”

“E..kam nge kempu siterusken nindu siterusken, lang pe banci ...”

“Uga ka kin ia si ikataken Anak Beru Menteri, tah kin Anak Beru Siminteri?”

     

 “Sitorosi ka ia kempu, ndai ma enggo ibenai Anak Beru Dareh si ikataken si Cekuh Baka, jenari iteruske ku Anak Beru Menteri si igelari Anak Beru si ndungi  dahin. Bengket ia arah turang si Cekuh Baka,  maka ia pe engkawali turangna ras bulangenna lako pesikap kerja guna ertanggungjabap bas ndungi dahin, ibas dahin si bagenda rupa Anak Beru  Menteri erbenting kibul guna ndahiken dahin. Adi bas dahin si deban ka kempu nini bulangna Anak Beru Menteri ibas sada paksa, erbahan kerja maka Kalimbubu si idungina kerjana e, pepagin jadi Kalimbubu si Ngalo Berebere, kempu nini bulangna, dingen ia lalap ertanggung jabap ibas lakon kerja e.”

“Jadi nangdangi tah man ise nge Anak Beru Menteri e mbiar?”

“Bagenda kempu, adi ibas peradaten la mehuli ikataken mbiar, tapi palas peradaten emkap keleng ate, labo mbiar tapi kerina irakut alu kekelengen bage ia...”

“Ooo, kekelengen me, nini bulang e enggo payo. Bage nda ka sada nari bulang, si la tertangkeli aku tah kin si man ukurenku nini bulang. Uga kin kerna anak Beru Singikuri,   tah kin Anak Beru Singukuri ?”

“Ue kerna si ena o kempu nini bulangna, ia bagenda. Ibenai Anak Beru Cekuh Baka, e maka Anak Beru Menteri, iumputi ku Anak Beru Singukuri, sekali nari kal kempu nini bulangna, labo Singikuri tapi ia Singukuri kerna kai kai si la dung tah kin si langa tembe ibas lakon kerja e.”

“Uga kerna taktak perdalanenna ni bulang?”

“Begiken kempu, ia bengket erkiteken Anak Beru Menteri.  Anak Beru Menteri idur Kalimbubuna ras Anak Beru Cekuh Baka idur Puang Kalimbubuna, jadi Anak Beru Singukuri enda, kempu nibulangna, si man kawalenna kal si tuhuna emkap Anak Beru Menteri gelah enggo iangkandu!”

“Lit sitik nari kal langa kuantusi bulang, uga kinilitenna tah kin dahin si man dahinken Anak Beru Singukuri e bulang?”

“Kerna si ena kempu, Anak Beru Singukuri tuhu latih dahinna ras melala. Adi jaman si noria ia, naruhi lau sabah nari, muat umbut, muat bohan, ngelegi ranting ku kerangen, ngkuruk lubang si mate mate, ras nai banci ikut ngelanja  si mate mate ku pendawan.”

“Mehuli kal kap e bulang bas dahin e. Jenari kerna panggung nehken kata, ras ngalo Batu si malemmalem, dat bagin kin Anak Beru Singukuri e, bulang?”

“Adi ibas seh paksa nehken kata, ije ibereken kang panggung ngerana man Anak Beru Singukuri e, kempu, alu piga dalanen, janah lit panggungna ngerana. Tapi, Anak Beru Singukuri la ngalo Batu Simalem tah kin ia la dat pengalon kempu. Enggo tangkas bandu kempu?”

“Ee, gelapna bulang, ertina kal bulang la dat beligan, tapi lit panggung ngerana, ee nggo payo bulang lanai Anak Beru Singukuri, tapi Anak Beru Singikuri tah pe Anak Beru ikur me bulang?”

     

 “O kempu, ula kam rukur bagi jelma si la lit perukurenna. Apai kin ergan sen asa kekelengen?  E tentu kekelengen! Bage ka kin peradaten kempu. Ija pagi kam ngerana ah Anak Beru Singukuri, labo lit ertina tah kin seri ras Anak Beru Singikuri nindu. Maka kam enggo i jengkali kalak ula sambarindu gelarna, ija sambarindu kempu ije iakap kalak kam la radat. Kerja si idahindu e tah kin si idungindu e, lit la lap je erdalin dareh si telu. Inget kempu  lit kerjandu  sempa dingen reh kerina puang nupuangndu. La kin e kinimalemen  ate? E maka kempu nibulangna, seri ka nge ras kam Anak Beru Singukuri, ia pe selaku puang nupuang Kalimbubu  labo ka ngalo Batu Simalemmalem, tapi tegun ngerana lit kang bas ia kempu. Sekali nari kempu, kekelengen e me si jadi palas bas kegeluhen enda. Lang ma mejile dingen metunggung penggelaren Anak Beru Singukuri e, si ibahan nini nininta nai kempu, si ibahan ndu ena e la kuakap merandal megikensa. Uga kempu nini bulangna?”

“Bujur  melala lebe nibulang,  lit kari si kurang lebihna banci aku reh denga nibulang?”

      

“Reh kam kempu. Lalap talang pintun kempu, terlebih kita enggo ka ku Berita Simeriah enda kempu nini bulangna. Kuajari ka kam e, enggo aku muat sada bagin  bas Gerejanta kerna naksiken ras meritaken Berita  Simeriah kempu!”

“Mejuah juah ni bulang, nina Ralinggungi!”

.(Bp filo Barnes depary)