PULU BALANG (Sada Perdalanen Kiniteken Siadi)

Adi erlajar kita nangdangi perdalanenkegeluhen kalak kita Karo ibenai ibas langa reh Berita Simeriah emkap kiniteken si pemena jenari kenca i pengaruhi jaman kiniteken India nari emkap Hindu jenari itorosi ku jaman kinirehen agama Islam e maka seh kujaman kolonial Belanda. Rehna kiniteken emkap Agama Kristen ras agama Katolik.

 

Sope denga lit agama si mbaru, kiniteken kalak Karo enggo lit man Dibata. Kiniteken si bagenda rupa nikataken tah pe igelari “perbegu”. Kiniteken man Dibata, tek man kuasa si la idah. Rikutken kiniteken agama perbegu, maka manusia terjadi ibas kula, tendi ras kesah.

Erti perbegu, emkap tendi kalak si enggo mate. Adi sekalak perbegu mate, kulana mulih ku taneh, dingen darehna mulih ku lau, kesahna mulihken ku angin, tendina lawes jadi begu. Kalak Perbegu (kiniteken si Pemena) tek man Dibata si telu ras kuasa tah gegeh si la idah.

Dibata si telu sue ras kiniteken si pemena emkap: Dibata Datas, e me  Guru Batara, Dibata si ngerajai langit. Dibata Tengah Semal igelari Tuan padukah ni Aji e me si erkuasa i bagin tengah tah pe itengah doni enda. Dibata Teruh doni, semal ka pe igelari Dibata Banua Koling. Kalak Karo siadi jine pe erkiniteken si pemena tek nangdangi ketubuhen jelma ku pertibi enda. 

      

Lit empat Puangna, e me:

1.Erpuangken Taneh; 2.Erpuangken Lau; 3.Erpuangken  Angin; 4.Erpuangken Api. (Lentera  Kehidupan Orang Karo Dalam Berbudaya, Tarigan  Sarjani Drs,MSP)

     

Nina si noria guna nghamati Dibata Teruh ibahan sada ingan guna nghamati ras mindo penampat gelah kerina kai kai si lit bas kegeluhen gelah tetap lit si njagai kuta ingan tading piga piga terpuk merga tah pe piga piga kesain kuta. Igelari emkap Pulu Balang.

      

Nina tua tua si dekah pulu balang enda mbuktikan maka kalak Karo nai nari enggo tek kal man Dibata. Jaman si enda pas kal ibas jaman pemanteken kuta si bas sada sada kuta si ipantekken kalak si lit kin beteh betehenna si ibereken dibata man bana sue ras kiniteken si pemena.

     

Kerna tak-tak percibal pulu balang enda nina urang tua si adi e itentuken jelma bas kuta e tah kin ia  arah matawari pultak tah kin ia arah mata wari ben tah pe ia  arah kahe tah kin ia rah kolu kuta. Adi nai sada kuta semal ikelewti alu sada kerangen si kitik tah pe igelari kerabangen kuta tah pagar kuta e maka; pulu balang ia lit ideher kerangen kuta, reh nina ka tua tua siadi, bagenda.

    

 “Adingerana kita kerna pulu balang kempu nini bulangna, ije teridah tuhu lit kemalemen ate."

Kai maka bage nindu nibulang?”

“Bagenda kempu, ibas pulu balang kerina enggo isuanken.

“Kai kai saja kin isuanken tah itamaken ku ingane bulang?”

“Bagenda kempu. nai tehndu lit igelari musuh berngi tah pe kalak lompat berngi? Adi sekalak manusia reh kukutanta tah piga piga jelma atena kukutanta ndarami imbangna tah nerang kuta nta pulu balang e ersoraa nandaken lit kalak atena kubas kutanta.”

“Uga nge sorana bulang?”

“Banci bagi sora Bindawas, kempu, erdeso bagi angin si meter kerina kayu si lit ideher pulu balang erdeso, banci ka sora kalak nderkuh. Banci ka sora kalak tangis tangis tah kin bagi sora perik lego lego sorana seh kal linona, kempu. Tah bagi sora kalak ersiul siul si melino tah pe sorana seh kal gerningna maun maun, kempu,  bagi sora kalak ergendang adi begiken la  terbegi adi tinggel ken la tertinggelken.”

“Katawari nge pulu balang enda mberitaken lit si la mehuli reh kutengah kutanta bulang?”

“Bagenda kempu. Kerina anak kuta arus metengget, metinggel, dingen megermet nangdangi tanda si ibereken pulu balang. La ertentun sabap pinangko la eteh katawari ia reh ku kuta lako erbahan si la mehuli.”

“Bagenda ka bulang, adi kalak si lit pemetehna tah kin ia guru perdewal dewal tah kin ia igelari pawang tah kin la ia mbiar kai pe bulang, atena ku kutanta erbahan si la mehuli ngasup nge pulu baleng ngataken tah mereken tanda man kerina anak kuta e bulang?”

“O, adi kerna si bagena kempu sitik kal pe la mbiar pulu balang!”

“Kai maka bage nindu bulang?”

“Pulubalang emkap pengian kuta, kempu. Banci igelari kerinana anak kuta nehken kehamaten nangdangi si ngian kuta kempu, ije lit ibahan sada ingan lako tek dingen percaya maka kerina kuasa tah bala banci itulakken ibas ingan si enda nari kempu.”

“Kai  kai saja kin sini lit bas pulu balang e bulang?”

“Bagenda kempu. Ibas ingan pulu balang e enggo pasti lit je ingan ersembah  banci ia  batar batar persembahen, si ia segi telu kempu. Si lit bas kutanta labo ndauh kal ras kuta si deban. Lit ka ije ibahan sada ciker si meganjang kempu itamaken ka benderana dagangen mbentar tah capna benang si  telu rupa  iujung ciker. Je nari i olah ken ka kudin taneh ras  piga piga rupa lit kai sangke sempilet, lit batang kaling juhang, lit ka ije  batang selantam, lit ka ije batang jabi jabi, lit ka ija  piga piga batang buluh, ras lit je piga piga batang galuh. Si perluna kal galuh si tabar ras si debanna, kempu.”

“Kerna penungkunenku ndai bulang langa itorosindu.”

“O, bagenda kempu, kai pe kinibeluhenna, kai pe kinijagonna pitu lapis pe pengenehen matana asal ilat bas ukur na si la mehuli tah kin atena lako nangko manuk pegeng gelah ibohani  nina nambahi pemetehna, la ermetua-metuasa kempu enggo pasti pulu balang enda ersora tah kin ia pedarat sora si megerning man anak kuta.”

“Bagenda ka, bulang, penungkunen ku, ise kin si malu penganak sora si erpong pong adi tinggelken la begi ras  adi begiken la terbegi. Kai kin ertina e bulang?”

“Kerna penungkunendu ena kempu nini bulangna mberat mberat menahang kal kap kuakap nurikensa pas bagi ngerudangken bunga palas. Tengteng ningen la pas, la pas ningen tengteng, kempu nini bulangna. Bagenda kempu, enda me tanda kalak Karo nai nari enggo erkiniteken tek man dibata si niidas tek man dibata si niitengah teh man dibata si iteruh kempu. Sekalinari, bulang, ise kin si ersiul si seh kal lino na si banci nurahken kiniarun ate e bulang? Sekali  nari kempu, enda me kiniteken kalak Karo si pemena kempu nini bulangna.”

“Eah bulang, jadi si erbahan angin bali ras Bindawas ras si erbahan sora gendang ras si erbahan sora siul siul bagi sora perik si melenget, E me kap gegeh si la idah manusia tapi iantusi manusia tah kin anak kuta ija nari reh na sora si bagenda rupana. Rehna ibas pulu balang nari lako njagai kerina si nilit ibas kuta tah kin ia asuh asuhen tah kin ia sinuan-sinuan bage pe erta anak kuta si debanna ma bage ia bulang?”

“Payo ka kempu!”

“Sada nari bulang adi Anak Perana atena lako ndarami teman na nggeluh tah kin lit idah na singuda-nguda si meparas. Reh anak perana kuta kalak nari ku kutanta atena erkemberahenken beru Karosekali, kerna si enda bulang erdengung kin pulu baleng ni bulang?”

“Eah mulih ulih kap cakap ta e, kempu. Bagi perdalan anak pari, asal ukurna mehuli dingen la  lit ukurna si ilat sora kai pe la lit ibas pulu balang nari.”

“Bujur bulang gelah ku eteh ngatur perdalan. Sada nari kal bulang?”

“Telu pe labo dalih kempu.”

“Bagenda bulang banci kin ngerana pulu balang e bulang?”

“Jabapna kempu adi kalak si reh e pemetehna ngelebihi asa jelma si deban, maka pulu balang e ngerana, kempu, nandangi kalak si reh e  alu lit sora tapi jelma na la idah kempu e maka kalak enda sijalapen.”

“Siperlu bangku pulu balang banci ngerana e saja bulang. Siperpudi, penungkunenku bulang,  pulu balang enda mbaba kemalemen ate tah kin kamalangen ate ninibulang?”

 “Bage nda kempu, ula kam silap ibas pengian kuta enda kerina kai pe lit ije kerina batang si erbuah tahkin ia guna pulungen tawar seh ku kesaya kesaya lit ije janah lit kang ije isuanken batang Lateng kempu.”

“Man kai e bulang?”

“Ibas sada paksa enda iperluken guna tambar kempu. Ras perkakas jadi ampang ampang nagdangi musuh berngi  seh pe ku si niperluken bagi bohan rires tahkin bulung birah jine guna kerja tahun enggo isikapken ije. Jadi pulu balang e, kesain kerina anak kuta kempu. Tapi ije lit pangan pangan kempu,  si  empuna kerina anak kuta.”

     

“Ula kam silap kempu, sekelewat pulu balang e kerangen kuta. Ibas majekken  rumah adat. Lit nina si noria iperluken telu batang kayu emkap: batang kayu Nderasi, si ertina emkap kejuah kuahen tendi ras kula; batang kayu Ambat Tuah, ertina emkap ketuhan tah ndatken tuah; batang kayu Sibar Anak, ertina emkap kesangapen tah kin rejeki.”

     

“E maka ersada teluna kayu enda: Tuah raduken Sangap dingen dat Kejuah-juahen lako ngiani rumah si ipajekken. Pulu balang sada tanda tah bukti nangdangi kita kalak Karo enggo erkiniteken nangdangi sada kuasa si niluar ibas diri manusia nari tapi enda lalap siidah kiniteken si pemena pe lalap nuju ku langit bage pe kerna kai kai si nilit ibas pulu balang enda nuduh ken kekelengen si la terbeligai nangdangi kini ersadaan arih ibas sada kuta lako nerusken kegeluhen i babo pertibi enda iteruh perkuah ate Dibata sila ersibar kuasana gundari seh rasa lalap.”

  
Bp filobarnes depari.