ARON SI NURIA RAS SI GUNDARI

 DINAMIS BANGUN

    

Aron menurut si nuria e me kap, Anak Perana ras Singuda-nguda si ras erdahin kujuma. Taneh Karo bagi enggo siantusi,  palas pencarinna e me kap ibas juma nari (pertanian). Adi erdahin kujuma melala kel melala usur si man dahin: encameti juma si peren salu cuan/cangkul, tah  ngembak, si biasa jadi erkiteken juma e enggo la isuani, janah juma e pe peren kal dukut rih, talu dagang, dukut sampun, soga rih, duri arun entah pe ikataken sikerput bage pe ulam-ulam, sibogori rsd.

      

Juma e peren janah mbelang ka, e maka adi sisada ndahiken juma e, ndekah  maka dung. Enca si kujuma pe melungen ka akapna sisada erdahin i juma e. E maka tep-tep kuta i bentuk me aron. Semalna 4 kalak Anak Perana ras 4 kalak Singuda-nguda. Jumlahna derek kang 3 kalak Anak Perana 3 kalak Singuda-nguda, 7 diberu derek kang 5 anak perana, labo lit patoken jumlahna. Tujuananna maka iban aron gelah erdahin la bosan, bekas pe mbelang janah ercakap-cakap ncangkulken cuan ku taneh erlumba-lumba dung ndungi tegun. Apai ka lit aron Singuda-nguda janah lit ka aron Anak Perana e, erban lit atena ngena ibas aron Singuda-nguda e, tentu reh semangatna ia erdahin gelah dat pujin arah aron diberu si atena ngena.

Umpama aron anak perana merga Perangin-angin, si diberu e rembang beru Karo, beru puhun, turang besan, impalna kepe. Reh nina si beru Karo: “megegeh kal kam erdahin mama nangin, bicara kam jadi kela bapa/nande, malem janah cocok kal nge. Lanai peren juma i bandu.” Reh nina aron Anak Perana: “adi kuidah kam je, lebih kin gegeh ku erdahin e.”

“Adi bage kin enggo sura-surandu dung peranin e suruh anak berundu ndahi kalimbubunta, gelah aronta e lanai sirang”,  nina bage beru Karo erbelas. Reh ka nina aron anak perana: “Matawari si pukul siwah, Deleng sinabung mbue kertahna, sadawari kena la kuidah, timbang setahun ku akap dekahna”.Janah erpantun la gejap dahin enggo mbelang bekasna janah juma pe mesai, enggo derek juma e i suani.

Juma i cameti tujuanna gelah ierdangi, nuan page biasana antara bulan Juni, Juli, Agustus, September. E maka melala kuta ije merdang-merdem. Adi enggo lewat bulan e, umpama bulan Oktober, November Desember danci nuan jaung, cina, tomat, kentang, arcis, bontis, selada, kol, sayur pait, sayur manis, pere, wortel, kacang panjang rsd.

Jadi aron sada terpuk erdahin kujuma, untuk nampati pendahin orang tuana. Kimaun aron umpamana lit 8 kalak, itentuken juma aron siapai arus leben idahiken, erkiteken juma enggo peren. Enca dung icameti juma aron si A lanjut kujuma aron si B bage me siterusna. Piah dungna ndatken temanna arih-arih, enca erjabu.

E maka masa si nuria juma labo lit peren, erkiteken cukup tenaga Anak Perana ras Singuda-nguda. Alu raron danci ka ibahan janah-janah ndarami ate ngena (jodoh). Adi waktu tahun 1945-1965 Anak Perana ras Singuda-singuda teremen lulus SMP saja. Enggo tading kuta, pendahin kujuma. Kidekah kujuma, Anak Perana dahinna erburu, ngaci perik, pekarang lembu ras peluar lembu, ermakan, ras muat nakan lembu. Jam 8 erpagi-pagi aron Singuda-nguda adi la lit juma man cameten ndurung ku sabah, tah pe pe ku parik, waktu si e nurung sunge-sunge kaperas, sulung-sulung, cibakut nukah denga muatsa.

E maka ukur pe labo ndauh kabang-kabang, ersura megan-jang. Masa si e alat pertanian pe bage enda denga: Tenggala, bahanna i bas kayu ras pangguh (batang pola i belah) e gunana nenggala, derek i tarik alu tenaga manusia danci ka tenaga kerbo/lembu; Tenggala roda, enda i gunaken, adi page enggo 40 wari, enda danci i sorong sekalak saja. Tenggala roda praktis ras ekonomis untuk merdang page; Siser terter, guna merataken taneh; Cuan, bahanna besi, tangkena kayu, guna mbatur-mbaturi ungguken taneh, bage pe engkikis dukut; Cangkul, alat nagkul bahanna besi tankena kayu, gedangna kira-kira 90 cm; Sabi-sabi, alat motong dukut untuk muat gagaten, nabi page; Paduk-paduk, kayu bage bentuk suri lit tangkena, pepulung dukut; Roka: guna erbahan petak-petak juma si enggo i camet bersih, gelah nukah nuan page/merdang; Perlebeng, bahanna kayu igul gedang, gedangna 125 cm gunana gelugur lubang/nuan jaung; ras Pangkur-pangkur, ukuran gedang kira-kira 1 m, bentuk martel, gunana mekpek taneh piher gelah megabur nuan sinuan, penukah mehumur.

Aron Sigundari

     Aron sigundari enggo beda kal ras aron si nai/si adi. Aron si nai labo rupah tapi gelah ngaloken gegeh giliren kujuma sekalak-sekalak. Aron si gundari ikataken si ngemo: e me ibas lit juma bapa Girik i Batukarang, erkiteken la nai terdahina encametsa, erkiteken sibuk Caleg piahna juma peren.

E maka suruhna kalak si deban si ngemo. Aron rata-rata mulai erdahin jam 8 wib asa jam 12 wib, jam 13.00 istirahat, jam 14.00-17.00. Asa beliganna kira-kira Cuma 8 jam erdahin. Janah ibas jaman si gundari enda cari makan melala ilakoken terjeng ngemo/buruh upah rata-rata Rp.50.000. Adi lawes kita ku Berastagi i dalan belin i deher stasiun melala aron ngemo ndarami dahin bagi cara si gundari. Perkakasna labo lit babana. Si mada juma me si arus mesikap alat si perluken: cangkul ntahpe paduk-paduk. Si ngemo e i angkut tare motor pick-up. Nakan ciger aron si ngemo, iadang tah lang harus i janjiken. “Kam ngemo baba nakanndu ciger” tah i tukur nakanna nasi campur potong upah. Aron si gundari e semalna e me kalak Jawa, kalak Teba, kalak Simalungen kalak Nias, kalak Minang si mbaru reh ku Taneh Karo enda. Teridah tuhu maka Taneh Karo enda taneh si malem man inganen ras man tandangen enterem bangsa manusia.

 
     Bage me turi-turin kerna aron si nuria ras aron si gundari. (DB).