RUMAH ADAT SIWALUH JABU

Isuratken Dinamis Bangun

 

Rumah adat karo, rusur  i kataken rumah siwaluh jabu. Engkai maka i kataken rumah adat karo rumah siwaluh jabu?. Enda erkiteken setiap rumah adat karo i bangun singianisa lit 8 jabu atau 8 kepala rumah tangga, bentuk bangunan lit 2 macam:

 1. Rumah adat biasa

 2. Rumah anjung-anjung

Rumah adat biasa lit 2 ayo, tandukna pe 2 stel ngenca. Rumah adat anjung-anjungen lit ayona 8, ras tandukna pe 8 stel.

            

Adi sinin ku bagas rumah adat e, beda ras rumah sigundari. Sebab, ibas rumah lit (waluh) jabu, lit tiap jabu daliken ingan erdakan, datas ingan erdakan  lit para ingan ranting man penutung enggarai api erdakan. Sebab, jaman si adi sekitar 1945-1960 lenga lit kompor , ras gas elpiji ras pe listrik.

          

Pada umumna, si ngiani jabu siwaluh jabu, lit nge pertalian keluarga menurut merga silima tutur siwaluh. Rumah adat karo siwaluh jabu bagi sienggo sieteh erpalas tiang kayu. Teruh rumah adat e, derek karang asuh-asuhen ternak lembu, kambing ras sidebanna. Halamen depan atau jabuna kayu, jabu lepar benak kayu ras jabu ujung kayu, ras jabu lepar ujung kayu, i bahan ture. Ture e buluh berteng, i datas ture emeberfungsi ingan nuci kudin, piring, ras sekaligus wc darurat. Simbersihkenca adi nai babi sebab nai babi pulah-pulah tengah kesain, labo i karangken. Terlepas pro><kontra, bage denga me kegeluhen masyarakat karo, wari si e.

           

Kegeluhan ibas jabu rumah siwaluh jabu diatur erpalasken kebiasaan adat bersifat lokal, itentuken singiani rumah adat e. Setiap rumah adat rumah siwaluh jabu labo seri ketentuen-ketentuenna. Ise si ngelanggar ketentuen e, ia kena sanksi/hukumen. Sanksi sikenaken tergantung galang kitikna pelanggaren sinilakokenna. Contona: adi sekalak jabu menurut enggo i tentuken, ngeru pintu/nampaken palang pintu la ingetna, ikenaken sanksi mbersihken kolong ras halamen rumah adat. Enda nandaken gelah si enggo i tentuken si ngeruk pintu ertanggung  jawab, ula melantar. Sabap, kelupan e merugiken, derek kalak si deban nangko kurumah, tentuna si kebenen ndele ate kepala keluargana.

          

Si enggo piga-piga kali ngelanggar  tanggung  jawab atau lapernah mediate tugasna sinigelari “kerin” lit nge sanksi simberat. Sanksi simberat e, emekap i pelawes ibas rumah adat e nari. Pengusiren jabu erkiteken kepala keluarga dianggap la matuhi peraturen adat si berlaku ibas jabu e. Emaka perban sada jabu si ikut ibas rumah siwaluh jabu ndai enggo pedarat, tentu lanai lit rumahna. Emaka ibanna me sapona i juma inganna sada jabu tading. Emaka enggo i kataken bapa si anu ah, ndai ras  ndehara ras anak-anakna barong i juma. Bage me kira-kira terjadina barong. Melala dungna kalak erbarong i juma. Barong e berubah jadi kesain, kesain eme jadi kuta(desa).

             

Rumah adat i bangun secara gotong royong. Kerina bahan-bahan tarumna i buat ijuk batang pola. Tekang, tiang i buat i kerangen nari. Dindingna pe papan, kayu i belah  jadi  papan. Dinding, beloti rabung, sada pe labo make paku sebab nai lenga bo lit paku man tukuren. Pabrik paku pe lenga bo lit, emaka kerina i iket salu nali. Nali e i unte ibas ijuk nari erban nali pengiket si perlu man iketen untuk rumah adat.

Susunen  jabu-jabu bas bas rumah adat Karo

              

Gelah enggo tangkas man banta susunen jabu rukut penggelaren siwaluh jabu ibas rumah adat.

1	5	7	4
3	8	6	2

Jabu nomor 1 igelari jabu bena kayu eme jabu singianisa keluarga bangsa taneh maksudna simantek kuta. Ia me sebagai pimpinan ibas jabu e merangkap sebagai anggota keluarga rumah si waluh jabu. 
Jabu nomor 2 i gelari jabu ujung kayu, biasana ingan /jabu anak beru. Secara organisasi kepala keluarga singiani ujung kayu meseh berita ras kai-kai  perlu si man turinken.

Jabu nomor 3 igelari jabu lepar bena kayu singiani jabu nomor 3 endatermasuk bangsa taneh. Ia igelari jabu sungkun berita meneliti, berita si luar jabu. Sebab pada waktu sinai melele rusor berita-berita singgurgari kuta musuh, binatang buas, begu, keramat, mate rempet ijuma, ndelis. Jabu nomor 3 sebagai singembah berita (reporter).

Jabu nomor 4 igelari lepar ujung  bena kayu biasana ingan kalimbubu ibas bena kayu jabu igelari jabu si mangan minem, singiani jabu nomor 4 biasana ihamati erkiteken ia sebagai kalimbubu. Seumpama lit kerja jabu si bena kayu (no 1) ia i undang kundul bas amak mbentar , lit nge piring penjujuri man bana adi muat man ciger adi ibas kerja lakon.

Jabu nomor 5 igelari sedapuren bena kayu. Biasana jabu anak beru menteri bena kayu. Adi menurut teori adat anak beru enda ikataken jabu peninggel-ninggel. Ertina simegiken, kai musyawarah (runggun), jadi ia sebagai saksi man kepentingen jabu-jabu ibas rumah e.

Jabu nomor 6 igelari sedapuren ujung kayu. Biasana ingan jabu anak/senina singiani jabu kalimbubu bena kayu. Jabu e rusur ikataken jabu ariteneng. Jabu e gunana mereken ketenangaen man kerina jabu. 

Jabu nomor 7 igelari sedapuren ujung kayu. Biasana jabu e ingan guru/dukun sibeluh nambari, sibelu niktik wari. Entah pe lit anggota jabu tersiher, tersambar, tersengget kujabu nomor 7 i tambari. 

Jabu nomor 8 igelari jabu sedapuren lepar bena kayu. Jabu e singianisa anak entah pe senina singiani jabu ujung kayu. Biasa pe ikataken singkapuri belo. Enda i lakoken, entah lit tamu, ia mereken/ menyediaken belo, ras ertutur.

Bagendame singiani rumah siwaluh jabu, e lit kerina pertalin keluarga ras tugas-tugas menurut adat. erpalasken arah rumah siwaluh jabu e lit pembagian tugas secara terpimpin. Alu gendek kata ibas rumah siwaluh jabu enggo i datken karakter penghuni jabu emekap:

-       Pemimpin

-       Penyedik

-       Penjaga keamanen

-       Seksi tambar/ kesehaten

-       Sekretaris (penerima tamu)

-       Pembaba berita sebagai media.